1.10 အာဠဝကသုတ္တ
ဧဝံ မေ သုတံ— ဧကံ သမယံ ဘဂဝါ အာဠဝိယံ ဝိဟရတိ အာဠဝကဿ ယက္ခဿ ဘဝနေ. အထ ခေါ အာဠဝကော ယက္ခော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ ဧတဒဝေါစ— “နိက္ခမ, သမဏာ”တိ. “သာဓာဝုသော”တိ ဘဂဝါ နိက္ခမိ. “ပဝိသ, သမဏာ”တိ. “သာဓာဝုသော”တိ ဘဂဝါ ပါဝိသိ.
ဒုတိယမ္ပိ ခေါ …ပေ… တတိယမ္ပိ ခေါ အာဠဝကော ယက္ခော ဘဂဝန္တံ ဧတဒဝေါစ— “နိက္ခမ, သမဏာ”တိ. “သာဓာဝုသော”တိ ဘဂဝါ နိက္ခမိ. “ပဝိသ, သမဏာ”တိ. “သာဓာဝုသော”တိ ဘဂဝါ ပါဝိသိ.
စတုတ္ထမ္ပိ ခေါ အာဠဝကော ယက္ခော ဘဂဝန္တံ ဧတဒဝေါစ— “နိက္ခမ, သမဏာ”တိ. “န ခွါဟံ တံ, အာဝုသော, နိက္ခမိဿာမိ. ယံ တေ ကရဏီယံ, တံ ကရောဟီ”တိ.
“ပဉှံ တံ, သမဏ, ပုစ္ဆိဿာမိ. သစေ မေ န ဗျာကရိဿသိ, စိတ္တံ ဝါ တေ ခိပိဿာမိ, ဟဒယံ ဝါ တေ ဖာလေဿာမိ, ပါဒေသု ဝါ ဂဟေတွာ ပါရဂင်္ဂါယ ခိပိဿာမီ”တိ.
“န ခွါဟံ တံ, အာဝုသော, ပဿာမိ သဒေဝကေ လောကေ သမာရကေ သဗြဟ္မကေ သဿမဏဗြာဟ္မဏိယာ ပဇာယ သဒေဝမနုဿာယ ယော မေ စိတ္တံ ဝါ ခိပေယျ ဟဒယံ ဝါ ဖာလေယျ ပါဒေသု ဝါ ဂဟေတွာ ပါရဂင်္ဂါယ ခိပေယျ. အပိ စ တွံ, အာဝုသော, ပုစ္ဆ ယဒါကင်္ခသီ”တိ. အထ ခေါ အာဠဝကော ယက္ခော ဘဂဝန္တံ ဂါထာယ အဇ္ဈဘာသိ—
“ကိံ သူဓ ဝိတ္တံ ပုရိသဿ သေဋ္ဌံ,
ကိံ သု သုစိဏ္ဏံ သုခမာဝဟာတိ;
ကိံ သု ဟဝေ သာဒုတရံ ရသာနံ,
ကထံဇီဝိံ ဇီဝိတမာဟု သေဋ္ဌံ”. (1)
“သဒ္ဓီဓ ဝိတ္တံ ပုရိသဿ သေဋ္ဌံ,
ဓမ္မော သုစိဏ္ဏော သုခမာဝဟာတိ;
သစ္စံ ဟဝေ သာဒုတရံ ရသာနံ,
ပညာဇီဝိံ ဇီဝိတမာဟု သေဋ္ဌံ”. (2)
“ကထံ သု တရတိ ဩဃံ,
ကထံ သု တရတိ အဏ္ဏဝံ;
ကထံ သု ဒုက္ခမစ္စေတိ,
ကထံ သု ပရိသုဇ္ဈတိ”. (3)
“သဒ္ဓါယ တရတိ ဩဃံ,
အပ္ပမာဒေန အဏ္ဏဝံ;
ဝီရိယေန ဒုက္ခမစ္စေတိ,
ပညာယ ပရိသုဇ္ဈတိ”. (4)
“ကထံ သု လဘတေ ပညံ,
ကထံ သု ဝိန္ဒတေ ဓနံ;
ကထံ သု ကိတ္တိံ ပပ္ပေါတိ,
ကထံ မိတ္တာနိ ဂန္ထတိ;
အသ္မာ လောကာ ပရံ လောကံ,
ကထံ ပေစ္စ န သောစတိ”. (5)
“သဒ္ဒဟာနော အရဟတံ,
ဓမ္မံ နိဗ္ဗာနပတ္တိယာ;
သုဿူသံ လဘတေ ပညံ,
အပ္ပမတ္တော ဝိစက္ခဏော. (6)
ပတိရူပကာရီ ဓုရဝါ,
ဥဋ္ဌာတာ ဝိန္ဒတေ ဓနံ;_
သစ္စေန ကိတ္တိံ ပပ္ပေါတိ,
ဒဒံ မိတ္တာနိ ဂန္ထတိ. (7)
ယဿေတေ စတုရော ဓမ္မာ,
သဒ္ဓဿ ဃရမေသိနော;
သစ္စံ ဓမ္မော ဓိတိ စာဂေါ,
သ ဝေ ပေစ္စ န သောစတိ. (8)
ဣင်္ဃ အညေပိ ပုစ္ဆဿု,_
ပုထူ သမဏဗြာဟ္မဏေ;
ယဒိ သစ္စာ ဒမာ စာဂါ,
ခန္တျာ ဘိယျောဓ ဝိဇ္ဇတိ”. (9)
“ကထံ နု ဒါနိ ပုစ္ဆေယျံ,
ပုထူ သမဏဗြာဟ္မဏေ;
ယောဟံ အဇ္ဇ ပဇာနာမိ,
ယော အတ္ထော သမ္ပရာယိကော. (10)
အတ္ထာယ ဝတ မေ ဗုဒ္ဓေါ,
ဝါသာယာဠဝိမာဂမာ;
ယောဟံ အဇ္ဇ ပဇာနာမိ,
ယတ္ထ ဒိန္နံ မဟပ္ဖလံ. (11)
သော အဟံ ဝိစရိဿာမိ,
ဂါမာ ဂါမံ ပုရာ ပုရံ;
နမဿမာနော သမ္ဗုဒ္ဓံ,
ဓမ္မဿ စ သုဓမ္မတန်”တိ. (12)
အာဠဝကသုတ္တံ ဒသမံ.