1.5 စုန္ဒသုတ္တ
“ပုစ္ဆာမိ မုနိံ ပဟူတပညံ, (ဣတိ စုန္ဒော ကမ္မာရပုတ္တော)
ဗုဒ္ဓံ ဓမ္မဿာမိံ ဝီတတဏှံ;
ဒွိပဒုတ္တမံ သာရထီနံ ပဝရံ,
ကတိ လောကေ သမဏာ တဒိင်္ဃ ဗြူဟိ”. (1)
“စတုရော သမဏာ န ပဉ္စမတ္ထိ, (စုန္ဒာတိ ဘဂဝါ)
တေ တေ အာဝိကရောမိ သက္ခိပုဋ္ဌော;
မဂ္ဂဇိနော မဂ္ဂဒေသကော စ,
မဂ္ဂေ ဇီဝတိ ယော စ မဂ္ဂဒူသီ”. (2)
“ကံ မဂ္ဂဇိနံ ဝဒန္တိ ဗုဒ္ဓါ, (ဣတိ စုန္ဒော ကမ္မာရပုတ္တော)
မဂ္ဂက္ခာယီ ကထံ အတုလျော ဟောတိ;
မဂ္ဂေ ဇီဝတိ မေ ဗြူဟိ ပုဋ္ဌော,
အထ မေ အာဝိကရောဟိ မဂ္ဂဒူသိံ”. (3)
“ယော တိဏ္ဏကထံကထော ဝိသလ္လော,
နိဗ္ဗာနာဘိရတော အနာနုဂိဒ္ဓေါ;
လောကဿ သဒေဝကဿ နေတာ,
တာဒိံ မဂ္ဂဇိနံ ဝဒန္တိ ဗုဒ္ဓါ. (4)
ပရမံ ပရမန္တိ ယောဓ ဉတွာ,
အက္ခာတိ ဝိဘဇတေ ဣဓေဝ ဓမ္မံ;
တံ ကင်္ခဆိဒံ မုနိံ အနေဇံ,
ဒုတိယံ ဘိက္ခုနမာဟု မဂ္ဂဒေသိံ. (5)
ယော ဓမ္မပဒေ သုဒေသိတေ,
မဂ္ဂေ ဇီဝတိ သညတော သတီမာ;
အနဝဇ္ဇပဒါနိ သေဝမာနော,
တတိယံ ဘိက္ခုနမာဟု မဂ္ဂဇီဝိံ. (6)
ဆဒနံ ကတွာန သုဗ္ဗတာနံ,
ပက္ခန္ဒီ ကုလဒူသကော ပဂဗ္ဘော;
မာယာဝီ အသညတော ပလာပေါ,
ပတိရူပေန စရံ သ မဂ္ဂဒူသီ. (7)
ဧတေ စ ပဋိဝိဇ္ဈိ ယော ဂဟဋ္ဌော,
သုတဝါ အရိယသာဝကော သပညော;
သဗ္ဗေ နေတာဒိသာတိ ဉတွာ,
ဣတိ ဒိသွာ န ဟာပေတိ တဿ သဒ္ဓါ;_
ကထံ ဟိ ဒုဋ္ဌေန အသမ္ပဒုဋ္ဌံ,
သုဒ္ဓံ အသုဒ္ဓေန သမံ ကရေယျာ”တိ. (8)
စုန္ဒသုတ္တံ ပဉ္စမံ.