4.12 စူဠဗျူဟသုတ္တ
“သကံသကံဒိဋ္ဌိပရိဗ္ဗသာနာ,
ဝိဂ္ဂယှ နာနာ ကုသလာ ဝဒန္တိ;
ယော ဧဝံ ဇာနာတိ သ ဝေဒိ ဓမ္မံ,
ဣဒံ ပဋိက္ကောသမကေဝလီ သော. (1)_
ဧဝမ္ပိ ဝိဂ္ဂယှ ဝိဝါဒယန္တိ,
ဗာလော ပရော အက္ကုသလောတိ စာဟု;
သစ္စော နု ဝါဒေါ ကတမော ဣမေသံ,
သဗ္ဗေဝ ဟီမေ ကုသလာဝဒါနာ”. (2)
“ပရဿ စေ ဓမ္မမနာနုဇာနံ,
ဗာလောမကော ဟောတိ နိဟီနပညော;
သဗ္ဗေဝ ဗာလာ သုနိဟီနပညာ,
သဗ္ဗေဝိမေ ဒိဋ္ဌိပရိဗ္ဗသာနာ. (3)
သန္ဒိဋ္ဌိယာ စေဝ န ဝီဝဒါတာ,
သံသုဒ္ဓပညာ ကုသလာ မုတီမာ;
န တေသံ ကောစိ ပရိဟီနပညော,
ဒိဋ္ဌီ ဟိ တေသမ္ပိ တထာ သမတ္တာ. (4)
န ဝါဟမေတံ တထိယန္တိ ဗြူမိ,
ယမာဟု ဗာလာ မိထု အညမညံ;
သကံ သကံ ဒိဋ္ဌိမကံသု သစ္စံ,
တသ္မာ ဟိ ဗာလောတိ ပရံ ဒဟန္တိ”. (5)
“ယမာဟု သစ္စံ တထိယန္တိ ဧကေ,
တမာဟု အညေ တုစ္ဆံ မုသာတိ;
ဧဝမ္ပိ ဝိဂယှ ဝိဝါဒယန္တိ,
ကသ္မာ န ဧကံ သမဏာ ဝဒန္တိ”. (6)
“ဧကဉှိ သစ္စံ န ဒုတီယမတ္ထိ,
ယသ္မိံ ပဇာ နော ဝိဝဒေ ပဇာနံ;
နာနာ တေ သစ္စာနိ သယံ ထုနန္တိ,
တသ္မာ န ဧကံ သမဏာ ဝဒန္တိ”. (7)
“ကသ္မာ နု သစ္စာနိ ဝဒန္တိ နာနာ,
ပဝါဒိယာသေ ကုသလာဝဒါနာ;
သစ္စာနိ သုတာနိ ဗဟူနိ နာနာ,
ဥဒါဟု တေ တက္ကမနုဿရန္တိ”. (8)_
“န ဟေဝ သစ္စာနိ ဗဟူနိ နာနာ,
အညတြ သညာယ နိစ္စာနိ လောကေ;
တက္ကဉ္စ ဒိဋ္ဌီသု ပကပ္ပယိတွာ,
သစ္စံ မုသာတိ ဒွယဓမ္မမာဟု. (9)
ဒိဋ္ဌေ သုတေ သီလဝတေ မုတေ ဝါ,
ဧတေ စ နိဿာယ ဝိမာနဒဿီ;
ဝိနိစ္ဆယေ ဌတွာ ပဟဿမာနော,
ဗာလော ပရော အက္ကုသလောတိ စာဟ. (10)
ယေနေဝ ဗာလောတိ ပရံ ဒဟာတိ,
တေနာတုမာနံ ကုသလောတိ စာဟ;
သယမတ္တနာ သော ကုသလာဝဒါနော,
အညံ ဝိမာနေတိ တဒေဝ ပါဝ. (11)
အတိသာရဒိဋ္ဌိယာ သော သမတ္တော,
မာနေန မတ္တော ပရိပုဏ္ဏမာနီ;
သယမေဝ သာမံ မနသာဘိသိတ္တော,
ဒိဋ္ဌီ ဟိ သာ တဿ တထာ သမတ္တာ. (12)
ပရဿ စေ ဟိ ဝစသာ နိဟီနော,
တုမော သဟာ ဟောတိ နိဟီနပညော;
အထ စေ သယံ ဝေဒဂူ ဟောတိ ဓီရော,
န ကောစိ ဗာလော သမဏေသု အတ္ထိ. (13)
အညံ ဣတော ယာဘိဝဒန္တိ ဓမ္မံ,
အပရဒ္ဓါ သုဒ္ဓိမကေဝလီ တေ;
ဧဝမ္ပိ တိတ္ထျာ ပုထုသော ဝဒန္တိ,
သန္ဒိဋ္ဌိရာဂေန ဟိ တေဘိရတ္တာ. (14)
ဣဓေဝ သုဒ္ဓိံ ဣတိ ဝါဒယန္တိ,_
နာညေသု ဓမ္မေသု ဝိသုဒ္ဓိမာဟု;
ဧဝမ္ပိ တိတ္ထျာ ပုထုသော နိဝိဋ္ဌာ,
သကာယနေ တတ္ထ ဒဠှံ ဝဒါနာ. (15)
သကာယနေ ဝါပိ ဒဠှံ ဝဒါနော,
ကမေတ္ထ ဗာလောတိ ပရံ ဒဟေယျ;
သယံဝ သော မေဓဂမာဝဟေယျ,
ပရံ ဝဒံ ဗာလမသုဒ္ဓိဓမ္မံ. (16)
ဝိနိစ္ဆယေ ဌတွာ သယံ ပမာယ,
ဥဒ္ဓံသ လောကသ္မိံ ဝိဝါဒမေတိ;_
ဟိတွာန သဗ္ဗာနိ ဝိနိစ္ဆယာနိ,
န မေဓဂံ ကုဗ္ဗတိ ဇန္တု လောကေ”တိ. (17)
စူဠဗျူဟသုတ္တံ ဒွါဒသမံ.