4.10 ပုရာဘေဒသုတ္တ
“ကထံဒဿီ ကထံသီလော,
ဥပသန္တောတိ ဝုစ္စတိ;_
တံ မေ ဂေါတမ ပဗြူဟိ,
ပုစ္ဆိတော ဥတ္တမံ နရံ”. (1)
“ဝီတတဏှော ပုရာ ဘေဒါ, (ဣတိ ဘဂဝါ)
ပုဗ္ဗမန္တမနိဿိတော;
ဝေမဇ္ဈေ နုပသင်္ခေယျော,
တဿ နတ္ထိ ပုရက္ခတံ. (2)
အက္ကောဓနော အသန္တာသီ,
အဝိကတ္ထီ အကုက္ကုစော;
မန္တဘာဏီ အနုဒ္ဓတော,
သ ဝေ ဝါစာယတော မုနိ. (3)
နိရာသတ္တိ အနာဂတေ,
အတီတံ နာနုသောစတိ;
ဝိဝေကဒဿီ ဖဿေသု,
ဒိဋ္ဌီသု စ န နီယတိ. (4)
ပတိလီနော အကုဟကော,
အပိဟာလု အမစ္ဆရီ;
အပ္ပဂဗ္ဘော အဇေဂုစ္ဆော,
ပေသုဏေယျေ စ နော ယုတော. (5)
သာတိယေသု အနဿာဝီ,
အတိမာနေ စ နော ယုတော;
သဏှော စ ပဋိဘာနဝါ,
န သဒ္ဓေါ န ဝိရဇ္ဇတိ. (6)
လာဘကမျာ န သိက္ခတိ,
အလာဘေ စ န ကုပ္ပတိ;
အဝိရုဒ္ဓေါ စ တဏှာယ,
ရသေသု နာနုဂိဇ္ဈတိ. (7)
ဥပေက္ခကော သဒါ သတော,_
န လောကေ မညတေ သမံ;
န ဝိသေသီ န နီစေယျော,
တဿ နော သန္တိ ဥဿဒါ. (8)
ယဿ နိဿယနာ နတ္ထိ,
ဉတွာ ဓမ္မံ အနိဿိတော;
ဘဝါယ ဝိဘဝါယ ဝါ,
တဏှာ ယဿ န ဝိဇ္ဇတိ. (9)
တံ ဗြူမိ ဥပသန္တောတိ,
ကာမေသု အနပေက္ခိနံ;
ဂန္ထာ တဿ န ဝိဇ္ဇန္တိ,
အတရီ သော ဝိသတ္တိကံ. (10)
န တဿ ပုတ္တာ ပသဝေါ,
ခေတ္တံ ဝတ္ထုဉ္စ ဝိဇ္ဇတိ;
အတ္တာ ဝါပိ နိရတ္တာ ဝါ,
န တသ္မိံ ဥပလဗ္ဘတိ. (11)
ယေန နံ ဝဇ္ဇုံ ပုထုဇ္ဇနာ,
အထော သမဏဗြာဟ္မဏာ;
တံ တဿ အပုရက္ခတံ,
တသ္မာ ဝါဒေသု နေဇတိ. (12)
ဝီတဂေဓော အမစ္ဆရီ,
န ဥဿေသု ဝဒတေ မုနိ;
န သမေသု န ဩမေသု,
ကပ္ပံ နေတိ အကပ္ပိယော. (13)
ယဿ လောကေ သကံ နတ္ထိ,
အသတာ စ န သောစတိ;
ဓမ္မေသု စ န ဂစ္ဆတိ,
သ ဝေ သန္တောတိ ဝုစ္စတီ”တိ. (14)
ပုရာဘေဒသုတ္တံ ဒသမံ.