4.1 ကာမသုတ္တ
Review
773.
934
ကာမံ ကာမယမာနဿ,
တဿ စေ တံ သမိဇ္ဈတိ;
အဒ္ဓါ ပီတိမနော ဟောတိ,
လဒ္ဓါ မစ္စော ယဒိစ္ဆတိ. (1)
774.
935
တဿ စေ ကာမယာနဿ,
ဆန္ဒဇာတဿ ဇန္တုနော;
တေ ကာမာ ပရိဟာယန္တိ,
သလ္လဝိဒ္ဓေါဝ ရုပ္ပတိ. (2)
775.
936
ယော ကာမေ ပရိဝဇ္ဇေတိ,
သပ္ပဿေဝ ပဒါ သိရော;
သောမံ ဝိသတ္တိကံ လောကေ,
သတော သမတိဝတ္တတိ. (3)
776.
937
ခေတ္တံ ဝတ္ထုံ ဟိရညံ ဝါ,
ဂဝါဿံ ဒါသပေါရိသံ;
ထိယော ဗန္ဓူ ပုထု ကာမေ,
ယော နရော အနုဂိဇ္ဈတိ. (4)
777.
938
အဗလာ နံ ဗလီယန္တိ,
မဒ္ဒန္တေနံ ပရိဿယာ;
တတော နံ ဒုက္ခမနွေတိ,
နာဝံ ဘိန္နမိဝေါဒကံ. (5)
778.
939
တသ္မာ ဇန္တု သဒါ သတော,
ကာမာနိ ပရိဝဇ္ဇယေ;
တေ ပဟာယ တရေ ဩဃံ,
နာဝံ သိတွာဝ ပါရဂူတိ. (6)
940
ကာမသုတ္တံ ပဌမံ.