3.5 မာဃသုတ္တ
ဧဝံ မေ သုတံ— ဧကံ သမယံ ဘဂဝါ ရာဇဂဟေ ဝိဟရတိ ဂိဇ္ဈကူဋေ ပဗ္ဗတေ. အထ ခေါ မာဃော မာဏဝေါ ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝတာ သဒ္ဓိံ သမ္မောဒိ. သမ္မောဒနီယံ ကထံ သာရဏီယံ ဝီတိသာရေတွာ ဧကမန္တံ နိသီဒိ. ဧကမန္တံ နိသိန္နော ခေါ မာဃော မာဏဝေါ ဘဂဝန္တံ ဧတဒဝေါစ—
“အဟဉှိ, ဘော ဂေါတမ, ဒါယကော ဒါနပတိ ဝဒညူ ယာစယောဂေါ; ဓမ္မေန ဘောဂေ ပရိယေသာမိ; ဓမ္မေန ဘောဂေ ပရိယေသိတွာ ဓမ္မလဒ္ဓေဟိ ဘောဂေဟိ ဓမ္မာဓိဂတေဟိ ဧကဿပိ ဒဒါမိ ဒွိန္နမ္ပိ တိဏ္ဏမ္ပိ စတုန္နမ္ပိ ပဉ္စန္နမ္ပိ ဆန္နမ္ပိ သတ္တန္နမ္ပိ အဋ္ဌန္နမ္ပိ နဝန္နမ္ပိ ဒသန္နမ္ပိ ဒဒါမိ, ဝီသာယပိ တိံသာယပိ စတ္တာလီသာယပိ ပညာသာယပိ ဒဒါမိ, သတဿပိ ဒဒါမိ, ဘိယျောပိ ဒဒါမိ. ကစ္စာဟံ, ဘော ဂေါတမ, ဧဝံ ဒဒန္တော ဧဝံ ယဇန္တော ဗဟုံ ပုညံ ပသဝါမီ”တိ?
“တဂ္ဃ တွံ, မာဏဝ, ဧဝံ ဒဒန္တော ဧဝံ ယဇန္တော ဗဟုံ ပုညံ ပသဝသိ. ယော ခေါ, မာဏဝ, ဒါယကော ဒါနပတိ ဝဒညူ ယာစယောဂေါ; ဓမ္မေန ဘောဂေ ပရိယေသတိ; ဓမ္မေန ဘောဂေ ပရိယေသိတွာ ဓမ္မလဒ္ဓေဟိ ဘောဂေဟိ ဓမ္မာဓိဂတေဟိ ဧကဿပိ ဒဒါတိ …ပေ… သတဿပိ ဒဒါတိ, ဘိယျောပိ ဒဒါတိ, ဗဟုံ သော ပုညံ ပသဝတီ”တိ. အထ ခေါ မာဃော မာဏဝေါ ဘဂဝန္တံ ဂါထာယ အဇ္ဈဘာသိ—
“ပုစ္ဆာမဟံ ဂေါတမံ ဝဒညုံ, (ဣတိ မာဃော မာဏဝေါ)
ကာသာယဝါသိံ အဂဟံ စရန္တံ;
ယော ယာစယောဂေါ ဒါနပတိ ဂဟဋ္ဌော,
ပုညတ္ထိကော ယဇတိ ပုညပေက္ခော;
ဒဒံ ပရေသံ ဣဓ အန္နပါနံ,
ကထံ ဟုတံ ယဇမာနဿ သုဇ္ဈေ”. (1)
“ယော ယာစယောဂေါ ဒါနပတိ ဂဟဋ္ဌော, (မာဃာတိ ဘဂဝါ)
ပုညတ္ထိကော ယဇတိ ပုညပေက္ခော;
ဒဒံ ပရေသံ ဣဓ အန္နပါနံ,
အာရာဓယေ ဒက္ခိဏေယျေဘိ တာဒိ”. (2)
“ယော ယာစယောဂေါ ဒါနပတိ ဂဟဋ္ဌော, (ဣတိ မာဃော မာဏဝေါ)
ပုညတ္ထိကော ယဇတိ ပုညပေက္ခော;
ဒဒံ ပရေသံ ဣဓ အန္နပါနံ,
အက္ခာဟိ မေ ဘဂဝါ ဒက္ခိဏေယျေ”. (3)
“ယေ ဝေ အသတ္တာ ဝိစရန္တိ လောကေ,
အကိဉ္စနာ ကေဝလိနော ယတတ္တာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (4)
ယေ သဗ္ဗသံယောဇနဗန္ဓနစ္ဆိဒါ,
ဒန္တာ ဝိမုတ္တာ အနီဃာ နိရာသာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (5)
ယေ သဗ္ဗသံယောဇနဝိပ္ပမုတ္တာ,
ဒန္တာ ဝိမုတ္တာ အနီဃာ နိရာသာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (6)
ရာဂဉ္စ ဒေါသဉ္စ ပဟာယ မောဟံ,
ခီဏာသဝါ ဝူသိတဗြဟ္မစရိယာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (7)
ယေသု န မာယာ ဝသတိ န မာနော,
ခီဏာသဝါ ဝူသိတဗြဟ္မစရိယာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (8)
ယေ ဝီတလောဘာ အမမာ နိရာသာ,
ခီဏာသဝါ ဝူသိတဗြဟ္မစရိယာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (9)
ယေ ဝေ န တဏှာသု ဥပါတိပန္နာ,
ဝိတရေယျ ဩဃံ အမမာ စရန္တိ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (10)
ယေသံ တဏှာ နတ္ထိ ကုဟိဉ္စိ လောကေ,
ဘဝါဘဝါယ ဣဓ ဝါ ဟုရံ ဝါ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (11)
ယေ ကာမေ ဟိတွာ အဂဟာ စရန္တိ,
သုသညတတ္တာ တသရံဝ ဥဇ္ဇုံ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (12)
ယေ ဝီတရာဂါ သုသမာဟိတိန္ဒြိယာ,
စန္ဒောဝ ရာဟုဂ္ဂဟဏာ ပမုတ္တာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (13)
သမိတာဝိနော ဝီတရာဂါ အကောပါ,
ယေသံ ဂတီ နတ္ထိဓ ဝိပ္ပဟာယ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (14)
ဇဟိတွာ ဇာတိမရဏံ အသေသံ,
ကထံကထိံ သဗ္ဗမုပါတိဝတ္တာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (15)
ယေ အတ္တဒီပါ ဝိစရန္တိ လောကေ,
အကိဉ္စနာ သဗ္ဗဓိ ဝိပ္ပမုတ္တာ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (16)
ယေ ဟေတ္ထ ဇာနန္တိ ယထာ တထာ ဣဒံ,
အယမန္တိမာ နတ္ထိ ပုနဗ္ဘဝေါတိ;
ကာလေန တေသု ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ. (17)
ယော ဝေဒဂူ ဈာနရတော သတီမာ,
သမ္ဗောဓိပတ္တော သရဏံ ဗဟူနံ;
ကာလေန တမှိ ဟဗျံ ပဝေစ္ဆေ,
ယော ဗြာဟ္မဏော ပုညပေက္ခော ယဇေထ”. (18)
“အဒ္ဓါ အမောဃာ မမ ပုစ္ဆနာ အဟု, (ဣတိ မာဃော မာဏဝေါ)
အက္ခာသိ မေ ဘဂဝါ ဒက္ခိဏေယျေ;
တွဉှေတ္ထ ဇာနာသိ ယထာ တထာ ဣဒံ,
တထာ ဟိ တေ ဝိဒိတော ဧသ ဓမ္မော. (19)
ယော ယာစယောဂေါ ဒါနပတိ ဂဟဋ္ဌော,
ပုညတ္ထိကော ယဇတိ ပုညပေက္ခော;
ဒဒံ ပရေသံ ဣဓ အန္နပါနံ,
အက္ခာဟိ မေ ဘဂဝါ ယညသမ္ပဒံ”. (20)
“ယဇဿု ယဇမာနော မာဃာတိ ဘဂဝါ,
သဗ္ဗတ္ထ စ ဝိပ္ပသာဒေဟိ စိတ္တံ;
အာရမ္မဏံ ယဇမာနဿ ယညော,
ဧတ္ထ ပတိဋ္ဌာယ ဇဟာတိ ဒေါသံ. (21)
သော ဝီတရာဂေါ ပဝိနေယျ ဒေါသံ,
မေတ္တံ စိတ္တံ ဘာဝယမပ္ပမာဏံ;
ရတ္တိန္ဒိဝံ သတတမပ္ပမတ္တော,
သဗ္ဗာ ဒိသာ ဖရတိ အပ္ပမညံ”. (22)
“ကော သုဇ္ဈတိ မုစ္စတိ ဗဇ္ဈတီ စ,
ကေနတ္တနာ ဂစ္ဆတိ ဗြဟ္မလောကံ;
အဇာနတော မေ မုနိ ဗြူဟိ ပုဋ္ဌော,
ဘဂဝါ ဟိ မေ သက္ခိ ဗြဟ္မဇ္ဇဒိဋ္ဌော;
တုဝဉှိ နော ဗြဟ္မသမောသိ သစ္စံ,
ကထံ ဥပပဇ္ဇတိ ဗြဟ္မလောကံ ဇုတိမ”. (23)
“ယော ယဇတိ တိဝိဓံ ယညသမ္ပဒံ, (မာဃာတိ ဘဂဝါ)
အာရာဓယေ ဒက္ခိဏေယျေဘိ တာဒိ;
ဧဝံ ယဇိတွာ သမ္မာ ယာစယောဂေါ,
ဥပပဇ္ဇတိ ဗြဟ္မလောကန္တိ ဗြူမီ”တိ. (24)_
ဧဝံ ဝုတ္တေ, မာဃော မာဏဝေါ ဘဂဝန္တံ ဧတဒဝေါစ— “အဘိက္ကန္တံ, ဘော ဂေါတမ …ပေ… အဇ္ဇတဂ္ဂေ ပါဏုပေတံ သရဏံ ဂတန်”တိ.
မာဃသုတ္တံ ပဉ္စမံ.