2.10 ဥဋ္ဌာနသုတ္တ
Review
334.
386
ဥဋ္ဌဟထ နိသီဒထ,_
ကော အတ္ထော သုပိတေန ဝေါ;
အာတုရာနဉှိ ကာ နိဒ္ဒါ,
သလ္လဝိဒ္ဓါန ရုပ္ပတံ. (1)
335.
387
ဥဋ္ဌဟထ နိသီဒထ,_
ဒဠှံ သိက္ခထ သန္တိယာ;
မာ ဝေါ ပမတ္တေ ဝိညာယ,
မစ္စုရာဇာ အမောဟယိတ္ထ ဝသာနုဂေ. (2)
336.
388
ယာယ ဒေဝါ မနုဿာ စ,
သိတာ တိဋ္ဌန္တိ အတ္ထိကာ;
တရထေတံ ဝိသတ္တိကံ,
ခဏော ဝေါ မာ ဥပစ္စဂါ;
ခဏာတီတာ ဟိ သောစန္တိ,
နိရယမှိ သမပ္ပိတာ. (3)
337.
389
ပမာဒေါ ရဇော ပမာဒေါ,
ပမာဒါနုပတိတော ရဇော;
အပ္ပမာဒေန ဝိဇ္ဇာယ,
အဗ္ဗဟေ သလ္လမတ္တနောတိ. (4)
390
ဥဋ္ဌာနသုတ္တံ ဒသမံ.