3.2 ပဓာနသုတ္တ
“တံ မံ ပဓာနပဟိတတ္တံ,
နဒိံ နေရဉ္ဇရံ ပတိ;
ဝိပရက္ကမ္မ ဈာယန္တံ,
ယောဂက္ခေမဿ ပတ္တိယာ. (1)
နမုစီ ကရုဏံ ဝါစံ,
ဘာသမာနော ဥပါဂမိ;
‘ကိသော တွမသိ ဒုဗ္ဗဏ္ဏော,
သန္တိကေ မရဏံ တဝ. (2)
သဟဿဘာဂေါ မရဏဿ,
ဧကံသော တဝ ဇီဝိတံ;
ဇီဝ ဘော ဇီဝိတံ သေယျော,
ဇီဝံ ပုညာနိ ကာဟသိ. (3)
စရတော စ တေ ဗြဟ္မစရိယံ,
အဂ္ဂိဟုတ္တဉ္စ ဇူဟတော;
ပဟူတံ စီယတေ ပုညံ,
ကိံ ပဓာနေန ကာဟသိ. (4)
ဒုဂ္ဂေါ မဂ္ဂေါ ပဓာနာယ,
ဒုက္ကရော ဒုရဘိသမ္ဘဝေါ’”;
ဣမာ ဂါထာ ဘဏံ မာရော,_
အဋ္ဌာ ဗုဒ္ဓဿ သန္တိကေ. (5)
တံ တထာဝါဒိနံ မာရံ,
ဘဂဝါ ဧတဒဗြဝိ;
“ပမတ္တဗန္ဓု ပါပိမ,
ယေနတ္ထေန ဣဓာဂတော. (6)
အဏုမတ္တောပိ ပုညေန,
အတ္ထော မယှံ န ဝိဇ္ဇတိ;
ယေသဉ္စ အတ္ထော ပုညေန,
တေ မာရော ဝတ္တုမရဟတိ. (7)
အတ္ထိ သဒ္ဓါ တထာ ဝိရိယံ,
ပညာ စ မမ ဝိဇ္ဇတိ;
ဧဝံ မံ ပဟိတတ္တမ္ပိ,
ကိံ ဇီဝမနုပုစ္ဆသိ. (8)
နဒီနမပိ သောတာနိ,
အယံ ဝါတော ဝိသောသယေ;
ကိဉ္စ မေ ပဟိတတ္တဿ,
လောဟိတံ နုပသုဿယေ. (9)
လောဟိတေ သုဿမာနမှိ,
ပိတ္တံ သေမှဉ္စ သုဿတိ;
မံသေသု ခီယမာနေသု,
ဘိယျော စိတ္တံ ပသီဒတိ;
ဘိယျော သတိ စ ပညာ စ,
သမာဓိ မမ တိဋ္ဌတိ. (10)
တဿ မေဝံ ဝိဟရတော,
ပတ္တဿုတ္တမဝေဒနံ;
ကာမေသု နာပေက္ခတေ စိတ္တံ,
ပဿ သတ္တဿ သုဒ္ဓတံ. (11)
ကာမာ တေ ပဌမာ သေနာ,
ဒုတိယာ အရတိ ဝုစ္စတိ;
တတိယာ ခုပ္ပိပါသာ တေ,
စတုတ္ထီ တဏှာ ပဝုစ္စတိ. (12)
ပဉ္စမံ ထိနမိဒ္ဓံ တေ,
ဆဋ္ဌာ ဘီရူ ပဝုစ္စတိ;
သတ္တမီ ဝိစိကိစ္ဆာ တေ,
မက္ခော ထမ္ဘော တေ အဋ္ဌမော. (13)
လာဘော သိလောကော သက္ကာရော,
မိစ္ဆာလဒ္ဓေါ စ ယော ယသော;
ယော စတ္တာနံ သမုက္ကံသေ,
ပရေ စ အဝဇာနတိ. (14)
ဧသာ နမုစိ တေ သေနာ,
ကဏှဿာဘိပ္ပဟာရိနီ;
န နံ အသူရော ဇိနာတိ,
ဇေတွာ စ လဘတေ သုခံ. (15)
ဧသ မုဉ္ဇံ ပရိဟရေ,
ဓိရတ္ထု မမ ဇီဝိတံ;
သင်္ဂါမေ မေ မတံ သေယျော,
ယဉ္စေ ဇီဝေ ပရာဇိတော. (16)
ပဂါဠှေတ္ထ န ဒိဿန္တိ,
ဧကေ သမဏဗြာဟ္မဏာ;
တဉ္စ မဂ္ဂံ န ဇာနန္တိ,
ယေန ဂစ္ဆန္တိ သုဗ္ဗတာ. (17)
သမန္တာ ဓဇိနိံ ဒိသွာ,
ယုတ္တံ မာရံ သဝါဟနံ;
ယုဒ္ဓါယ ပစ္စုဂ္ဂစ္ဆာမိ,
မာ မံ ဌာနာ အစာဝယိ. (18)
ယံ တေ တံ နပ္ပသဟတိ,
သေနံ လောကော သဒေဝကော;
တံ တေ ပညာယ ဘေစ္ဆာမိ,
အာမံ ပတ္တံဝ အသ္မနာ. (19)
ဝသီကရိတွာ သင်္ကပ္ပံ,
သတိဉ္စ သူပတိဋ္ဌိတံ;
ရဋ္ဌာ ရဋ္ဌံ ဝိစရိဿံ,
သာဝကေ ဝိနယံ ပုထူ. (20)
တေ အပ္ပမတ္တာ ပဟိတတ္တာ,
မမ သာသနကာရကာ;
အကာမဿ တေ ဂမိဿန္တိ,
ယတ္ထ ဂန္တွာ န သောစရေ”. (21)
“သတ္တ ဝဿာနိ ဘဂဝန္တံ,
အနုဗန္ဓိံ ပဒါပဒံ;
ဩတာရံ နာဓိဂစ္ဆိဿံ,
သမ္ဗုဒ္ဓဿ သတီမတော. (22)
မေဒဝဏ္ဏံဝ ပါသာဏံ,
ဝါယသော အနုပရိယဂါ;
အပေတ္ထ မုဒုံ ဝိန္ဒေမ,
အပိ အဿာဒနာ သိယာ. (23)
အလဒ္ဓါ တတ္ထ အဿာဒံ,
ဝါယသေတ္တော အပက္ကမိ;
ကာကောဝ သေလမာသဇ္ဇ,
နိဗ္ဗိဇ္ဇာပေမ ဂေါတမံ”. (24)
တဿ သောကပရေတဿ,
ဝီဏာ ကစ္ဆာ အဘဿထ;
တတော သော ဒုမ္မနော ယက္ခော,
တတ္ထေဝန္တရဓာယထာတိ. (25)
ပဓာနသုတ္တံ ဒုတိယံ.