2.2 အာမဂန္ဓသုတ္တ
“သာမာကစိင်္ဂူလကစီနကာနိ စ,
ပတ္တပ္ဖလံ မူလဖလံ ဂဝိပ္ဖလံ;
ဓမ္မေန လဒ္ဓံ သတမသ္နမာနာ,
န ကာမကာမာ အလိကံ ဘဏန္တိ. (1)
ယဒသ္နမာနော သုကတံ သုနိဋ္ဌိတံ,
ပရေဟိ ဒိန္နံ ပယတံ ပဏီတံ;
သာလီနမန္နံ ပရိဘုဉ္ဇမာနော,
သော ဘုဉ္ဇသီ ကဿပ အာမဂန္ဓံ. (2)
န အာမဂန္ဓော မမ ကပ္ပတီတိ,
ဣစ္စေဝ တွံ ဘာသသိ ဗြဟ္မဗန္ဓု;_
သာလီနမန္နံ ပရိဘုဉ္ဇမာနော,
သကုန္တမံသေဟိ သုသင်္ခတေဟိ;
ပုစ္ဆာမိ တံ ကဿပ ဧတမတ္ထံ,
ကထံပကာရော တဝ အာမဂန္ဓော”. (3)
“ပါဏာတိပါတော ဝဓဆေဒဗန္ဓနံ,
ထေယျံ မုသာဝါဒေါ နိကတိဝဉ္စနာနိ စ;
အဇ္ဈေနကုတ္တံ ပရဒါရသေဝနာ,
ဧသာမဂန္ဓော န ဟိ မံသဘောဇနံ. (4)
ယေ ဣဓ ကာမေသု အသညတာ ဇနာ,
ရသေသု ဂိဒ္ဓါ အသုစိဘာဝမဿိတာ;
နတ္ထိကဒိဋ္ဌီ ဝိသမာ ဒုရန္နယာ,
ဧသာမဂန္ဓော န ဟိ မံသဘောဇနံ. (5)
ယေ လူခသာ ဒါရုဏာ ပိဋ္ဌိမံသိကာ,
မိတ္တဒ္ဒုနော နိက္ကရုဏာတိမာနိနော;
အဒါနသီလာ န စ ဒေန္တိ ကဿစိ,
ဧသာမဂန္ဓော န ဟိ မံသဘောဇနံ. (6)
ကောဓော မဒေါ ထမ္ဘော ပစ္စုပဋ္ဌာပနာ,
မာယာ ဥသူယာ ဘဿသမုဿယော စ;
မာနာတိမာနော စ အသဗ္ဘိ သန္ထဝေါ,
ဧသာမဂန္ဓော န ဟိ မံသဘောဇနံ. (7)
ယေ ပါပသီလာ ဣဏဃာတသူစကာ,
ဝေါဟာရကူဋာ ဣဓ ပါဋိရူပိကာ;
နရာဓမာ ယေဓ ကရောန္တိ ကိဗ္ဗိသံ,
ဧသာမဂန္ဓော န ဟိ မံသဘောဇနံ. (8)
ယေ ဣဓ ပါဏေသု အသညတာ ဇနာ,
ပရေသမာဒါယ ဝိဟေသမုယျုတာ;
ဒုဿီလလုဒ္ဒါ ဖရုသာ အနာဒရာ,
ဧသာမဂန္ဓော န ဟိ မံသဘောဇနံ. (9)
ဧတေသု ဂိဒ္ဓါ ဝိရုဒ္ဓါတိပါတိနော,
နိစ္စုယျုတာ ပေစ္စ တမံ ဝဇန္တိ ယေ;
ပတန္တိ သတ္တာ နိရယံ အဝံသိရာ,
ဧသာမဂန္ဓော န ဟိ မံသဘောဇနံ. (10)
န မစ္ဆမံသာနမနာသကတ္တံ,
န နဂ္ဂိယံ န မုဏ္ဍိယံ ဇဋာဇလ္လံ;
ခရာဇိနာနိ နာဂ္ဂိဟုတ္တဿုပသေဝနာ,
ယေ ဝါပိ လောကေ အမရာ ဗဟူ တပါ;
မန္တာဟုတီ ယညမုတူပသေဝနာ,
သောဓေန္တိ မစ္စံ အဝိတိဏ္ဏကင်္ခံ. (11)
သောတေသု ဂုတ္တော ဝိဒိတိန္ဒြိယော စရေ,
ဓမ္မေ ဌိတော အဇ္ဇဝမဒ္ဒဝေ ရတော;
သင်္ဂါတိဂေါ သဗ္ဗဒုက္ခပ္ပဟီနော,
န လိပ္ပတိ ဒိဋ္ဌသုတေသု ဓီရော”. (12)
ဣစ္စေတမတ္ထံ ဘဂဝါ ပုနပ္ပုနံ,_
အက္ခာသိ နံ ဝေဒယိ မန္တပါရဂူ;
စိတြာဟိ ဂါထာဟိ မုနီ ပကာသယိ,
နိရာမဂန္ဓော အသိတော ဒုရန္နယော. (13)
သုတွာန ဗုဒ္ဓဿ သုဘာသိတံ ပဒံ,
နိရာမဂန္ဓံ သဗ္ဗဒုက္ခပ္ပနူဒနံ;
နီစမနော ဝန္ဒိ တထာဂတဿ,
တတ္ထေဝ ပဗ္ဗဇ္ဇမရောစယိတ္ထာတိ. (14)
အာမဂန္ဓသုတ္တံ ဒုတိယံ.