1.2 ဓနိယသုတ္တ
“ပက္ကောဒနော ဒုဒ္ဓခီရောဟမသ္မိ, (ဣတိ ဓနိယော ဂေါပေါ)
အနုတီရေ မဟိယာ သမာနဝါသော;
ဆန္နာ ကုဋိ အာဟိတော ဂိနိ,
အထ စေ ပတ္ထယသီ ပဝဿ ဒေဝ”. (1)
“အက္ကောဓနော ဝိဂတခိလောဟမသ္မိ, (ဣတိ ဘဂဝါ)
အနုတီရေ မဟိယေကရတ္တိဝါသော;
ဝိဝဋာ ကုဋိ နိဗ္ဗုတော ဂိနိ,
အထ စေ ပတ္ထယသီ ပဝဿ ဒေဝ”. (2)
“အန္ဓကမကသာ န ဝိဇ္ဇရေ, (ဣတိ ဓနိယော ဂေါပေါ)
ကစ္ဆေ ရူဠှတိဏေ စရန္တိ ဂါဝေါ;
ဝုဋ္ဌိမ္ပိ သဟေယျုမာဂတံ,
အထ စေ ပတ္ထယသီ ပဝဿ ဒေဝ”. (3)
“ဗဒ္ဓါသိ ဘိသီ သုသင်္ခတာ, (ဣတိ ဘဂဝါ)
တိဏ္ဏော ပါရဂတော ဝိနေယျ ဩဃံ;
အတ္ထော ဘိသိယာ န ဝိဇ္ဇတိ,
အထ စေ ပတ္ထယသီ ပဝဿ ဒေဝ”. (4)
“ဂေါပီ မမ အဿဝါ အလောလာ, (ဣတိ ဓနိယော ဂေါပေါ)
ဒီဃရတ္တံ သံဝါသိယာ မနာပါ;
တဿာ န သုဏာမိ ကိဉ္စိ ပါပံ,
အထ စေ ပတ္ထယသီ ပဝဿ ဒေဝ”. (5)
“စိတ္တံ မမ အဿဝံ ဝိမုတ္တံ, (ဣတိ ဘဂဝါ)
ဒီဃရတ္တံ ပရိဘာဝိတံ သုဒန္တံ;
ပါပံ ပန မေ န ဝိဇ္ဇတိ,
အထ စေ ပတ္ထယသီ ပဝဿ ဒေဝ”. (6)
“အတ္တဝေတနဘတောဟမသ္မိ, (ဣတိ ဓနိယော ဂေါပေါ)
ပုတ္တာ စ မေ သမာနိယာ အရောဂါ;
တေသံ န သုဏာမိ ကိဉ္စိ ပါပံ,
အထ စေ ပတ္ထယသီ ပဝဿ ဒေဝ”. (7)
“နာဟံ ဘတကောသ္မိ ကဿစိ, (ဣတိ ဘဂဝါ)
နိဗ္ဗိဋ္ဌေန စရာမိ သဗ္ဗလောကေ;
အတ္ထော ဘတိယာ န ဝိဇ္ဇတိ,
အထ စေ ပတ္ထယသီ ပဝဿ ဒေဝ”. (8)
“အတ္ထိ ဝသာ အတ္ထိ ဓေနုပါ, (ဣတိ ဓနိယော ဂေါပေါ)
ဂေါဓရဏိယော ပဝေဏိယောပိ အတ္ထိ;
ဥသဘောပိ ဂဝမ္ပတီဓ အတ္ထိ,_
အထ စေ ပတ္ထယသီ ပဝဿ ဒေဝ”. (9)
“နတ္ထိ ဝသာ နတ္ထိ ဓေနုပါ, (ဣတိ ဘဂဝါ)
ဂေါဓရဏိယော ပဝေဏိယောပိ နတ္ထိ;
ဥသဘောပိ ဂဝမ္ပတီဓ နတ္ထိ,_
အထ စေ ပတ္ထယသီ ပဝဿ ဒေဝ”. (10)
“ခိလာ နိခါတာ အသမ္ပဝေဓီ, (ဣတိ ဓနိယော ဂေါပေါ)
ဒါမာ မုဉ္ဇမယာ နဝါ သုသဏ္ဌာနာ;
န ဟိ သက္ခိန္တိ ဓေနုပါပိ ဆေတ္တုံ,
အထ စေ ပတ္ထယသီ ပဝဿ ဒေဝ”. (11)
“ဥသဘောရိဝ ဆေတွ ဗန္ဓနာနိ, (ဣတိ ဘဂဝါ)
နာဂေါ ပူတိလတံဝ ဒါလယိတွာ;
နာဟံ ပုနုပေဿံ ဂဗ္ဘသေယျံ,
အထ စေ ပတ္ထယသီ ပဝဿ ဒေဝ”. (12)
နိန္နဉ္စ ထလဉ္စ ပူရယန္တော,
မဟာမေဃော ပဝဿိ တာဝဒေဝ;
သုတွာ ဒေဝဿ ဝဿတော,
ဣမမတ္ထံ ဓနိယော အဘာသထ. (13)_
“လာဘာ ဝတ နော အနပ္ပကာ,
ယေ မယံ ဘဂဝန္တံ အဒ္ဒသာမ;
သရဏံ တံ ဥပေမ စက္ခုမ,
သတ္ထာ နော ဟောဟိ တုဝံ မဟာမုနိ. (14)
ဂေါပီ စ အဟဉ္စ အဿဝါ,
ဗြဟ္မစရိယံ သုဂတေ စရာမသေ;
ဇာတိမရဏဿ ပါရဂူ,
ဒုက္ခဿန္တကရာ ဘဝါမသေ”. (15)
“နန္ဒတိ ပုတ္တေဟိ ပုတ္တိမာ, (ဣတိ မာရော ပါပိမာ)
ဂေါမာ ဂေါဟိ တထေဝ နန္ဒတိ;
ဥပဓီ ဟိ နရဿ နန္ဒနာ,_
န ဟိ သော နန္ဒတိ ယော နိရူပဓိ”. (16)
“သောစတိ ပုတ္တေဟိ ပုတ္တိမာ, (ဣတိ ဘဂဝါ)
ဂေါမာ ဂေါဟိ တထေဝ သောစတိ;
ဥပဓီ ဟိ နရဿ သောစနာ,_
န ဟိ သော သောစတိ ယော နိရူပဓီ”တိ. (17)
ဓနိယသုတ္တံ ဒုတိယံ.