3.1 ပဗ္ဗဇ္ဇာသုတ္တ
“ပဗ္ဗဇ္ဇံ ကိတ္တယိဿာမိ,
ယထာ ပဗ္ဗဇိ စက္ခုမာ;
ယထာ ဝီမံသမာနော သော,
ပဗ္ဗဇ္ဇံ သမရောစယိ. (1)
သမ္ဗာဓောယံ ဃရာဝါသော,
ရဇဿာယတနံ ဣတိ;
အဗ္ဘောကာသောဝ ပဗ္ဗဇ္ဇာ,
ဣတိ ဒိသွာန ပဗ္ဗဇိ. (2)_
ပဗ္ဗဇိတွာန ကာယေန,
ပါပကမ္မံ ဝိဝဇ္ဇယိ;
ဝစီဒုစ္စရိတံ ဟိတွာ,
အာဇီဝံ ပရိသောဓယိ. (3)
အဂမာ ရာဇဂဟံ ဗုဒ္ဓေါ,
မဂဓာနံ ဂိရိဗ္ဗဇံ;
ပိဏ္ဍာယ အဘိဟာရေသိ,
အာကိဏ္ဏဝရလက္ခဏော”. (4)
တမဒ္ဒသာ ဗိမ္ဗိသာရော,
ပါသာဒသ္မိံ ပတိဋ္ဌိတော;
ဒိသွာ လက္ခဏသမ္ပန္နံ,
ဣမမတ္ထံ အဘာသထ. (5)_
“ဣမံ ဘောန္တော နိသာမေထ,
အဘိရူပေါ ဗြဟာ သုစိ;
စရဏေန စ သမ္ပန္နော,
ယုဂမတ္တဉ္စ ပေက္ခတိ. (6)
ဩက္ခိတ္တစက္ခု သတိမာ,
နာယံ နီစကုလာမိဝ;
ရာဇဒူတာဘိဓာဝန္တု,
ကုဟိံ ဘိက္ခု ဂမိဿတိ”. (7)
တေ ပေသိတာ ရာဇဒူတာ,
ပိဋ္ဌိတော အနုဗန္ဓိသုံ;
ကုဟိံ ဂမိဿတိ ဘိက္ခု,
ကတ္ထ ဝါသော ဘဝိဿတိ. (8)
သပဒါနံ စရမာနော,
ဂုတ္တဒွါရော သုသံဝုတော;
ခိပ္ပံ ပတ္တံ အပူရေသိ,
သမ္ပဇာနော ပဋိဿတော. (9)
ပိဏ္ဍစာရံ စရိတွာန,
နိက္ခမ္မ နဂရာ မုနိ;
ပဏ္ဍဝံ အဘိဟာရေသိ,
ဧတ္ထ ဝါသော ဘဝိဿတိ. (10)
ဒိသွာန ဝါသူပဂတံ,
တယော ဒူတာ ဥပါဝိသုံ;
တေသု ဧကောဝ အာဂန္တွာ,
ရာဇိနော ပဋိဝေဒယိ. (11)
“ဧသ ဘိက္ခု မဟာရာဇ,
ပဏ္ဍဝဿ ပုရတ္ထတော;
နိသိန္နော ဗျဂ္ဃုသဘောဝ,
သီဟောဝ ဂိရိဂဗ္ဘရေ”. (12)
သုတွာန ဒူတဝစနံ,
ဘဒ္ဒယာနေန ခတ္တိယော;
တရမာနရူပေါ နိယျာသိ,
ယေန ပဏ္ဍဝပဗ္ဗတော. (13)
သ ယာနဘူမိံ ယာယိတွာ,
ယာနာ ဩရုယှ ခတ္တိယော;
ပတ္တိကော ဥပသင်္ကမ္မ,
အာသဇ္ဇ နံ ဥပါဝိသိ. (14)
နိသဇ္ဇ ရာဇာ သမ္မောဒိ,
ကထံ သာရဏီယံ တတော;
ကထံ သော ဝီတိသာရေတွာ,
ဣမမတ္ထံ အဘာသထ. (15)_
“ယုဝါ စ ဒဟရော စာသိ,
ပဌမုပ္ပတ္တိကော သုသု;
ဝဏ္ဏာရောဟေန သမ္ပန္နော,
ဇာတိမာ ဝိယ ခတ္တိယော. (16)
သောဘယန္တော အနီကဂ္ဂံ,
နာဂသင်္ဃပုရက္ခတော;
ဒဒါမိ ဘောဂေ ဘုဉ္ဇဿု,
ဇာတိံ အက္ခာဟိ ပုစ္ဆိတော”. (17)
“ဥဇုံ ဇနပဒေါ ရာဇ,
ဟိမဝန္တဿ ပဿတော;
ဓနဝိရိယေန သမ္ပန္နော,
ကောသလေသု နိကေတိနော. (18)
အာဒိစ္စာ နာမ ဂေါတ္တေန,
သာကိယာ နာမ ဇာတိယာ;
တမှာ ကုလာ ပဗ္ဗဇိတောမှိ,
န ကာမေ အဘိပတ္ထယံ. (19)
ကာမေသွာဒီနဝံ ဒိသွာ,
နေက္ခမ္မံ ဒဋ္ဌု ခေမတော;
ပဓာနာယ ဂမိဿာမိ,
ဧတ္ထ မေ ရဉ္ဇတီ မနော”တိ. (20)
ပဗ္ဗဇ္ဇာသုတ္တံ ပဌမံ.