1.11 ဝိဇယသုတ္တ
စရံ ဝါ ယဒိ ဝါ တိဋ္ဌံ,
နိသိန္နော ဥဒ ဝါ သယံ;
သမိဉ္ဇေတိ ပသာရေတိ,
ဧသာ ကာယဿ ဣဉ္ဇနာ. (1)
အဋ္ဌိနဟာရုသံယုတ္တော,
တစမံသာဝလေပနော;
ဆဝိယာ ကာယော ပဋိစ္ဆန္နော,
ယထာဘူတံ န ဒိဿတိ. (2)
အန္တပူရော ဥဒရပူရော,
ယကနပေဠဿ ဝတ္ထိနော;
ဟဒယဿ ပပ္ဖါသဿ,
ဝက္ကဿ ပိဟကဿ စ. (3)
သိင်္ဃာဏိကာယ ခေဠဿ,
သေဒဿ စ မေဒဿ စ;
လောဟိတဿ လသိကာယ,
ပိတ္တဿ စ ဝသာယ စ. (4)
အထဿ နဝဟိ သောတေဟိ,
အသုစီ သဝတိ သဗ္ဗဒါ;
အက္ခိမှာ အက္ခိဂူထကော,
ကဏ္ဏမှာ ကဏ္ဏဂူထကော. (5)
သိင်္ဃာဏိကာ စ နာသတော,
မုခေန ဝမတေကဒါ;
ပိတ္တံ သေမှဉ္စ ဝမတိ,
ကာယမှာ သေဒဇလ္လိကာ. (6)
အထဿ သုသိရံ သီသံ,
မတ္ထလုင်္ဂဿ ပူရိတံ;
သုဘတော နံ မညတိ ဗာလော,
အဝိဇ္ဇာယ ပုရက္ခတော. (7)
ယဒါ စ သော မတော သေတိ,
ဥဒ္ဓုမာတော ဝိနီလကော;_
အပဝိဒ္ဓေါ သုသာနသ္မိံ,
အနပေက္ခာ ဟောန္တိ ဉာတယော. (8)
ခါဒန္တိ နံ သုဝါနာ စ,
သိင်္ဂါလာ စ ဝကာ ကိမီ;
ကာကာ ဂိဇ္ဈာ စ ခါဒန္တိ,
ယေ စညေ သန္တိ ပါဏိနော. (9)
သုတွာန ဗုဒ္ဓဝစနံ,
ဘိက္ခု ပညာဏဝါ ဣဓ;
သော ခေါ နံ ပရိဇာနာတိ,
ယထာဘူတဉှိ ပဿတိ. (10)
ယထာ ဣဒံ တထာ ဧတံ,
ယထာ ဧတံ တထာ ဣဒံ;
အဇ္ဈတ္တဉ္စ ဗဟိဒ္ဓါ စ,
ကာယေ ဆန္ဒံ ဝိရာဇယေ. (11)
ဆန္ဒရာဂဝိရတ္တော သော,
ဘိက္ခု ပညာဏဝါ ဣဓ;
အဇ္ဈဂါ အမတံ သန္တိံ,
နိဗ္ဗာနံ ပဒမစ္စုတံ. (12)
ဒွိပါဒကောယံ အသုစိ,
ဒုဂ္ဂန္ဓော ပရိဟီရတိ;
နာနာကုဏပပရိပူရော,
ဝိဿဝန္တော တတော တတော. (13)
ဧတာဒိသေန ကာယေန,
ယော မညေ ဥဏ္ဏမေတဝေ;
ပရံ ဝါ အဝဇာနေယျ,
ကိမညတြ အဒဿနာတိ. (14)
ဝိဇယသုတ္တံ ဧကာဒသမံ.