1.7 ဝသလသုတ္တ
ဧဝံ မေ သုတံ— ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ သာဝတ္ထိံ ပိဏ္ဍာယ ပါဝိသိ. တေန ခေါ ပန သမယေန အဂ္ဂိကဘာရဒွါဇဿ ဗြာဟ္မဏဿ နိဝေသနေ အဂ္ဂိ ပဇ္ဇလိတော ဟောတိ အာဟုတိ ပဂ္ဂဟိတာ. အထ ခေါ ဘဂဝါ သာဝတ္ထိယံ သပဒါနံ ပိဏ္ဍာယ စရမာနော ယေန အဂ္ဂိကဘာရဒွါဇဿ ဗြာဟ္မဏဿ နိဝေသနံ တေနုပသင်္ကမိ.
အဒ္ဒသာ ခေါ အဂ္ဂိကဘာရဒွါဇော ဗြာဟ္မဏော ဘဂဝန္တံ ဒူရတောဝ အာဂစ္ဆန္တံ. ဒိသွာန ဘဂဝန္တံ ဧတဒဝေါစ— “တတြေဝ, မုဏ္ဍက; တတြေဝ, သမဏက; တတြေဝ, ဝသလက, တိဋ္ဌာဟီ”တိ.
ဧဝံ ဝုတ္တေ, ဘဂဝါ အဂ္ဂိကဘာရဒွါဇံ ဗြာဟ္မဏံ ဧတဒဝေါစ— “ဇာနာသိ ပန တွံ, ဗြာဟ္မဏ, ဝသလံ ဝါ ဝသလကရဏေ ဝါ ဓမ္မေ”တိ? “န ခွါဟံ, ဘော ဂေါတမ, ဇာနာမိ ဝသလံ ဝါ ဝသလကရဏေ ဝါ ဓမ္မေ; သာဓု မေ ဘဝံ ဂေါတမော တထာ ဓမ္မံ ဒေသေတု, ယထာဟံ ဇာနေယျံ ဝသလံ ဝါ ဝသလကရဏေ ဝါ ဓမ္မေ”တိ. “တေန ဟိ, ဗြာဟ္မဏ, သုဏာဟိ, သာဓုကံ မနသိ ကရောဟိ; ဘာသိဿာမီ”တိ. “ဧဝံ, ဘော”တိ ခေါ အဂ္ဂိကဘာရဒွါဇော ဗြာဟ္မဏော ဘဂဝတော ပစ္စဿောသိ. ဘဂဝါ ဧတဒဝေါစ—
“ကောဓနော ဥပနာဟီ စ,
ပါပမက္ခီ စ ယော နရော;
ဝိပန္နဒိဋ္ဌိ မာယာဝီ,
တံ ဇညာ ဝသလော ဣတိ. (1)
ဧကဇံ ဝါ ဒွိဇံ ဝါပိ,
ယောဓ ပါဏံ ဝိဟိံသတိ;
ယဿ ပါဏေ ဒယာ နတ္ထိ,
တံ ဇညာ ဝသလော ဣတိ. (2)
ယော ဟန္တိ ပရိရုန္ဓတိ,
ဂါမာနိ နိဂမာနိ စ;
နိဂ္ဂါဟကော သမညာတော,
တံ ဇညာ ဝသလော ဣတိ. (3)
ဂါမေ ဝါ ယဒိ ဝါ ရညေ,
ယံ ပရေသံ မမာယိတံ;
ထေယျာ အဒိန္နမာဒေတိ,
တံ ဇညာ ဝသလော ဣတိ. (4)
ယော ဟဝေ ဣဏမာဒါယ,
စုဇ္ဇမာနော ပလာယတိ;
န ဟိ တေ ဣဏမတ္ထီတိ,
တံ ဇညာ ဝသလော ဣတိ. (5)
ယော ဝေ ကိဉ္စိက္ခကမျတာ,
ပန္ထသ္မိံ ဝဇန္တံ ဇနံ;
ဟန္တွာ ကိဉ္စိက္ခမာဒေတိ,
တံ ဇညာ ဝသလော ဣတိ. (6)
အတ္တဟေတု ပရဟေတု,
ဓနဟေတု စ ယော နရော;
သက္ခိပုဋ္ဌော မုသာ ဗြူတိ,
တံ ဇညာ ဝသလော ဣတိ. (7)
ယော ဉာတီနံ သခီနံ ဝါ,
ဒါရေသု ပဋိဒိဿတိ;
သာဟသာ သမ္ပိယေန ဝါ,
တံ ဇညာ ဝသလော ဣတိ. (8)
ယော မာတရံ ပိတရံ ဝါ,
ဇိဏ္ဏကံ ဂတယောဗ္ဗနံ;
ပဟု သန္တော န ဘရတိ,
တံ ဇညာ ဝသလော ဣတိ. (9)
ယော မာတရံ ပိတရံ ဝါ,
ဘာတရံ ဘဂိနိံ သသုံ;
ဟန္တိ ရောသေတိ ဝါစာယ,
တံ ဇညာ ဝသလော ဣတိ. (10)
ယော အတ္ထံ ပုစ္ဆိတော သန္တော,
အနတ္ထမနုသာသတိ;
ပဋိစ္ဆန္နေန မန္တေတိ,
တံ ဇညာ ဝသလော ဣတိ. (11)
ယော ကတွာ ပါပကံ ကမ္မံ,
မာ မံ ဇညာတိ ဣစ္ဆတိ;
ယော ပဋိစ္ဆန္နကမ္မန္တော,
တံ ဇညာ ဝသလော ဣတိ. (12)
ယော ဝေ ပရကုလံ ဂန္တွာ,
ဘုတွာန သုစိဘောဇနံ;
အာဂတံ နပ္ပဋိပူဇေတိ,
တံ ဇညာ ဝသလော ဣတိ. (13)
ယော ဗြာဟ္မဏံ သမဏံ ဝါ,
အညံ ဝါပိ ဝနိဗ္ဗကံ;
မုသာဝါဒေန ဝဉ္စေတိ,
တံ ဇညာ ဝသလော ဣတိ. (14)
ယော ဗြာဟ္မဏံ သမဏံ ဝါ,
ဘတ္တကာလေ ဥပဋ္ဌိတေ;
ရောသေတိ ဝါစာ န စ ဒေတိ,
တံ ဇညာ ဝသလော ဣတိ. (15)
အသတံ ယောဓ ပဗြူတိ,
မောဟေန ပလိဂုဏ္ဌိတော;
ကိဉ္စိက္ခံ နိဇိဂီသာနော,
တံ ဇညာ ဝသလော ဣတိ. (16)
ယော စတ္တာနံ သမုက္ကံသေ,
ပရေ စ မဝဇာနာတိ;
နိဟီနော သေန မာနေန,
တံ ဇညာ ဝသလော ဣတိ. (17)
ရောသကော ကဒရိယော စ,
ပါပိစ္ဆော မစ္ဆရီ သဌော;
အဟိရိကော အနောတ္တပ္ပီ,
တံ ဇညာ ဝသလော ဣတိ. (18)
ယော ဗုဒ္ဓံ ပရိဘာသတိ,
အထ ဝါ တဿ သာဝကံ;
ပရိဗ္ဗာဇံ ဂဟဋ္ဌံ ဝါ,
တံ ဇညာ ဝသလော ဣတိ. (19)
ယော ဝေ အနရဟံ သန္တော,
အရဟံ ပဋိဇာနာတိ;
စောရော သဗြဟ္မကေ လောကေ,
ဧသော ခေါ ဝသလာဓမော;
ဧတေ ခေါ ဝသလာ ဝုတ္တာ,
မယာ ယေတေ ပကာသိတာ. (20)
န ဇစ္စာ ဝသလော ဟောတိ,
န ဇစ္စာ ဟောတိ ဗြာဟ္မဏော;
ကမ္မုနာ ဝသလော ဟောတိ,
ကမ္မုနာ ဟောတိ ဗြာဟ္မဏော. (21)
တဒမိနာပိ ဇာနာထ,
ယထာမေဒံ နိဒဿနံ;
စဏ္ဍာလပုတ္တော သောပါကော,
မာတင်္ဂေါ ဣတိ ဝိဿုတော. (22)
သော ယသံ ပရမံ ပတ္တော,
မာတင်္ဂေါ ယံ သုဒုလ္လဘံ;
အာဂစ္ဆုံ တဿုပဋ္ဌာနံ,
ခတ္တိယာ ဗြာဟ္မဏာ ဗဟူ. (23)
ဒေဝယာနံ အဘိရုယှ,
ဝိရဇံ သော မဟာပထံ;
ကာမရာဂံ ဝိရာဇေတွာ,
ဗြဟ္မလောကူပဂေါ အဟု;
န နံ ဇာတိ နိဝါရေသိ,
ဗြဟ္မလောကူပပတ္တိယာ. (24)
အဇ္ဈာယကကုလေ ဇာတာ,
ဗြာဟ္မဏာ မန္တဗန္ဓဝါ;
တေ စ ပါပေသု ကမ္မေသု,
အဘိဏှမုပဒိဿရေ. (25)
ဒိဋ္ဌေဝ ဓမ္မေ ဂါရယှာ,
သမ္ပရာယေ စ ဒုဂ္ဂတိ;
န နေ ဇာတိ နိဝါရေတိ,
ဒုဂ္ဂတျာ ဂရဟာယ ဝါ. (26)
န ဇစ္စာ ဝသလော ဟောတိ,
န ဇစ္စာ ဟောတိ ဗြာဟ္မဏော;
ကမ္မုနာ ဝသလော ဟောတိ,
ကမ္မုနာ ဟောတိ ဗြာဟ္မဏော”တိ. (27)
ဧဝံ ဝုတ္တေ, အဂ္ဂိကဘာရဒွါဇော ဗြာဟ္မဏော ဘဂဝန္တံ ဧတဒဝေါစ— “အဘိက္ကန္တံ, ဘော ဂေါတမ …ပေ… ဥပါသကံ မံ ဘဝံ ဂေါတမော ဓာရေတု အဇ္ဇတဂ္ဂေ ပါဏုပေတံ သရဏံ ဂတန်”တိ.
ဝသလသုတ္တံ သတ္တမံ.