2.14 ဓမ္မိကသုတ္တ
ဧဝံ မေ သုတံ— ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ ဓမ္မိကော ဥပါသကော ပဉ္စဟိ ဥပါသကသတေဟိ သဒ္ဓိံ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ ဓမ္မိကော ဥပါသကော ဘဂဝန္တံ ဂါထာဟိ အဇ္ဈဘာသိ—
“ပုစ္ဆာမိ တံ ဂေါတမ ဘူရိပည,
ကထံကရော သာဝကော သာဓု ဟောတိ;
ယော ဝါ အဂါရာ အနဂါရမေတိ,
အဂါရိနော ဝါ ပနုပါသကာသေ. (1)
တုဝဉှိ လောကဿ သဒေဝကဿ,
ဂတိံ ပဇာနာသိ ပရာယဏဉ္စ;
န စတ္ထိ တုလျော နိပုဏတ္ထဒဿီ,
တုဝဉှိ ဗုဒ္ဓံ ပဝရံ ဝဒန္တိ. (2)
သဗ္ဗံ တုဝံ ဉာဏမဝေစ္စ ဓမ္မံ,
ပကာသေသိ သတ္တေ အနုကမ္ပမာနော;
ဝိဝဋ္ဋစ္ဆဒေါသိ သမန္တစက္ခု,
ဝိရောစသိ ဝိမလော သဗ္ဗလောကေ. (3)
အာဂဉ္ဆိ တေ သန္တိကေ နာဂရာဇာ,
ဧရာဝဏော နာမ ဇိနောတိ သုတွာ;
သောပိ တယာ မန္တယိတွာဇ္ဈဂမာ,
သာဓူတိ သုတွာန ပတီတရူပေါ. (4)
ရာဇာပိ တံ ဝေဿဝဏော ကုဝေရော,
ဥပေတိ ဓမ္မံ ပရိပုစ္ဆမာနော;_
တဿာပိ တွံ ပုစ္ဆိတော ဗြူသိ ဓီရ,
သော စာပိ သုတွာန ပတီတရူပေါ. (5)
ယေ ကေစိမေ တိတ္ထိယာ ဝါဒသီလာ,
အာဇီဝကာ ဝါ ယဒိ ဝါ နိဂဏ္ဌာ;
ပညာယ တံ နာတိတရန္တိ သဗ္ဗေ,
ဌိတော ဝဇန္တံ ဝိယ သီဃဂါမိံ. (6)
ယေ ကေစိမေ ဗြာဟ္မဏာ ဝါဒသီလာ,
ဝုဒ္ဓါ စာပိ ဗြာဟ္မဏာ သန္တိ ကေစိ;
သဗ္ဗေ တယိ အတ္ထဗဒ္ဓါ ဘဝန္တိ,
ယေ စာပိ အညေ ဝါဒိနော မညမာနာ. (7)
အယဉှိ ဓမ္မော နိပုဏော သုခေါ စ,
ယောယံ တယာ ဘဂဝါ သုပ္ပဝုတ္တော;
တမေဝ သဗ္ဗေပိ သုဿူသမာနာ,
တံ နော ဝဒ ပုစ္ဆိတော ဗုဒ္ဓသေဋ္ဌ. (8)
သဗ္ဗေပိမေ ဘိက္ခဝေါ သန္နိသိန္နာ,
ဥပါသကာ စာပိ တထေဝ သောတုံ;_
သုဏန္တု ဓမ္မံ ဝိမလေနာနုဗုဒ္ဓံ,
သုဘာသိတံ ဝါသဝဿေဝ ဒေဝါ”. (9)
“သုဏာထ မေ ဘိက္ခဝေါ သာဝယာမိ ဝေါ,
ဓမ္မံ ဓုတံ တဉ္စ စရာထ သဗ္ဗေ;
ဣရိယာပထံ ပဗ္ဗဇိတာနုလောမိကံ,_
သေဝေထ နံ အတ္ထဒသော မုတီမာ. (10)
နော ဝေ ဝိကာလေ ဝိစရေယျ ဘိက္ခု,
ဂါမေ စ ပိဏ္ဍာယ စရေယျ ကာလေ;
အကာလစာရိဉှိ သဇန္တိ သင်္ဂါ,
တသ္မာ ဝိကာလေ န စရန္တိ ဗုဒ္ဓါ. (11)
ရူပါ စ သဒ္ဒါ စ ရသာ စ ဂန္ဓာ,
ဖဿာ စ ယေ သမ္မဒယန္တိ သတ္တေ;
ဧတေသု ဓမ္မေသု ဝိနေယျ ဆန္ဒံ,
ကာလေန သော ပဝိသေ ပါတရာသံ. (12)
ပိဏ္ဍဉ္စ ဘိက္ခု သမယေန လဒ္ဓါ,
ဧကော ပဋိက္ကမ္မ ရဟော နိသီဒေ;
အဇ္ဈတ္တစိန္တီ န မနော ဗဟိဒ္ဓါ,
နိစ္ဆာရယေ သင်္ဂဟိတတ္တဘာဝေါ. (13)
သစေပိ သော သလ္လပေ သာဝကေန,
အညေန ဝါ ကေနစိ ဘိက္ခုနာ ဝါ;
ဓမ္မံ ပဏီတံ တမုဒါဟရေယျ,
န ပေသုဏံ နောပိ ပရူပဝါဒံ. (14)
ဝါဒဉှိ ဧကေ ပဋိသေနိယန္တိ,
န တေ ပသံသာမ ပရိတ္တပညေ;
တတော တတော နေ ပသဇန္တိ သင်္ဂါ,
စိတ္တဉှိ တေ တတ္ထ ဂမေန္တိ ဒူရေ. (15)
ပိဏ္ဍံ ဝိဟာရံ သယနာသနဉ္စ,
အာပဉ္စ သင်္ဃာဋိရဇူပဝါဟနံ;
သုတွာန ဓမ္မံ သုဂတေန ဒေသိတံ,
သင်္ခါယ သေဝေ ဝရပညသာဝကော. (16)
တသ္မာ ဟိ ပိဏ္ဍေ သယနာသနေ စ,
အာပေ စ သင်္ဃာဋိရဇူပဝါဟနေ;
ဧတေသု ဓမ္မေသု အနူပလိတ္တော,
ဘိက္ခု ယထာ ပေါက္ခရေ ဝါရိဗိန္ဒု. (17)
ဂဟဋ္ဌဝတ္တံ ပန ဝေါ ဝဒါမိ,
ယထာကရော သာဝကော သာဓု ဟောတိ;
န ဟေသ လဗ္ဘာ သပရိဂ္ဂဟေန,
ဖဿေတုံ ယော ကေဝလော ဘိက္ခုဓမ္မော. (18)
ပါဏံ န ဟနေ န စ ဃာတယေယျ,
န စာနုဇညာ ဟနတံ ပရေသံ;
သဗ္ဗေသု ဘူတေသု နိဓာယ ဒဏ္ဍံ,
ယေ ထာဝရာ ယေ စ တသာ သန္တိ လောကေ. (19)
တတော အဒိန္နံ ပရိဝဇ္ဇယေယျ,
ကိဉ္စိ ကွစိ သာဝကော ဗုဇ္ဈမာနော;
န ဟာရယေ ဟရတံ နာနုဇညာ,
သဗ္ဗံ အဒိန္နံ ပရိဝဇ္ဇယေယျ. (20)
အဗြဟ္မစရိယံ ပရိဝဇ္ဇယေယျ,
အင်္ဂါရကာသုံ ဇလိတံဝ ဝိညူ;
အသမ္ဘုဏန္တော ပန ဗြဟ္မစရိယံ,
ပရဿ ဒါရံ န အတိက္ကမေယျ. (21)
သဘဂ္ဂတော ဝါ ပရိသဂ္ဂတော ဝါ,
ဧကဿ ဝေကော န မုသာ ဘဏေယျ;
န ဘာဏယေ ဘဏတံ နာနုဇညာ,
သဗ္ဗံ အဘူတံ ပရိဝဇ္ဇယေယျ. (22)
မဇ္ဇဉ္စ ပါနံ န သမာစရေယျ,
ဓမ္မံ ဣမံ ရောစယေ ယော ဂဟဋ္ဌော;
န ပါယယေ ပိဝတံ နာနုဇညာ,
ဥမ္မာဒနန္တံ ဣတိ နံ ဝိဒိတွာ. (23)_
မဒါ ဟိ ပါပါနိ ကရောန္တိ ဗာလာ,
ကာရေန္တိ စညေပိ ဇနေ ပမတ္တေ;
ဧတံ အပုညာယတနံ ဝိဝဇ္ဇယေ,
ဥမ္မာဒနံ မောဟနံ ဗာလကန္တံ. (24)_
ပါဏံ န ဟနေ န စာဒိန္နမာဒိယေ,
မုသာ န ဘာသေ န စ မဇ္ဇပေါ သိယာ;
အဗြဟ္မစရိယာ ဝိရမေယျ မေထုနာ,
ရတ္တိံ န ဘုဉ္ဇေယျ ဝိကာလဘောဇနံ. (25)
မာလံ န ဓာရေ န စ ဂန္ဓမာစရေ,
မဉ္စေ ဆမာယံ ဝ သယေထ သန္ထတေ;
ဧတဉှိ အဋ္ဌင်္ဂိကမာဟုပေါသထံ,
ဗုဒ္ဓေန ဒုက္ခန္တဂုနာ ပကာသိတံ. (26)
တတော စ ပက္ခဿုပဝဿုပေါသထံ,
စာတုဒ္ဒသိံ ပဉ္စဒသိဉ္စ အဋ္ဌမိံ;
ပါဋိဟာရိယပက္ခဉ္စ ပသန္နမာနသော,
အဋ္ဌင်္ဂုပေတံ သုသမတ္တရူပံ. (27)
တတော စ ပါတော ဥပဝုတ္ထုပေါသထော,
အန္နေန ပါနေန စ ဘိက္ခုသံဃံ;
ပသန္နစိတ္တော အနုမောဒမာနော,
ယထာရဟံ သံဝိဘဇေထ ဝိညူ. (28)
ဓမ္မေန မာတာပိတရော ဘရေယျ,
ပယောဇယေ ဓမ္မိကံ သော ဝဏိဇ္ဇံ;
ဧတံ ဂိဟီ ဝတ္တယမပ္ပမတ္တော,
သယမ္ပဘေ နာမ ဥပေတိ ဒေဝေ”တိ. (29)
ဓမ္မိကသုတ္တံ စုဒ္ဒသမံ.
စူဠဝဂ္ဂေါ ဒုတိယော.
တဿုဒ္ဒါနံ
ရတနာမဂန္ဓော ဟိရိ စ,
မင်္ဂလံ သူစိလောမေန;
ဓမ္မစရိယဉ္စ ဗြာဟ္မဏော,
နာဝါ ကိံသီလမုဋ္ဌာနံ.
ရာဟုလော ပုန ကပ္ပေါ စ,
ပရိဗ္ဗာဇနိယံ တထာ;
ဓမ္မိကဉ္စ ဝိဒုနော အာဟု,
စူဠဝဂ္ဂန္တိ စုဒ္ဒသာတိ.