2.13 သမ္မာပရိဗ္ဗာဇနီယသုတ္တ
“ပုစ္ဆာမိ မုနိံ ပဟူတပညံ,
တိဏ္ဏံ ပါရင်္ဂတံ ပရိနိဗ္ဗုတံ ဌိတတ္တံ;
နိက္ခမ္မ ဃရာ ပနုဇ္ဇ ကာမေ,
ကထံ ဘိက္ခု သမ္မာ သော လောကေ ပရိဗ္ဗဇေယျ”. (1)
“ယဿ မင်္ဂလာ သမူဟတာ, (ဣတိ ဘဂဝါ)
ဥပ္ပါတာ သုပိနာ စ လက္ခဏာ စ;_
သော မင်္ဂလဒေါသဝိပ္ပဟီနော,
သမ္မာ သော လောကေ ပရိဗ္ဗဇေယျ. (2)
ရာဂံ ဝိနယေထ မာနုသေသု,
ဒိဗ္ဗေသု ကာမေသု စာပိ ဘိက္ခု;
အတိက္ကမ္မ ဘဝံ သမေစ္စ ဓမ္မံ,
သမ္မာ သော လောကေ ပရိဗ္ဗဇေယျ. (3)
ဝိပိဋ္ဌိကတွာန ပေသုဏာနိ,
ကောဓံ ကဒရီယံ ဇဟေယျ ဘိက္ခု;
အနုရောဓဝိရောဓဝိပ္ပဟီနော,
သမ္မာ သော လောကေ ပရိဗ္ဗဇေယျ. (4)
ဟိတွာန ပိယဉ္စ အပ္ပိယဉ္စ,
အနုပါဒါယ အနိဿိတော ကုဟိဉ္စိ;
သံယောဇနိယေဟိ ဝိပ္ပမုတ္တော,
သမ္မာ သော လောကေ ပရိဗ္ဗဇေယျ. (5)
န သော ဥပဓီသု သာရမေတိ,
အာဒါနေသု ဝိနေယျ ဆန္ဒရာဂံ;
သော အနိဿိတော အနညနေယျော,
သမ္မာ သော လောကေ ပရိဗ္ဗဇေယျ. (6)
ဝစသာ မနသာ စ ကမ္မုနာ စ,
အဝိရုဒ္ဓေါ သမ္မာ ဝိဒိတွာ ဓမ္မံ;
နိဗ္ဗာနပဒါဘိပတ္ထယာနော,
သမ္မာ သော လောကေ ပရိဗ္ဗဇေယျ. (7)
ယော ဝန္ဒတိ မန္တိ နုန္နမေယျ,
အက္ကုဋ္ဌောပိ န သန္ဓိယေထ ဘိက္ခု;
လဒ္ဓါ ပရဘောဇနံ န မဇ္ဇေ,
သမ္မာ သော လောကေ ပရိဗ္ဗဇေယျ. (8)
လောဘဉ္စ ဘဝဉ္စ ဝိပ္ပဟာယ,
ဝိရတော ဆေဒနဗန္ဓနာ စ ဘိက္ခု;
သော တိဏ္ဏကထံကထော ဝိသလ္လော,
သမ္မာ သော လောကေ ပရိဗ္ဗဇေယျ. (9)
သာရုပ္ပံ အတ္တနော ဝိဒိတွာ,
နော စ ဘိက္ခု ဟိံသေယျ ကဉ္စိ လောကေ;
ယထာတထိယံ ဝိဒိတွာ ဓမ္မံ,
သမ္မာ သော လောကေ ပရိဗ္ဗဇေယျ. (10)
ယဿာနုသယာ န သန္တိ ကေစိ,
မူလာ စ အကုသလာ သမူဟတာသေ;
သော နိရာသော အနာသိသာနော,
သမ္မာ သော လောကေ ပရိဗ္ဗဇေယျ. (11)
အာသဝခီဏော ပဟီနမာနော,
သဗ္ဗံ ရာဂပထံ ဥပါတိဝတ္တော;
ဒန္တော ပရိနိဗ္ဗုတော ဌိတတ္တော,
သမ္မာ သော လောကေ ပရိဗ္ဗဇေယျ. (12)
သဒ္ဓေါ သုတဝါ နိယာမဒဿီ,
ဝဂ္ဂဂတေသု န ဝဂ္ဂသာရိ ဓီရော;
လောဘံ ဒေါသံ ဝိနေယျ ပဋိဃံ,
သမ္မာ သော လောကေ ပရိဗ္ဗဇေယျ. (13)
သံသုဒ္ဓဇိနော ဝိဝဋ္ဋစ္ဆဒေါ,
ဓမ္မေသု ဝသီ ပါရဂူ အနေဇော;
သင်္ခါရနိရောဓဉာဏကုသလော,
သမ္မာ သော လောကေ ပရိဗ္ဗဇေယျ. (14)
အတီတေသု အနာဂတေသု စာပိ,
ကပ္ပါတီတော အတိစ္စသုဒ္ဓိပညော;
သဗ္ဗာယတနေဟိ ဝိပ္ပမုတ္တော,
သမ္မာ သော လောကေ ပရိဗ္ဗဇေယျ. (15)
အညာယ ပဒံ သမေစ္စ ဓမ္မံ,
ဝိဝဋံ ဒိသွာန ပဟာနမာသဝါနံ;
သဗ္ဗုပဓီနံ ပရိက္ခယာနော,
သမ္မာ သော လောကေ ပရိဗ္ဗဇေယျ”. (16)
“အဒ္ဓါ ဟိ ဘဂဝါ တထေဝ ဧတံ,
ယော သော ဧဝံဝိဟာရီ ဒန္တော ဘိက္ခု;
သဗ္ဗသံယောဇနယောဂဝီတိဝတ္တော,
သမ္မာ သော လောကေ ပရိဗ္ဗဇေယျာ”တိ. (17)
သမ္မာပရိဗ္ဗာဇနီယသုတ္တံ တေရသမံ.