4.11 ကလဟဝိဝါဒသုတ္တ
“ကုတောပဟူတာ ကလဟာ ဝိဝါဒါ,
ပရိဒေဝသောကာ သဟမစ္ဆရာ စ;
မာနာတိမာနာ သဟပေသုဏာ စ,
ကုတောပဟူတာ တေ တဒိင်္ဃ ဗြူဟိ”. (1)
“ပိယပ္ပဟူတာ ကလဟာ ဝိဝါဒါ,
ပရိဒေဝသောကာ သဟမစ္ဆရာ စ;
မာနာတိမာနာ သဟပေသုဏာ စ,
မစ္ဆေရယုတ္တာ ကလဟာ ဝိဝါဒါ;
ဝိဝါဒဇာတေသု စ ပေသုဏာနိ”. (2)
“ပိယာ သု လောကသ္မိံ ကုတောနိဒါနာ,
ယေ စာပိ လောဘာ ဝိစရန္တိ လောကေ;
အာသာ စ နိဋ္ဌာ စ ကုတောနိဒါနာ,
ယေ သမ္ပရာယာယ နရဿ ဟောန္တိ”. (3)
“ဆန္ဒာနိဒါနာနိ ပိယာနိ လောကေ,
ယေ စာပိ လောဘာ ဝိစရန္တိ လောကေ;
အာသာ စ နိဋ္ဌာ စ ဣတောနိဒါနာ,
ယေ သမ္ပရာယာယ နရဿ ဟောန္တိ”. (4)
“ဆန္ဒော နု လောကသ္မိံ ကုတောနိဒါနော,
ဝိနိစ္ဆယာ စာပိ ကုတောပဟူတာ;
ကောဓော မောသဝဇ္ဇဉ္စ ကထံကထာ စ,
ယေ ဝါပိ ဓမ္မာ သမဏေန ဝုတ္တာ”. (5)
“သာတံ အသာတန္တိ ယမာဟု လောကေ,
တမူပနိဿာယ ပဟောတိ ဆန္ဒော;
ရူပေသု ဒိသွာ ဝိဘဝံ ဘဝဉ္စ,
ဝိနိစ္ဆယံ ကုဗ္ဗတိ ဇန္တု လောကေ. (6)
ကောဓော မောသဝဇ္ဇဉ္စ ကထံကထာ စ,
ဧတေပိ ဓမ္မာ ဒွယမေဝ သန္တေ;
ကထံကထီ ဉာဏပထာယ သိက္ခေ,
ဉတွာ ပဝုတ္တာ သမဏေန ဓမ္မာ”. (7)
“သာတံ အသာတဉ္စ ကုတောနိဒါနာ,
ကိသ္မိံ အသန္တေ န ဘဝန္တိ ဟေတေ;
ဝိဘဝံ ဘဝဉ္စာပိ ယမေတမတ္ထံ,
ဧတံ မေ ပဗြူဟိ ယတောနိဒါနံ”. (8)
“ဖဿနိဒါနံ သာတံ အသာတံ,
ဖဿေ အသန္တေ န ဘဝန္တိ ဟေတေ;
ဝိဘဝံ ဘဝဉ္စာပိ ယမေတမတ္ထံ,
ဧတံ တေ ပဗြူမိ ဣတောနိဒါနံ”. (9)
“ဖဿော နု လောကသ္မိ ကုတောနိဒါနော,
ပရိဂ္ဂဟာ စာပိ ကုတောပဟူတာ;
ကိသ္မိံ အသန္တေ န မမတ္တမတ္ထိ,
ကိသ္မိံ ဝိဘူတေ န ဖုသန္တိ ဖဿာ”. (10)
“နာမဉ္စ ရူပဉ္စ ပဋိစ္စ ဖဿော,
ဣစ္ဆာနိဒါနာနိ ပရိဂ္ဂဟာနိ;_
ဣစ္ဆာယသန္တျာ န မမတ္တမတ္ထိ,_
ရူပေ ဝိဘူတေ န ဖုသန္တိ ဖဿာ”. (11)
“ကထံ သမေတဿ ဝိဘောတိ ရူပံ,
သုခံ ဒုခဉ္စာပိ ကထံ ဝိဘောတိ;
ဧတံ မေ ပဗြူဟိ ယထာ ဝိဘောတိ,
တံ ဇာနိယာမာတိ မေ မနော အဟု”. (12)
“န သညသညီ န ဝိသညသညီ,
နောပိ အသညီ န ဝိဘူတသညီ;
ဧဝံ သမေတဿ ဝိဘောတိ ရူပံ,
သညာနိဒါနာ ဟိ ပပဉ္စသင်္ခါ”. (13)
“ယံ တံ အပုစ္ဆိမှ အကိတ္တယီ နော,
အညံ တံ ပုစ္ဆာမ တဒိင်္ဃ ဗြူဟိ;
ဧတ္တာဝတဂ္ဂံ နု ဝဒန္တိ ဟေကေ,
ယက္ခဿ သုဒ္ဓိံ ဣဓ ပဏ္ဍိတာသေ;
ဥဒါဟု အညမ္ပိ ဝဒန္တိ ဧတ္တော”. (14)_
“ဧတ္တာဝတဂ္ဂမ္ပိ ဝဒန္တိ ဟေကေ,
ယက္ခဿ သုဒ္ဓိံ ဣဓ ပဏ္ဍိတာသေ;
တေသံ ပနေကေ သမယံ ဝဒန္တိ,
အနုပါဒိသေသေ ကုသလာ ဝဒါနာ. (15)
ဧတေ စ ဉတွာ ဥပနိဿိတာတိ,
ဉတွာ မုနီ နိဿယေ သော ဝိမံသီ;
ဉတွာ ဝိမုတ္တော န ဝိဝါဒမေတိ,
ဘဝါဘဝါယ န သမေတိ ဓီရော”တိ. (16)
ကလဟဝိဝါဒသုတ္တံ ဧကာဒသမံ.