1.12 မုနိသုတ္တ
သန္ထဝါတော ဘယံ ဇာတံ,
နိကေတာ ဇာယတေ ရဇော;
အနိကေတမသန္ထဝံ,
ဧတံ ဝေ မုနိဒဿနံ. (1)
ယော ဇာတမုစ္ဆိဇ္ဇ န ရောပယေယျ,
ဇာယန္တမဿ နာနုပ္ပဝေစ္ဆေ;
တမာဟု ဧကံ မုနိနံ စရန္တံ,
အဒ္ဒက္ခိ သော သန္တိပဒံ မဟေသိ. (2)
သင်္ခါယ ဝတ္ထူနိ ပမာယ ဗီဇံ,
သိနေဟမဿ နာနုပ္ပဝေစ္ဆေ;
သ ဝေ မုနီ ဇာတိခယန္တဒဿီ,
တက္ကံ ပဟာယ န ဥပေတိ သင်္ခံ. (3)
အညာယ သဗ္ဗာနိ နိဝေသနာနိ,
အနိကာမယံ အညတရမ္ပိ တေသံ;
သ ဝေ မုနီ ဝီတဂေဓော အဂိဒ္ဓေါ,
နာယူဟတီ ပါရဂတော ဟိ ဟောတိ. (4)
သဗ္ဗာဘိဘုံ သဗ္ဗဝိဒုံ သုမေဓံ,
သဗ္ဗေသု ဓမ္မေသု အနူပလိတ္တံ;
သဗ္ဗဉ္ဇဟံ တဏှက္ခယေ ဝိမုတ္တံ,
တံ ဝါပိ ဓီရာ မုနိ ဝေဒယန္တိ. (5)
ပညာဗလံ သီလဝတူပပန္နံ,
သမာဟိတံ ဈာနရတံ သတီမံ;
သင်္ဂါ ပမုတ္တံ အခိလံ အနာသဝံ,
တံ ဝါပိ ဓီရာ မုနိ ဝေဒယန္တိ. (6)
ဧကံ စရန္တံ မုနိမပ္ပမတ္တံ,
နိန္ဒာပသံသာသု အဝေဓမာနံ;
သီဟံဝ သဒ္ဒေသု အသန္တသန္တံ,
ဝါတံဝ ဇာလမှိ အသဇ္ဇမာနံ;
ပဒ္မံဝ တောယေန အလိပ္ပမာနံ,
နေတာရမညေသမနညနေယျံ;
တံ ဝါပိ ဓီရာ မုနိ ဝေဒယန္တိ. (7)
ယော ဩဂဟဏေ ထမ္ဘောရိဝါဘိဇာယတိ,
ယသ္မိံ ပရေ ဝါစာပရိယန္တံ ဝဒန္တိ;
တံ ဝီတရာဂံ သုသမာဟိတိန္ဒြိယံ,
တံ ဝါပိ ဓီရာ မုနိ ဝေဒယန္တိ. (8)
ယော ဝေ ဌိတတ္တော တသရံဝ ဥဇ္ဇု,
ဇိဂုစ္ဆတိ ကမ္မေဟိ ပါပကေဟိ;
ဝီမံသမာနော ဝိသမံ သမဉ္စ,
တံ ဝါပိ ဓီရာ မုနိ ဝေဒယန္တိ. (9)
ယော သညတတ္တော န ကရောတိ ပါပံ,
ဒဟရော မဇ္ဈိမော စ မုနိ ယတတ္တော;
အရောသနေယျော န သော ရောသေတိ ကဉ္စိ,
တံ ဝါပိ ဓီရာ မုနိ ဝေဒယန္တိ. (10)
ယဒဂ္ဂတော မဇ္ဈတော သေသတော ဝါ,
ပိဏ္ဍံ လဘေထ ပရဒတ္တူပဇီဝီ;
နာလံ ထုတုံ နောပိ နိပစ္စဝါဒီ,
တံ ဝါပိ ဓီရာ မုနိ ဝေဒယန္တိ. (11)
မုနိံ စရန္တံ ဝိရတံ မေထုနသ္မာ,
ယော ယောဗ္ဗနေ နောပနိဗဇ္ဈတေ ကွစိ;
မဒပ္ပမာဒါ ဝိရတံ ဝိပ္ပမုတ္တံ,
တံ ဝါပိ ဓီရာ မုနိ ဝေဒယန္တိ. (12)
အညာယ လောကံ ပရမတ္ထဒဿိံ,
ဩဃံ သမုဒ္ဒံ အတိတရိယ တာဒိံ;
တံ ဆိန္နဂန္ထံ အသိတံ အနာသဝံ,
တံ ဝါပိ ဓီရာ မုနိ ဝေဒယန္တိ. (13)
အသမာ ဥဘော ဒူရဝိဟာရဝုတ္တိနော,
ဂိဟီ ဒါရပေါသီ အမမော စ သုဗ္ဗတော;
ပရပါဏရောဓာယ ဂိဟီ အသညတော,
နိစ္စံ မုနီ ရက္ခတိ ပါဏိနေ ယတော. (14)
သိခီ ယထာ နီလဂီဝေါ ဝိဟင်္ဂမော,
ဟံသဿ နောပေတိ ဇဝံ ကုဒါစနံ;
ဧဝံ ဂိဟီ နာနုကရောတိ ဘိက္ခုနော,
မုနိနော ဝိဝိတ္တဿ ဝနမှိ ဈာယတောတိ. (15)
မုနိသုတ္တံ ဒွါဒသမံ.
ဥရဂဝဂ္ဂေါ ပဌမော.
တဿုဒ္ဒါနံ
ဥရဂေါ ဓနိယော စေဝ,_
ဝိသာဏဉ္စ တထာ ကသိ;
စုန္ဒော ပရာဘဝေါ စေဝ,
ဝသလော မေတ္တဘာဝနာ.
သာတာဂိရော အာဠဝကော,
ဝိဇယော စ တထာ မုနိ;
ဒွါဒသေတာနိ သုတ္တာနိ,
ဥရဂဝဂ္ဂေါတိ ဝုစ္စတီတိ._