2.5 သူစိလောမသုတ္တ
ဧဝံ မေ သုတံ— ဧကံ သမယံ ဘဂဝါ ဂယာယံ ဝိဟရတိ ဋင်္ကိတမဉ္စေ သူစိလောမဿ ယက္ခဿ ဘဝနေ. တေန ခေါ ပန သမယေန ခရော စ ယက္ခော သူစိလောမော စ ယက္ခော ဘဂဝတော အဝိဒူရေ အတိက္ကမန္တိ. အထ ခေါ ခရော ယက္ခော သူစိလောမံ ယက္ခံ ဧတဒဝေါစ— “ဧသော သမဏော”တိ. “နေသော သမဏော, သမဏကော ဧသော. ယာဝါဟံ ဇာနာမိ ယဒိ ဝါ သော သမဏော, ယဒိ ဝါ သော သမဏကော”တိ.
အထ ခေါ သူစိလောမော ယက္ခော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝတော ကာယံ ဥပနာမေသိ. အထ ခေါ ဘဂဝါ ကာယံ အပနာမေသိ. အထ ခေါ သူစိလောမော ယက္ခော ဘဂဝန္တံ ဧတဒဝေါစ— “ဘာယသိ မံ, သမဏာ”တိ? “န ခွါဟံ တံ, အာဝုသော, ဘာယာမိ; အပိ စ တေ သမ္ဖဿော ပါပကော”တိ.
“ပဉှံ တံ, သမဏ, ပုစ္ဆိဿာမိ. သစေ မေ န ဗျာကရိဿသိ, စိတ္တံ ဝါ တေ ခိပိဿာမိ, ဟဒယံ ဝါ တေ ဖာလေဿာမိ, ပါဒေသု ဝါ ဂဟေတွာ ပါရဂင်္ဂါယ ခိပိဿာမီ”တိ.
“န ခွါဟံ တံ, အာဝုသော, ပဿာမိ သဒေဝကေ လောကေ သမာရကေ သဗြဟ္မကေ သဿမဏဗြာဟ္မဏိယာ ပဇာယ သဒေဝမနုဿာယ ယော မေ စိတ္တံ ဝါ ခိပေယျ ဟဒယံ ဝါ ဖာလေယျ ပါဒေသု ဝါ ဂဟေတွာ ပါရဂင်္ဂါယ ခိပေယျ. အပိ စ တွံ, အာဝုသော, ပုစ္ဆ ယဒါကင်္ခသီ”တိ. အထ ခေါ သူစိလောမော ယက္ခော ဘဂဝန္တံ ဂါထာယ အဇ္ဈဘာသိ—
“ရာဂေါ စ ဒေါသော စ ကုတောနိဒါနာ,
အရတီ ရတီ လောမဟံသော ကုတောဇာ;
ကုတော သမုဋ္ဌာယ မနောဝိတက္ကာ,
ကုမာရကာ ဓင်္ကမိဝေါဿဇန္တိ”. (1)
“ရာဂေါ စ ဒေါသော စ ဣတောနိဒါနာ,
အရတီ ရတီ လောမဟံသော ဣတောဇာ;
ဣတော သမုဋ္ဌာယ မနောဝိတက္ကာ,_
ကုမာရကာ ဓင်္ကမိဝေါဿဇန္တိ. (2)
သ္နေဟဇာ အတ္တသမ္ဘူတာ,
နိဂြေါဓဿေဝ ခန္ဓဇာ;
ပုထူ ဝိသတ္တာ ကာမေသု,
မာလုဝါဝ ဝိတတာဝနေ. (3)
ယေ နံ ပဇာနန္တိ ယတောနိဒါနံ,
တေ နံ ဝိနောဒေန္တိ သုဏောဟိ ယက္ခ;
တေ ဒုတ္တရံ ဩဃမိမံ တရန္တိ,
အတိဏ္ဏပုဗ္ဗံ အပုနဗ္ဘဝါယာ”တိ. (4)
သူစိလောမသုတ္တံ ပဉ္စမံ.