2.8 ဓမ္မ (နာဝါ) သုတ္တ
- ဓမ္မ (နာဝါ) သုတ္တ
ယသ္မာ ဟိ ဓမ္မံ ပုရိသော ဝိဇညာ,
ဣန္ဒံဝ နံ ဒေဝတာ ပူဇယေယျ;_
သော ပူဇိတော တသ္မိ ပသန္နစိတ္တော,
ဗဟုဿုတော ပါတုကရောတိ ဓမ္မံ. (1)
တဒဋ္ဌိကတွာန နိသမ္မ ဓီရော,
ဓမ္မာနုဓမ္မံ ပဋိပဇ္ဇမာနော;
ဝိညူ ဝိဘာဝီ နိပုဏော စ ဟောတိ,
ယော တာဒိသံ ဘဇတိ အပ္ပမတ္တော. (2)
ခုဒ္ဒဉ္စ ဗာလံ ဥပသေဝမာနော,
အနာဂတတ္ထဉ္စ ဥသူယကဉ္စ;
ဣဓေဝ ဓမ္မံ အဝိဘာဝယိတွာ,_
အဝိတိဏ္ဏကင်္ခေါ မရဏံ ဥပေတိ. (3)
ယထာ နရော အာပဂမောတရိတွာ,
မဟောဒကံ သလိလံ သီဃသောတံ;
သော ဝုယှမာနော အနုသောတဂါမီ,
ကိံ သော ပရေ သက္ခတိ တာရယေတုံ. (4)
တထေဝ ဓမ္မံ အဝိဘာဝယိတွာ,
ဗဟုဿုတာနံ အနိသာမယတ္ထံ;
သယံ အဇာနံ အဝိတိဏ္ဏကင်္ခေါ,
ကိံ သော ပရေ သက္ခတိ နိဇ္ဈပေတုံ. (5)
ယထာပိ နာဝံ ဒဠှမာရုဟိတွာ,
ဖိယေန ရိတ္တေန သမင်္ဂိဘူတော;
သော တာရယေ တတ္ထ ဗဟူပိ အညေ,
တတြူပယညူ ကုသလော မုတီမာ. (6)
ဧဝမ္ပိ ယော ဝေဒဂု ဘာဝိတတ္တော,
ဗဟုဿုတော ဟောတိ အဝေဓဓမ္မော;
သော ခေါ ပရေ နိဇ္ဈပယေ ပဇာနံ,
သောတာဝဓာနူပနိသူပပန္နေ. (7)
တသ္မာ ဟဝေ သပ္ပုရိသံ ဘဇေထ,
မေဓာဝိနဉ္စေဝ ဗဟုဿုတဉ္စ;
အညာယ အတ္ထံ ပဋိပဇ္ဇမာနော,
ဝိညာတဓမ္မော သ သုခံ လဘေထာတိ. (8)
နာဝါသုတ္တံ အဋ္ဌမံ.