1.9 ဟေမဝတသုတ္တ
“အဇ္ဇ ပန္နရသော ဥပေါသထော, (ဣတိ သာတာဂိရော ယက္ခော)
ဒိဗ္ဗာ ရတ္တိ ဥပဋ္ဌိတာ;
အနောမနာမံ သတ္ထာရံ,
ဟန္ဒ ပဿာမ ဂေါတမံ”. (1)
“ကစ္စိ မနော သုပဏိဟိတော, (ဣတိ ဟေမဝတော ယက္ခော)
သဗ္ဗဘူတေသု တာဒိနော;
ကစ္စိ ဣဋ္ဌေ အနိဋ္ဌေ စ,
သင်္ကပ္ပဿ ဝသီကတာ”. (2)
“မနော စဿ သုပဏိဟိတော, (ဣတိ သာတာဂိရော ယက္ခော)
သဗ္ဗဘူတေသု တာဒိနော;
အထော ဣဋ္ဌေ အနိဋ္ဌေ စ,
သင်္ကပ္ပဿ ဝသီကတာ”. (3)
“ကစ္စိ အဒိန္နံ နာဒိယတိ, (ဣတိ ဟေမဝတော ယက္ခော)
ကစ္စိ ပါဏေသု သညတော;
ကစ္စိ အာရာ ပမာဒမှာ,
ကစ္စိ ဈာနံ န ရိဉ္စတိ”. (4)
“န သော အဒိန္နံ အာဒိယတိ, (ဣတိ သာတာဂိရော ယက္ခော)
အထော ပါဏေသု သညတော;
အထော အာရာ ပမာဒမှာ,
ဗုဒ္ဓေါ ဈာနံ န ရိဉ္စတိ”. (5)
“ကစ္စိ မုသာ န ဘဏတိ, (ဣတိ ဟေမဝတော ယက္ခော)
ကစ္စိ န ခီဏဗျပ္ပထော;
ကစ္စိ ဝေဘူတိယံ နာဟ,
ကစ္စိ သမ္ဖံ န ဘာသတိ”. (6)
“မုသာ စ သော န ဘဏတိ, (ဣတိ သာတာဂိရော ယက္ခော)
အထော န ခီဏဗျပ္ပထော;
အထော ဝေဘူတိယံ နာဟ,
မန္တာ အတ္ထဉ္စ ဘာသတိ”. (7)
“ကစ္စိ န ရဇ္ဇတိ ကာမေသု, (ဣတိ ဟေမဝတော ယက္ခော)
ကစ္စိ စိတ္တံ အနာဝိလံ;
ကစ္စိ မောဟံ အတိက္ကန္တော,
ကစ္စိ ဓမ္မေသု စက္ခုမာ”. (8)
“န သော ရဇ္ဇတိ ကာမေသု, (ဣတိ သာတာဂိရော ယက္ခော)
အထော စိတ္တံ အနာဝိလံ;
သဗ္ဗမောဟံ အတိက္ကန္တော,
ဗုဒ္ဓေါ ဓမ္မေသု စက္ခုမာ”. (9)
“ကစ္စိ ဝိဇ္ဇာယ သမ္ပန္နော, (ဣတိ ဟေမဝတော ယက္ခော)
ကစ္စိ သံသုဒ္ဓစာရဏော;
ကစ္စိဿ အာသဝါ ခီဏာ,
ကစ္စိ နတ္ထိ ပုနဗ္ဘဝေါ”. (10)
“ဝိဇ္ဇာယ စေဝ သမ္ပန္နော, (ဣတိ သာတာဂိရော ယက္ခော)
အထော သံသုဒ္ဓစာရဏော;
သဗ္ဗဿ အာသဝါ ခီဏာ,
နတ္ထိ တဿ ပုနဗ္ဘဝေါ”. (11)
“သမ္ပန္နံ မုနိနော စိတ္တံ,
ကမ္မုနာ ဗျပ္ပထေန စ;
ဝိဇ္ဇာစရဏသမ္ပန္နံ,
ဓမ္မတော နံ ပသံသတိ”. (12)
“သမ္ပန္နံ မုနိနော စိတ္တံ,
ကမ္မုနာ ဗျပ္ပထေန စ;
ဝိဇ္ဇာစရဏသမ္ပန္နံ,
ဓမ္မတော အနုမောဒသိ. (13)
သမ္ပန္နံ မုနိနော စိတ္တံ,
ကမ္မုနာ ဗျပ္ပထေန စ;
ဝိဇ္ဇာစရဏသမ္ပန္နံ,
ဟန္ဒ ပဿာမ ဂေါတမံ”. (14)
“ဧဏိဇင်္ဃံ ကိသံ ဝီရံ,
အပ္ပါဟာရံ အလောလုပံ;
မုနိံ ဝနသ္မိံ ဈာယန္တံ,
ဧဟိ ပဿာမ ဂေါတမံ. (15)
သီဟံဝေကစရံ နာဂံ,
ကာမေသု အနပေက္ခိနံ;
ဥပသင်္ကမ္မ ပုစ္ဆာမ,_
မစ္စုပါသပ္ပမောစနံ. (16)
အက္ခာတာရံ ပဝတ္တာရံ,
သဗ္ဗဓမ္မာန ပါရဂုံ;
ဗုဒ္ဓံ ဝေရဘယာတီတံ,
မယံ ပုစ္ဆာမ ဂေါတမံ”. (17)
“ကိသ္မိံ လောကော သမုပ္ပန္နော, (ဣတိ ဟေမဝတော ယက္ခော)
ကိသ္မိံ ကုဗ္ဗတိ သန္ထဝံ;
ကိဿ လောကော ဥပါဒါယ,
ကိသ္မိံ လောကော ဝိဟညတိ”. (18)
“ဆသု လောကော သမုပ္ပန္နော, (ဟေမဝတာတိ ဘဂဝါ)
ဆသု ကုဗ္ဗတိ သန္ထဝံ;
ဆန္နမေဝ ဥပါဒါယ,
ဆသု လောကော ဝိဟညတိ”. (19)
“ကတမံ တံ ဥပါဒါနံ,
ယတ္ထ လောကော ဝိဟညတိ;
နိယျာနံ ပုစ္ဆိတော ဗြူဟိ,
ကထံ ဒုက္ခာ ပမုစ္စတိ”. (20)
“ပဉ္စ ကာမဂုဏာ လောကေ,
မနောဆဋ္ဌာ ပဝေဒိတာ;
ဧတ္ထ ဆန္ဒံ ဝိရာဇေတွာ,
ဧဝံ ဒုက္ခာ ပမုစ္စတိ. (21)
ဧတံ လောကဿ နိယျာနံ,
အက္ခာတံ ဝေါ ယထာတထံ;
ဧတံ ဝေါ အဟမက္ခာမိ,
ဧဝံ ဒုက္ခာ ပမုစ္စတိ”. (22)
“ကော သူဓ တရတိ ဩဃံ,
ကောဓ တရတိ အဏ္ဏဝံ;
အပ္ပတိဋ္ဌေ အနာလမ္ဗေ,
ကော ဂမ္ဘီရေ န သီဒတိ”. (23)
“သဗ္ဗဒါ သီလသမ္ပန္နော,
ပညဝါ သုသမာဟိတော;
အဇ္ဈတ္တစိန္တီ သတိမာ,
ဩဃံ တရတိ ဒုတ္တရံ. (24)
ဝိရတော ကာမသညာယ,
သဗ္ဗသံယောဇနာတိဂေါ;
နန္ဒီဘဝပရိက္ခီဏော,
သော ဂမ္ဘီရေ န သီဒတိ”. (25)
“ဂမ္ဘီရပညံ နိပုဏတ္ထဒဿိံ,
အကိဉ္စနံ ကာမဘဝေ အသတ္တံ;
တံ ပဿထ သဗ္ဗဓိ ဝိပ္ပမုတ္တံ,
ဒိဗ္ဗေ ပထေ ကမမာနံ မဟေသိံ. (26)
အနောမနာမံ နိပုဏတ္ထဒဿိံ,
ပညာဒဒံ ကာမာလယေ အသတ္တံ;
တံ ပဿထ သဗ္ဗဝိဒုံ သုမေဓံ,
အရိယေ ပထေ ကမမာနံ မဟေသိံ. (27)
သုဒိဋ္ဌံ ဝတ နော အဇ္ဇ,
သုပ္ပဘာတံ သုဟုဋ္ဌိတံ;
ယံ အဒ္ဒသာမ သမ္ဗုဒ္ဓံ,
ဩဃတိဏ္ဏမနာသဝံ. (28)
ဣမေ ဒသသတာ ယက္ခာ,_
ဣဒ္ဓိမန္တော ယသဿိနော;_
သဗ္ဗေ တံ သရဏံ ယန္တိ,
တွံ နော သတ္ထာ အနုတ္တရော. (29)
တေ မယံ ဝိစရိဿာမ,
ဂါမာ ဂါမံ နဂါ နဂံ;
နမဿမာနာ သမ္ဗုဒ္ဓံ,
ဓမ္မဿ စ သုဓမ္မတန်”တိ. (30)
ဟေမဝတသုတ္တံ နဝမံ.