3.4 ပူရဠာသ (သုန္ဒရိကဘာရဒွါဇ) သုတ္တ
- ပူရဠာသ (သုန္ဒရိကဘာရဒွါဇ) သုတ္တ
ဧဝံ မေ သုတံ— ဧကံ သမယံ ဘဂဝါ ကောသလေသု ဝိဟရတိ သုန္ဒရိကာယ နဒိယာ တီရေ. တေန ခေါ ပန သမယေန သုန္ဒရိကဘာရဒွါဇော ဗြာဟ္မဏော သုန္ဒရိကာယ နဒိယာ တီရေ အဂ္ဂိံ ဇုဟတိ, အဂ္ဂိဟုတ္တံ ပရိစရတိ. အထ ခေါ သုန္ဒရိကဘာရဒွါဇော ဗြာဟ္မဏော အဂ္ဂိံ ဇုဟိတွာ အဂ္ဂိဟုတ္တံ ပရိစရိတွာ ဥဋ္ဌာယာသနာ သမန္တာ စတုဒ္ဒိသာ အနုဝိလောကေသိ— “ကော နု ခေါ ဣမံ ဟဗျသေသံ ဘုဉ္ဇေယျာ”တိ? အဒ္ဒသာ ခေါ သုန္ဒရိကဘာရဒွါဇော ဗြာဟ္မဏော ဘဂဝန္တံ အဝိဒူရေ အညတရသ္မိံ ရုက္ခမူလေ သသီသံ ပါရုတံ နိသိန္နံ; ဒိသွာန ဝါမေန ဟတ္ထေန ဟဗျသေသံ ဂဟေတွာ ဒက္ခိဏေန ဟတ္ထေန ကမဏ္ဍလုံ ဂဟေတွာ ယေန ဘဂဝါ တေနုပသင်္ကမိ.
အထ ခေါ ဘဂဝါ သုန္ဒရိကဘာရဒွါဇဿ ဗြာဟ္မဏဿ ပဒသဒ္ဒေန သီသံ ဝိဝရိ. အထ ခေါ သုန္ဒရိကဘာရဒွါဇော ဗြာဟ္မဏော— “မုဏ္ဍော အယံ ဘဝံ, မုဏ္ဍကော အယံ ဘဝန်”တိ တတောဝ ပုန နိဝတ္တိတုကာမော အဟောသိ. အထ ခေါ သုန္ဒရိကဘာရဒွါဇဿ ဗြာဟ္မဏဿ ဧတဒဟောသိ— “မုဏ္ဍာပိ ဟိ ဣဓေကစ္စေ ဗြာဟ္မဏာ ဘဝန္တိ, ယန္နူနာဟံ ဥပသင်္ကမိတွာ ဇာတိံ ပုစ္ဆေယျန်”တိ. အထ ခေါ သုန္ဒရိကဘာရဒွါဇော ဗြာဟ္မဏော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ ဧတဒဝေါစ— “ကိံဇစ္စော ဘဝန်”တိ?
အထ ခေါ ဘဂဝါ သုန္ဒရိကဘာရဒွါဇံ ဗြာဟ္မဏံ ဂါထာဟိ အဇ္ဈဘာသိ—
“န ဗြာဟ္မဏော နောမှိ န ရာဇပုတ္တော,
န ဝေဿာယနော ဥဒ ကောစိ နောမှိ;
ဂေါတ္တံ ပရိညာယ ပုထုဇ္ဇနာနံ,
အကိဉ္စနော မန္တ စရာမိ လောကေ. (1)
သင်္ဃာဋိဝါသီ အဂဟော စရာမိ,
နိဝုတ္တကေသော အဘိနိဗ္ဗုတတ္တော;
အလိပ္ပမာနော ဣဓ မာဏဝေဟိ,
အကလ္လံ မံ ဗြာဟ္မဏ ပုစ္ဆသိ ဂေါတ္တပဉှံ”. (2)
“ပုစ္ဆန္တိ ဝေ ဘော ဗြာဟ္မဏာ ဗြာဟ္မဏေဘိ,
သဟ ဗြာဟ္မဏော နော ဘဝန်”တိ. (3)
“ဗြာဟ္မဏော ဟိ စေ တွံ ဗြူသိ,
မဉ္စ ဗြူသိ အဗြာဟ္မဏံ;
တံ တံ သာဝိတ္တိံ ပုစ္ဆာမိ,
တိပဒံ စတုဝီသတက္ခရံ”. (4)
“ကိံ နိဿိတာ ဣသယော မနုဇာ,
ခတ္တိယာ ဗြာဟ္မဏာ ဒေဝတာနံ;
ယညမကပ္ပယိံသု ပုထူ ဣဓ လောကေ”. (5)
“ယဒန္တဂူ ဝေဒဂူ ယညကာလေ,
ယဿာဟုတိံ လဘေ တဿိဇ္ဈေတိ ဗြူမိ”. (6)
“အဒ္ဓါ ဟိ တဿ ဟုတမိဇ္ဈေ, (ဣတိ ဗြာဟ္မဏော)
ယံ တာဒိသံ ဝေဒဂုမဒ္ဒသာမ;
တုမှာဒိသာနဉှိ အဒဿနေန,
အညော ဇနော ဘုဉ္ဇတိ ပူရဠာသံ”. (7)
“တသ္မာတိဟ တွံ ဗြာဟ္မဏ အတ္ထေန,
အတ္ထိကော ဥပသင်္ကမ္မ ပုစ္ဆ;
သန္တံ ဝိဓူမံ အနီဃံ နိရာသံ,
အပ္ပေဝိဓ အဘိဝိန္ဒေ သုမေဓံ”. (8)
“ယညေ ရတောဟံ ဘော ဂေါတမ,
ယညံ ယိဋ္ဌုကာမော နာဟံ ပဇာနာမိ;
အနုသာသတု မံ ဘဝံ,
ယတ္ထ ဟုတံ ဣဇ္ဈတေ ဗြူဟိ မေ တံ”. (9)
“တေန ဟိ တွံ, ဗြာဟ္မဏ, ဩဒဟဿု သောတံ; ဓမ္မံ တေ ဒေသေဿာမိ—
မာ ဇာတိံ ပုစ္ဆီ စရဏဉ္စ ပုစ္ဆ,
ကဋ္ဌာ ဟဝေ ဇာယတိ ဇာတဝေဒေါ;
နီစာကုလီနောပိ မုနီ ဓိတီမာ,
အာဇာနိယော ဟောတိ ဟိရီနိသေဓော. (10)
သစ္စေန ဒန္တော ဒမသာ ဥပေတော,
ဝေဒန္တဂူ ဝူသိတဗြဟ္မစရိယော;
ကာလေန တမှိ ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (11)
ယေ ကာမေ ဟိတွာ အဂဟာ စရန္တိ,
သုသညတတ္တာ တသရံဝ ဥဇ္ဇုံ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (12)
ယေ ဝီတရာဂါ သုသမာဟိတိန္ဒြိယာ,
စန္ဒောဝ ရာဟုဂ္ဂဟဏာ ပမုတ္တာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (13)
အသဇ္ဇမာနာ ဝိစရန္တိ လောကေ,
သဒါ သတာ ဟိတွာ မမာယိတာနိ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (14)
ယော ကာမေ ဟိတွာ အဘိဘုယျစာရီ,
ယော ဝေဒိ ဇာတီမရဏဿ အန္တံ;
ပရိနိဗ္ဗုတော ဥဒကရဟဒေါဝ သီတော,
တထာဂတော အရဟတိ ပူရဠာသံ. (15)
သမော သမေဟိ ဝိသမေဟိ ဒူရေ,
တထာဂတော ဟောတိ အနန္တပညော;
အနူပလိတ္တော ဣဓ ဝါ ဟုရံ ဝါ,
တထာဂတော အရဟတိ ပူရဠာသံ. (16)
ယမှိ န မာယာ ဝသတိ န မာနော,
ယော ဝီတလောဘော အမမော နိရာသော;
ပဏုန္နကောဓော အဘိနိဗ္ဗုတတ္တော,
ယော ဗြာဟ္မဏော သောကမလံ အဟာသိ;
တထာဂတော အရဟတိ ပူရဠာသံ. (17)
နိဝေသနံ ယော မနသော အဟာသိ,
ပရိဂ္ဂဟာ ယဿ န သန္တိ ကေစိ;
အနုပါဒိယာနော ဣဓ ဝါ ဟုရံ ဝါ,
တထာဂတော အရဟတိ ပူရဠာသံ. (18)
သမာဟိတော ယော ဥဒတာရိ ဩဃံ,
ဓမ္မံ စညာသိ ပရမာယ ဒိဋ္ဌိယာ;
ခီဏာသဝေါ အန္တိမဒေဟဓာရီ,
တထာဂတော အရဟတိ ပူရဠာသံ. (19)
ဘဝါသဝါ ယဿ ဝစီ ခရာ စ,
ဝိဓူပိတာ အတ္ထဂတာ န သန္တိ;
သ ဝေဒဂူ သဗ္ဗဓိ ဝိပ္ပမုတ္တော,
တထာဂတော အရဟတိ ပူရဠာသံ. (20)
သင်္ဂါတိဂေါ ယဿ န သန္တိ သင်္ဂါ,
ယော မာနသတ္တေသု အမာနသတ္တော;
ဒုက္ခံ ပရိညာယ သခေတ္တဝတ္ထုံ,
တထာဂတော အရဟတိ ပူရဠာသံ. (21)
အာသံ အနိဿာယ ဝိဝေကဒဿီ,
ပရဝေဒိယံ ဒိဋ္ဌိမုပါတိဝတ္တော;
အာရမ္မဏာ ယဿ န သန္တိ ကေစိ,
တထာဂတော အရဟတိ ပူရဠာသံ. (22)
ပရောပရာ ယဿ သမေစ္စ ဓမ္မာ,
ဝိဓူပိတာ အတ္ထဂတာ န သန္တိ;
သန္တော ဥပါဒါနခယေ ဝိမုတ္တော,
တထာဂတော အရဟတိ ပူရဠာသံ. (23)
သံယောဇနံ ဇာတိခယန္တဒဿီ,
ယောပါနုဒိ ရာဂပထံ အသေသံ;
သုဒ္ဓေါ နိဒေါသော ဝိမလော အကာစော,
တထာဂတော အရဟတိ ပူရဠာသံ. (24)
ယော အတ္တနော အတ္တာနံ နာနုပဿတိ,
သမာဟိတော ဥဇ္ဇုဂတော ဌိတတ္တော;
သ ဝေ အနေဇော အခိလော အကင်္ခေါ,
တထာဂတော အရဟတိ ပူရဠာသံ. (25)
မောဟန္တရာ ယဿ န သန္တိ ကေစိ,
သဗ္ဗေသု ဓမ္မေသု စ ဉာဏဒဿီ;
သရီရဉ္စ အန္တိမံ ဓာရေတိ,
ပတ္တော စ သမ္ဗောဓိမနုတ္တရံ သိဝံ;
ဧတ္တာဝတာ ယက္ခဿ သုဒ္ဓိ,
တထာဂတော အရဟတိ ပူရဠာသံ”. (26)
“ဟုတဉ္စ မယှံ ဟုတမတ္ထု သစ္စံ,
ယံ တာဒိသံ ဝေဒဂုနံ အလတ္ထံ;
ဗြဟ္မာ ဟိ သက္ခိ ပဋိဂဏှာတု မေ ဘဂဝါ,
ဘုဉ္ဇတု မေ ဘဂဝါ ပူရဠာသံ”. (27)
“ဂါထာဘိဂီတံ မေ အဘောဇနေယျံ,
သမ္ပဿတံ ဗြာဟ္မဏ နေသ ဓမ္မော;
ဂါထာဘိဂီတံ ပနုဒန္တိ ဗုဒ္ဓါ,
ဓမ္မေ သတီ ဗြာဟ္မဏ ဝုတ္တိရေသာ. (28)
အညေန စ ကေဝလိနံ မဟေသိံ,
ခီဏာသဝံ ကုက္ကုစ္စဝူပသန္တံ;
အန္နေန ပါနေန ဥပဋ္ဌဟဿု,
ခေတ္တဉှိ တံ ပုညပေက္ခဿ ဟောတိ”. (29)
“သာဓာဟံ ဘဂဝါ တထာ ဝိဇညံ,
ယော ဒက္ခိဏံ ဘုဉ္ဇေယျ မာဒိသဿ;
ယံ ယညကာလေ ပရိယေသမာနော,
ပပ္ပုယျ တဝ သာသနံ”. (30)
“သာရမ္ဘာ ယဿ ဝိဂတာ,
စိတ္တံ ယဿ အနာဝိလံ;
ဝိပ္ပမုတ္တော စ ကာမေဟိ,
ထိနံ ယဿ ပနူဒိတံ. (31)
သီမန္တာနံ ဝိနေတာရံ,
ဇာတိမရဏကောဝိဒံ;
မုနိံ မောနေယျသမ္ပန္နံ,
တာဒိသံ ယညမာဂတံ. (32)
ဘကုဋိံ ဝိနယိတွာန,
ပဉ္ဇလိကာ နမဿထ;
ပူဇေထ အန္နပါနေန,
ဧဝံ ဣဇ္ဈန္တိ ဒက္ခိဏာ”. (33)
“ဗုဒ္ဓေါ ဘဝံ အရဟတိ ပူရဠာသံ,
ပုညခေတ္တမနုတ္တရံ;
အာယာဂေါ သဗ္ဗလောကဿ,
ဘောတော ဒိန္နံ မဟပ္ဖလန်”တိ. (34)
အထ ခေါ သုန္ဒရိကဘာရဒွါဇော ဗြာဟ္မဏော ဘဂဝန္တံ ဧတဒဝေါစ— “အဘိက္ကန္တံ, ဘော ဂေါတမ, အဘိက္ကန္တံ, ဘော ဂေါတမ. သေယျထာပိ, ဘော ဂေါတမ, နိက္ကုဇ္ဇိတံ ဝါ ဥက္ကုဇ္ဇေယျ, ပဋိစ္ဆန္နံ ဝါ ဝိဝရေယျ, မူဠှဿ ဝါ မဂ္ဂံ အာစိက္ခေယျ, အန္ဓကာရေ ဝါ တေလပဇ္ဇောတံ ဓာရေယျ— ‘စက္ခုမန္တော ရူပါနိ ဒက္ခန္တီ’တိ; ဧဝမေဝံ ဘောတာ ဂေါတမေန အနေကပရိယာယေန ဓမ္မော ပကာသိတော. ဧသာဟံ ဘဝန္တံ ဂေါတမံ သရဏံ ဂစ္ဆာမိ ဓမ္မဉ္စ ဘိက္ခုသံဃဉ္စ. လဘေယျာဟံ ဘောတော ဂေါတမဿ သန္တိကေ ပဗ္ဗဇ္ဇံ, လဘေယျံ ဥပသမ္ပဒန်”တိ. အလတ္ထ ခေါ သုန္ဒရိကဘာရဒွါဇော ဗြာဟ္မဏော …ပေ… အရဟတံ အဟောသီတိ.
သုန္ဒရိကဘာရဒွါဇသုတ္တံ စတုတ္ထံ.