2.12 နိဂြေါဓကပ္ပ (ဝင်္ဂီသ) သုတ္တ
- နိဂြေါဓကပ္ပ (ဝင်္ဂီသ) သုတ္တ
ဧဝံ မေ သုတံ— ဧကံ သမယံ ဘဂဝါ အာဠဝိယံ ဝိဟရတိ အဂ္ဂါဠဝေ စေတိယေ. တေန ခေါ ပန သမယေန အာယသ္မတော ဝင်္ဂီသဿ ဥပဇ္ဈာယော နိဂြေါဓကပ္ပေါ နာမ ထေရော အဂ္ဂါဠဝေ စေတိယေ အစိရပရိနိဗ္ဗုတော ဟောတိ. အထ ခေါ အာယသ္မတော ဝင်္ဂီသဿ ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ— ပရိနိဗ္ဗုတော နု ခေါ မေ ဥပဇ္ဈာယော ဥဒါဟု နော ပရိနိဗ္ဗုတောတိ? အထ ခေါ အာယသ္မာ ဝင်္ဂီသော သာယနှသမယံ ပဋိသလ္လာနာ ဝုဋ္ဌိတော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ ဝင်္ဂီသော ဘဂဝန္တံ ဧတဒဝေါစ— ဣဓ မယှံ, ဘန္တေ, ရဟောဂတဿ ပဋိသလ္လီနဿ ဧဝံ စေတသော ပရိဝိတက္ကော ဥဒပါဒိ— ပရိနိဗ္ဗုတော နု ခေါ မေ ဥပဇ္ဈာယော, ဥဒါဟု နော ပရိနိဗ္ဗုတောတိ. အထ ခေါ အာယသ္မာ ဝင်္ဂီသော ဥဋ္ဌာယာသနာ ဧကံသံ စီဝရံ ကတွာ ယေန ဘဂဝါ တေနဉ္ဇလိံ ပဏာမေတွာ ဘဂဝန္တံ ဂါထာယ အဇ္ဈဘာသိ—
“ပုစ္ဆာမိ သတ္ထာရမနောမပညံ,
ဒိဋ္ဌေဝ ဓမ္မေ ယော ဝိစိကိစ္ဆာနံ ဆေတ္တာ;
အဂ္ဂါဠဝေ ကာလမကာသိ ဘိက္ခု,
ဉာတော ယသဿီ အဘိနိဗ္ဗုတတ္တော. (1)
နိဂြေါဓကပ္ပေါ ဣတိ တဿ နာမံ,
တယာ ကတံ ဘဂဝါ ဗြာဟ္မဏဿ;
သော တံ နမဿံ အစရိ မုတျပေက္ခော,
အာရဒ္ဓဝိရိယော ဒဠှဓမ္မဒဿီ. (2)
တံ သာဝကံ သကျ မယမ္ပိ သဗ္ဗေ,
အညာတုမိစ္ဆာမ သမန္တစက္ခု;
သမဝဋ္ဌိတာ နော သဝနာယ သောတာ,
တုဝံ နော သတ္ထာ တွမနုတ္တရောသိ. (3)
ဆိန္ဒေဝ နော ဝိစိကိစ္ဆံ ဗြူဟိ မေတံ,
ပရိနိဗ္ဗုတံ ဝေဒယ ဘူရိပည;
မဇ္ဈေဝ နော ဘာသ သမန္တစက္ခု,
သက္ကောဝ ဒေဝါန သဟဿနေတ္တော. (4)
ယေ ကေစိ ဂန္ထာ ဣဓ မောဟမဂ္ဂါ,
အညာဏပက္ခာ ဝိစိကိစ္ဆဌာနာ;
တထာဂတံ ပတွာ န တေ ဘဝန္တိ,
စက္ခုဉှိ ဧတံ ပရမံ နရာနံ. (5)
နော စေ ဟိ ဇာတု ပုရိသော ကိလေသေ,
ဝါတော ယထာ အဗ္ဘဃနံ ဝိဟာနေ;
တမောဝဿ နိဝုတော သဗ္ဗလောကော,
န ဇောတိမန္တောပိ နရာ တပေယျုံ. (6)
ဓီရာ စ ပဇ္ဇောတကရာ ဘဝန္တိ,
တံ တံ အဟံ ဝီရ တထေဝ မညေ;
ဝိပဿိနံ ဇာနမုပါဂမုမှာ,
ပရိသာသု နော အာဝိကရောဟိ ကပ္ပံ. (7)
ခိပ္ပံ ဂိရံ ဧရယ ဝဂ္ဂု ဝဂ္ဂုံ,
ဟံသောဝ ပဂ္ဂယှ သဏိကံ နိကူဇ;
ဗိန္ဒုဿရေန သုဝိကပ္ပိတေန,
သဗ္ဗေဝ တေ ဥဇ္ဇုဂတာ သုဏောမ. (8)
ပဟီနဇာတိမရဏံ အသေသံ,
နိဂ္ဂယှ ဓောနံ ဝဒေဿာမိ ဓမ္မံ;
န ကာမကာရော ဟိ ပုထုဇ္ဇနာနံ,
သင်္ခေယျကာရော စ တထာဂတာနံ. (9)
သမ္ပန္နဝေယျာကရဏံ တဝေဒံ,
သမုဇ္ဇုပညဿ သမုဂ္ဂဟီတံ;
အယမဉ္ဇလီ ပစ္ဆိမော သုပ္ပဏာမိတော,
မာ မောဟယီ ဇာနမနောမပည. (10)
ပရောဝရံ အရိယဓမ္မံ ဝိဒိတွာ,
မာ မောဟယီ ဇာနမနောမဝီရ;
ဝါရိံ ယထာ ဃမ္မနိ ဃမ္မတတ္တော,
ဝါစာဘိကင်္ခါမိ သုတံ ပဝဿ. (11)
ယဒတ္ထိကံ ဗြဟ္မစရိယံ အစရီ,
ကပ္ပါယနော ကစ္စိဿ တံ အမောဃံ;
နိဗ္ဗာယိ သော အာဒု သော်ပါဒိသေသော,
ယထာ ဝိမုတ္တော အဟု တံ သုဏောမ”. (12)
“အစ္ဆေစ္ဆိ တဏှံ ဣဓ နာမရူပေ, (ဣတိ ဘဂဝါ)
ကဏှဿ သောတံ ဒီဃရတ္တာနုသယိတံ;
အတာရိ ဇာတိံ မရဏံ အသေသံ”,
ဣစ္စဗြဝီ ဘဂဝါ ပဉ္စသေဋ္ဌော. (13)_
“ဧသ သုတွာ ပသီဒါမိ,
ဝစော တေ ဣသိသတ္တမ;
အမောဃံ ကိရ မေ ပုဋ္ဌံ,
န မံ ဝဉ္စေသိ ဗြာဟ္မဏော. (14)
ယထာဝါဒီ တထာကာရီ,
အဟု ဗုဒ္ဓဿ သာဝကော;
အစ္ဆိဒါ မစ္စုနော ဇာလံ,
တတံ မာယာဝိနော ဒဠှံ. (15)
အဒ္ဒသာ ဘဂဝါ အာဒိံ,
ဥပါဒါနဿ ကပ္ပိယော;_
အစ္စဂါ ဝတ ကပ္ပါယနော,
မစ္စုဓေယျံ သုဒုတ္တရန်”တိ. (16)
နိဂြေါဓကပ္ပသုတ္တံ ဒွါဒသမံ.