4.6 ကုမာရပေတဝတ္ထု
Review
746.
799
“သာဝတ္ထိ နာမ နဂရံ,
ဟိမဝန္တဿ ပဿတော;
တတ္ထ အာသုံ ဒွေ ကုမာရာ,
ရာဇပုတ္တာတိ မေ သုတံ.
747.
800
သမ္မတ္တာ ရဇနီယေသု,
ကာမဿာဒါဘိနန္ဒိနော;
ပစ္စုပ္ပန္နသုခေ ဂိဒ္ဓါ,
န တေ ပဿိံသုနာဂတံ.
748.
801
တေ စုတာ စ မနုဿတ္တာ,
ပရလောကံ ဣတော ဂတာ;
တေဓ ဃောသေန္တျဒိဿန္တာ,
ပုဗ္ဗေ ဒုက္ကဋမတ္တနော.
749.
802
ဗဟူသု ဝတ သန္တေသု,
ဒေယျဓမ္မေ ဥပဋ္ဌိတေ;
နာသက္ခိမှာ စ အတ္တာနံ,
ပရိတ္တံ ကာတုံ သုခါဝဟံ.
750.
803
ကိံ တတော ပါပကံ အဿ,
ယံ နော ရာဇကုလာ စုတာ;
ဥပပန္နာ ပေတ္တိဝိသယံ,_
ခုပ္ပိပါသသမပ္ပိတာ.
751.
804
သာမိနော ဣဓ ဟုတွာန,
ဟောန္တိ အသာမိနော တဟိံ;
ဘမန္တိ ခုပ္ပိပါသာယ,
မနုဿာ ဥန္နတောနတာ.
752.
805
ဧတမာဒီနဝံ ဉတွာ,
ဣဿရမဒသမ္ဘဝံ;_
ပဟာယ ဣဿရမဒံ,
ဘဝေ သဂ္ဂဂတော နရော;
ကာယဿ ဘေဒါ သပ္ပညော,
သဂ္ဂံ သော ဥပပဇ္ဇတီ”တိ.
806
ကုမာရပေတဝတ္ထု ဆဋ္ဌံ.