4.15 အတ္တဒဏ္ဍသုတ္တ
“အတ္တဒဏ္ဍာ ဘယံ ဇာတံ,
ဇနံ ပဿထ မေဓဂံ;
သံဝေဂံ ကိတ္တယိဿာမိ,
ယထာ သံဝိဇိတံ မယာ. (1)
ဖန္ဒမာနံ ပဇံ ဒိသွာ,
မစ္ဆေ အပ္ပေါဒကေ ယထာ;
အညမညေဟိ ဗျာရုဒ္ဓေ,
ဒိသွာ မံ ဘယမာဝိသိ. (2)
သမန္တမသာရော လောကော,
ဒိသာ သဗ္ဗာ သမေရိတာ;
ဣစ္ဆံ ဘဝနမတ္တနော,_
နာဒ္ဒသာသိံ အနောသိတံ. (3)
ဩသာနေ တွေဝ ဗျာရုဒ္ဓေ,
ဒိသွာ မေ အရတီ အဟု;
အထေတ္ထ သလ္လမဒ္ဒက္ခိံ,
ဒုဒ္ဒသံ ဟဒယနိဿိတံ. (4)
ယေန သလ္လေန ဩတိဏ္ဏော,
ဒိသာ သဗ္ဗာ ဝိဓာဝတိ;
တမေဝ သလ္လမဗ္ဗုယှ,
န ဓာဝတိ န သီဒတိ. (5)
တတ္ထ သိက္ခာနုဂီယန္တိ,
ယာနိ လောကေ ဂဓိတာနိ;
န တေသု ပသုတော သိယာ,
နိဗ္ဗိဇ္ဈ သဗ္ဗသော ကာမေ;
သိက္ခေ နိဗ္ဗာနမတ္တနော. (6)
သစ္စော သိယာ အပ္ပဂဗ္ဘော,
အမာယော ရိတ္တပေသုဏော;
အက္ကောဓနော လောဘပါပံ,
ဝေဝိစ္ဆံ ဝိတရေ မုနိ. (7)
နိဒ္ဒံ တန္ဒိံ သဟေ ထီနံ,
ပမာဒေန န သံဝသေ;
အတိမာနေ န တိဋ္ဌေယျ,
နိဗ္ဗာနမနသော နရော. (8)
မောသဝဇ္ဇေ န နီယေထ,
ရူပေ သ္နေဟံ န ကုဗ္ဗယေ;
မာနဉ္စ ပရိဇာနေယျ,
သာဟသာ ဝိရတော စရေ. (9)
ပုရာဏံ နာဘိနန္ဒေယျ,
နဝေ ခန္တိံ န ကုဗ္ဗယေ;
ဟိယျမာနေ န သောစေယျ,
အာကာသံ န သိတော သိယာ. (10)
ဂေဓံ ဗြူမိ မဟောဃောတိ,
အာဇဝံ ဗြူမိ ဇပ္ပနံ;
အာရမ္မဏံ ပကပ္ပနံ,
ကာမပင်္ကော ဒုရစ္စယော. (11)
သစ္စာ အဝေါက္ကမ္မ မုနိ,
ထလေ တိဋ္ဌတိ ဗြာဟ္မဏော;
သဗ္ဗံ သော ပဋိနိဿဇ္ဇ,
သ ဝေ သန္တောတိ ဝုစ္စတိ. (12)
သ ဝေ ဝိဒွါ သ ဝေဒဂူ,
ဉတွာ ဓမ္မံ အနိဿိတော;
သမ္မာ သော လောကေ ဣရိယာနော,
န ပိဟေတီဓ ကဿစိ. (13)
ယောဓ ကာမေ အစ္စတရိ,
သင်္ဂံ လောကေ ဒုရစ္စယံ;
န သော သောစတိ နာဇ္ဈေတိ,
ဆိန္နသောတော အဗန္ဓနော. (14)
ယံ ပုဗ္ဗေ တံ ဝိသောသေဟိ,
ပစ္ဆာ တေ မာဟု ကိဉ္စနံ;
မဇ္ဈေ စေ နော ဂဟေဿသိ,
ဥပသန္တော စရိဿသိ. (15)_
သဗ္ဗသော နာမရူပသ္မိံ,
ယဿ နတ္ထိ မမာယိတံ;
အသတာ စ န သောစတိ,
သ ဝေ လောကေ န ဇီယတိ. (16)
ယဿ နတ္ထိ ဣဒံ မေတိ,
ပရေသံ ဝါပိ ကိဉ္စနံ;
မမတ္တံ သော အသံဝိန္ဒံ,
နတ္ထိ မေတိ န သောစတိ. (17)
အနိဋ္ဌုရီ အနနုဂိဒ္ဓေါ,
အနေဇော သဗ္ဗဓီ သမော;
တမာနိသံသံ ပဗြူမိ,
ပုစ္ဆိတော အဝိကမ္ပိနံ. (18)
အနေဇဿ ဝိဇာနတော,
နတ္ထိ ကာစိ နိသင်္ခတိ;
ဝိရတော သော ဝိယာရဗ္ဘာ,
ခေမံ ပဿတိ သဗ္ဗဓိ. (19)
န သမေသု န ဩမေသု,
န ဥဿေသု ဝဒတေ မုနိ;
သန္တော သော ဝီတမစ္ဆရော,
နာဒေတိ န နိရဿတီ”တိ. (20)
အတ္တဒဏ္ဍသုတ္တံ ပန္နရသမံ.