3.11 နာလကသုတ္တ
အာနန္ဒဇာတေ တိဒသဂဏေ ပတီတေ,
သက္ကဉ္စ ဣန္ဒံ သုစိဝသနေ စ ဒေဝေ;
ဒုဿံ ဂဟေတွာ အတိရိဝ ထောမယန္တေ,
အသိတော ဣသိ အဒ္ဒသ ဒိဝါဝိဟာရေ. (1)
ဒိသွာန ဒေဝေ မုဒိတမနေ ဥဒဂ္ဂေ,
စိတ္တိံ ကရိတွာန ဣဒမဝေါစ တတ္ထ;
“ကိံ ဒေဝသင်္ဃော အတိရိဝ ကလျရူပေါ,
ဒုဿံ ဂဟေတွာ ရမယထ ကိံ ပဋိစ္စ. (2)
ယဒါပိ အာသီ အသုရေဟိ သင်္ဂမော,
ဇယော သုရာနံ အသုရာ ပရာဇိတာ;
တဒါပိ နေတာဒိသော လောမဟံသနော,
ကိမဗ္ဘုတံ ဒဋ္ဌု မရူ ပမောဒိတာ. (3)
သေဠေန္တိ ဂါယန္တိ စ ဝါဒယန္တိ စ,
ဘုဇာနိ ဖောဋေန္တိ စ နစ္စယန္တိ စ;
ပုစ္ဆာမိ ဝေါဟံ မေရုမုဒ္ဓဝါသိနေ,
ဓုနာထ မေ သံသယံ ခိပ္ပ မာရိသာ”. (4)
“သော ဗောဓိသတ္တော ရတနဝရော အတုလျော,
မနုဿလောကေ ဟိတသုခတ္ထာယ ဇာတော;
သကျာန ဂါမေ ဇနပဒေ လုမ္ဗိနေယျေ,
တေနမှ တုဋ္ဌာ အတိရိဝ ကလျရူပါ. (5)
သော သဗ္ဗသတ္တုတ္တမော အဂ္ဂပုဂ္ဂလော,
နရာသဘော သဗ္ဗပဇာနမုတ္တမော;
ဝတ္တေဿတိ စက္ကမိသိဝှယေ ဝနေ,
နဒံဝ သီဟော ဗလဝါ မိဂါဘိဘူ”. (6)
တံ သဒ္ဒံ သုတွာ တုရိတမဝသရီ သော,
သုဒ္ဓေါဒနဿ တဒ ဘဝနံ ဥပါဝိသိ;
နိသဇ္ဇ တတ္ထ ဣဒမဝေါစာသိ သကျေ,
“ကုဟိံ ကုမာရော အဟမပိ ဒဋ္ဌုကာမော”. (7)
တတော ကုမာရံ ဇလိတမိဝ သုဝဏ္ဏံ,
ဥက္ကာမုခေဝ သုကုသလသမ္ပဟဋ္ဌံ;_
ဒဒ္ဒလ္လမာနံ သိရိယာ အနောမဝဏ္ဏံ,
ဒဿေသု ပုတ္တံ အသိတဝှယဿ သကျာ. (8)
ဒိသွာ ကုမာရံ သိခိမိဝ ပဇ္ဇလန္တံ,
တာရာသဘံဝ နဘသိဂမံ ဝိသုဒ္ဓံ;
သုရိယံ တပန္တံ သရဒရိဝဗ္ဘမုတ္တံ,
အာနန္ဒဇာတော ဝိပုလမလတ္ထ ပီတိံ. (9)
အနေကသာခဉ္စ သဟဿမဏ္ဍလံ,
ဆတ္တံ မရူ ဓာရယုမန္တလိက္ခေ;
သုဝဏ္ဏဒဏ္ဍာ ဝီတိပတန္တိ စာမရာ,
န ဒိဿရေ စာမရဆတ္တဂါဟကာ. (10)
ဒိသွာ ဇဋီ ကဏှသိရိဝှယော ဣသိ,
သုဝဏ္ဏနိက္ခံ ဝိယ ပဏ္ဍုကမ္ဗလေ;
သေတဉ္စ ဆတ္တံ ဓရိယန္တ မုဒ္ဓနိ,
ဥဒဂ္ဂစိတ္တော သုမနော ပဋိဂ္ဂဟေ. (11)_
ပဋိဂ္ဂဟေတွာ ပန သကျပုင်္ဂဝံ,
ဇိဂီသကော လက္ခဏမန္တပါရဂူ;
ပသန္နစိတ္တော ဂိရမဗ္ဘုဒီရယိ,
“အနုတ္တရာယံ ဒွိပဒါနမုတ္တမော”. (12)
အထတ္တနော ဂမနမနုဿရန္တော,
အကလျရူပေါ ဂဠယတိ အဿုကာနိ;
ဒိသွာန သကျာ ဣသိမဝေါစုံ ရုဒန္တံ,
“နော စေ ကုမာရေ ဘဝိဿတိ အန္တရာယော”. (13)
ဒိသွာန သကျေ ဣသိမဝေါစ အကလျေ,
“နာဟံ ကုမာရေ အဟိတမနုဿရာမိ;
န စာပိမဿ ဘဝိဿတိ အန္တရာယော,
န ဩရကာယံ အဓိမာနသာ ဘဝါထ. (14)
သမ္ဗောဓိယဂ္ဂံ ဖုသိဿတာယံ ကုမာရော,
သော ဓမ္မစက္ကံ ပရမဝိသုဒ္ဓဒဿီ;
ဝတ္တေဿတာယံ ဗဟုဇနဟိတာနုကမ္ပီ,
ဝိတ္ထာရိကဿ ဘဝိဿတိ ဗြဟ္မစရိယံ. (15)
မမဉ္စ အာယု န စိရမိဓာဝသေသော,
အထန္တရာ မေ ဘဝိဿတိ ကာလကိရိယာ;
သောဟံ န သောဿံ အသမဓုရဿ ဓမ္မံ,
တေနမှိ အဋ္ဋော ဗျသနင်္ဂတော အဃာဝီ”. (16)
သော သာကိယာနံ ဝိပုလံ ဇနေတွာ ပီတိံ,
အန္တေပုရမှာ နိဂ္ဂမာ ဗြဟ္မစာရီ;
သော ဘာဂိနေယျံ သယံ အနုကမ္ပမာနော,
သမာဒပေသိ အသမဓုရဿ ဓမ္မေ. (17)
“ဗုဒ္ဓေါတိ ဃောသံ ယဒ ပရတော သုဏာသိ,
သမ္ဗောဓိပတ္တော ဝိဝရတိ ဓမ္မမဂ္ဂံ;
ဂန္တွာန တတ္ထ သမယံ ပရိပုစ္ဆမာနော,
စရဿု တသ္မိံ ဘဂဝတိ ဗြဟ္မစရိယံ”. (18)
တေနာနုသိဋ္ဌော ဟိတမနေန တာဒိနာ,
အနာဂတေ ပရမဝိသုဒ္ဓဒဿိနာ;
သော နာလကော ဥပစိတပုညသဉ္စယော,
ဇိနံ ပတိက္ခံ ပရိဝသိ ရက္ခိတိန္ဒြိယော. (19)
သုတွာန ဃောသံ ဇိနဝရစက္ကဝတ္တနေ,
ဂန္တွာန ဒိသွာ ဣသိနိသဘံ ပသန္နော;
မောနေယျသေဋ္ဌံ မုနိပဝရံ အပုစ္ဆိ,
သမာဂတေ အသိတာဝှယဿ သာသနေတိ. (20)
ဝတ္ထုဂါထာ နိဋ္ဌိတာ.
“အညာတမေတံ ဝစနံ,
အသိတဿ ယထာတထံ;
တံ တံ ဂေါတမ ပုစ္ဆာမိ,
သဗ္ဗဓမ္မာန ပါရဂုံ. (21)
အနဂါရိယုပေတဿ,
ဘိက္ခာစရိယံ ဇိဂီသတော;
မုနိ ပဗြူဟိ မေ ပုဋ္ဌော,
မောနေယျံ ဥတ္တမံ ပဒံ”. (22)
“မောနေယျံ တေ ဥပညိဿံ, (ဣတိ ဘဂဝါ)
ဒုက္ကရံ ဒုရဘိသမ္ဘဝံ;
ဟန္ဒ တေ နံ ပဝက္ခာမိ,
သန္ထမ္ဘဿု ဒဠှော ဘဝ. (23)
သမာနဘာဂံ ကုဗ္ဗေထ,
ဂါမေ အက္ကုဋ္ဌဝန္ဒိတံ;
မနောပဒေါသံ ရက္ခေယျ,
သန္တော အနုဏ္ဏတော စရေ. (24)
ဥစ္စာဝစာ နိစ္ဆရန္တိ,_
ဒါယေ အဂ္ဂိသိခူပမာ;
နာရိယော မုနိံ ပလောဘေန္တိ,
တာ သု တံ မာ ပလောဘယုံ. (25)
ဝိရတော မေထုနာ ဓမ္မာ,
ဟိတွာ ကာမေ ပရောပရေ;
အဝိရုဒ္ဓေါ အသာရတ္တော,
ပါဏေသု တသထာဝရေ. (26)
ယထာ အဟံ တထာ ဧတေ,
ယထာ ဧတေ တထာ အဟံ;
အတ္တာနံ ဥပမံ ကတွာ,
န ဟနေယျ န ဃာတယေ. (27)
ဟိတွာ ဣစ္ဆဉ္စ လောဘဉ္စ,
ယတ္ထ သတ္တော ပုထုဇ္ဇနော;
စက္ခုမာ ပဋိပဇ္ဇေယျ,
တရေယျ နရကံ ဣမံ. (28)
ဦနူဒရော မိတာဟာရော,
အပ္ပိစ္ဆဿ အလောလုပေါ;
သဒါ ဣစ္ဆာယ နိစ္ဆာတော,
အနိစ္ဆော ဟောတိ နိဗ္ဗုတော. (29)
သ ပိဏ္ဍစာရံ စရိတွာ,
ဝနန္တမဘိဟာရယေ;
ဥပဋ္ဌိတော ရုက္ခမူလသ္မိံ,_
အာသနူပဂတော မုနိ. (30)
သ ဈာနပသုတော ဓီရော,
ဝနန္တေ ရမိတော သိယာ;
ဈာယေထ ရုက္ခမူလသ္မိံ,
အတ္တာနမဘိတောသယံ. (31)
တတော ရတျာ ဝိဝသာနေ,
ဂါမန္တမဘိဟာရယေ;
အဝှါနံ နာဘိနန္ဒေယျ,
အဘိဟာရဉ္စ ဂါမတော. (32)
န မုနီ ဂါမမာဂမ္မ,
ကုလေသု သဟသာ စရေ;
ဃာသေသနံ ဆိန္နကထော,
န ဝါစံ ပယုတံ ဘဏေ. (33)
အလတ္ထံ ယဒိဒံ သာဓု,
နာလတ္ထံ ကုသလံ ဣတိ;
ဥဘယေနေဝ သော တာဒီ,_
ရုက္ခံဝုပနိဝတ္တတိ. (34)
သ ပတ္တပါဏိ ဝိစရန္တော,
အမူဂေါ မူဂသမ္မတော;
အပ္ပံ ဒါနံ န ဟီဠေယျ,
ဒါတာရံ နာဝဇာနိယာ. (35)
ဥစ္စာဝစာ ဟိ ပဋိပဒါ,_
သမဏေန ပကာသိတာ;
န ပါရံ ဒိဂုဏံ ယန္တိ,
နယိဒံ ဧကဂုဏံ မုတံ. (36)
ယဿ စ ဝိသတာ နတ္ထိ,
ဆိန္နသောတဿ ဘိက္ခုနော;
ကိစ္စာကိစ္စပ္ပဟီနဿ,
ပရိဠာဟော န ဝိဇ္ဇတိ. (37)
မောနေယျံ တေ ဥပညိဿံ,
ခုရဓာရူပမော ဘဝေ;
ဇိဝှါယ တာလုမာဟစ္စ,
ဥဒရေ သညတော သိယာ. (38)_
အလီနစိတ္တော စ သိယာ,
န စာပိ ဗဟု စိန္တယေ;
နိရာမဂန္ဓော အသိတော,
ဗြဟ္မစရိယပရာယဏော. (39)
ဧကာသနဿ သိက္ခေထ,
သမဏူပါသနဿ စ;
ဧကတ္တံ မောနမက္ခာတံ,
ဧကော စေ အဘိရမိဿသိ;
အထ ဘာဟိသိ ဒသဒိသာ. (40)
သုတွာ ဓီရာနံ နိဃောသံ,
ဈာယီနံ ကာမစာဂိနံ;
တတော ဟိရိဉ္စ သဒ္ဓဉ္စ,
ဘိယျော ကုဗ္ဗေထ မာမကော. (41)
တံ နဒီဟိ ဝိဇာနာထ,
သောဗ္ဘေသု ပဒရေသု စ;
သဏန္တာ ယန္တိ ကုသောဗ္ဘာ,
တုဏှီ ယန္တိ မဟောဒဓီ. (42)
ယဒူနကံ တံ သဏတိ,
ယံ ပူရံ သန္တမေဝ တံ;
အဍ္ဎကုမ္ဘူပမော ဗာလော,
ရဟဒေါ ပူရောဝ ပဏ္ဍိတော. (43)
ယံ သမဏော ဗဟုံ ဘာသတိ,
ဥပေတံ အတ္ထသဉှိတံ;_
ဇာနံ သော ဓမ္မံ ဒေသေတိ,
ဇာနံ သော ဗဟု ဘာသတိ. (44)
ယော စ ဇာနံ သံယတတ္တော,
ဇာနံ န ဗဟု ဘာသတိ;
သ မုနီ မောနမရဟတိ,
သ မုနီ မောနမဇ္ဈဂါ”တိ. (45)
နာလကသုတ္တံ ဧကာဒသမံ.