2.6 ကပိလသုတ္တ (ဓမ္မစရိယသုတ္တ)
- ကပိလသုတ္တ (ဓမ္မစရိယသုတ္တ)
ဓမ္မစရိယံ ဗြဟ္မစရိယံ,
ဧတဒါဟု ဝသုတ္တမံ;
ပဗ္ဗဇိတောပိ စေ ဟောတိ,
အဂါရာ အနဂါရိယံ. (1)
သော စေ မုခရဇာတိကော,
ဝိဟေသာဘိရတော မဂေါ;
ဇီဝိတံ တဿ ပါပိယော,
ရဇံ ဝဍ္ဎေတိ အတ္တနော. (2)
ကလဟာဘိရတော ဘိက္ခု,
မောဟဓမ္မေန အာဝုတော;
အက္ခာတမ္ပိ န ဇာနာတိ,
ဓမ္မံ ဗုဒ္ဓေန ဒေသိတံ. (3)
ဝိဟေသံ ဘာဝိတတ္တာနံ,
အဝိဇ္ဇာယ ပုရက္ခတော;
သံကိလေသံ န ဇာနာတိ,
မဂ္ဂံ နိရယဂါမိနံ. (4)
ဝိနိပါတံ သမာပန္နော,
ဂဗ္ဘာ ဂဗ္ဘံ တမာ တမံ;
သ ဝေ တာဒိသကော ဘိက္ခု,
ပေစ္စ ဒုက္ခံ နိဂစ္ဆတိ. (5)
ဂူထကူပေါ ယထာ အဿ,
သမ္ပုဏ္ဏော ဂဏဝဿိကော;
ယော စ ဧဝရူပေါ အဿ,
ဒုဗ္ဗိသောဓော ဟိ သာင်္ဂဏော. (6)
ယံ ဧဝရူပံ ဇာနာထ,
ဘိက္ခဝေါ ဂေဟနိဿိတံ;
ပါပိစ္ဆံ ပါပသင်္ကပ္ပံ,
ပါပအာစာရဂေါစရံ. (7)
သဗ္ဗေ သမဂ္ဂါ ဟုတွာန,
အဘိနိဗ္ဗဇ္ဇိယာထ နံ;
ကာရဏ္ဍဝံ နိဒ္ဓမထ,
ကသမ္ဗုံ အပကဿထ. (8)
တတော ပလာပေ ဝါဟေထ,
အဿမဏေ သမဏမာနိနေ;
နိဒ္ဓမိတွာန ပါပိစ္ဆေ,
ပါပအာစာရဂေါစရေ. (9)
သုဒ္ဓါ သုဒ္ဓေဟိ သံဝါသံ,
ကပ္ပယဝှေါ ပတိဿတာ;
တတော သမဂ္ဂါ နိပကာ,
ဒုက္ခဿန္တံ ကရိဿထာတိ. (10)
ဓမ္မစရိယသုတ္တံ ဆဋ္ဌံ.