2.9 ကိံသီလသုတ္တ
“ကိံသီလော ကိံသမာစာရော,
ကာနိ ကမ္မာနိ ဗြူဟယံ;
နရော သမ္မာ နိဝိဋ္ဌဿ,
ဥတ္တမတ္ထဉ္စ ပါပုဏေ”. (1)_
“ဝုဍ္ဎာပစာယီ အနုသူယကော သိယာ,
ကာလညူ စဿ ဂရူနံ ဒဿနာယ;
ဓမ္မိံ ကထံ ဧရယိတံ ခဏညူ,
သုဏေယျ သက္ကစ္စ သုဘာသိတာနိ. (2)
ကာလေန ဂစ္ဆေ ဂရူနံ သကာသံ,
ထမ္ဘံ နိရံကတွာ နိဝါတဝုတ္တိ;
အတ္ထံ ဓမ္မံ သံယမံ ဗြဟ္မစရိယံ,
အနုဿရေ စေဝ သမာစရေ စ. (3)
ဓမ္မာရာမော ဓမ္မရတော,
ဓမ္မေ ဌိတော ဓမ္မဝိနိစ္ဆယညူ;
နေဝါစရေ ဓမ္မသန္ဒောသဝါဒံ,
တစ္ဆေဟိ နီယေထ သုဘာသိတေဟိ. (4)
ဟဿံ ဇပ္ပံ ပရိဒေဝံ ပဒေါသံ,
မာယာကတံ ကုဟနံ ဂိဒ္ဓိ မာနံ;
သာရမ္ဘံ ကက္ကသံ ကသာဝဉ္စ မုစ္ဆံ,
ဟိတွာ စရေ ဝီတမဒေါ ဌိတတ္တော. (5)
ဝိညာတသာရာနိ သုဘာသိတာနိ,
သုတဉ္စ ဝိညာတသမာဓိသာရံ;
န တဿ ပညာ စ သုတဉ္စ ဝဍ္ဎတိ,
ယော သာဟသော ဟောတိ နရော ပမတ္တော. (6)
ဓမ္မေ စ ယေ အရိယပဝေဒိတေ ရတာ,
အနုတ္တရာ တေ ဝစသာ မနသာ ကမ္မုနာ စ;
တေ သန္တိသောရစ္စသမာဓိသဏ္ဌိတာ,
သုတဿ ပညာယ စ သာရမဇ္ဈဂူ”တိ. (7)
ကိံသီလသုတ္တံ နဝမံ.