4.16 သာရိပုတ္တသုတ္တ
“န မေ ဒိဋ္ဌော ဣတော ပုဗ္ဗေ, (ဣစ္စာယသ္မာ သာရိပုတ္တော)
န သုတော ဥဒ ကဿစိ;
ဧဝံ ဝဂ္ဂုဝဒေါ သတ္ထာ,
တုသိတာ ဂဏိမာဂတော. (1)
သဒေဝကဿ လောကဿ,
ယထာ ဒိဿတိ စက္ခုမာ;
သဗ္ဗံ တမံ ဝိနောဒေတွာ,
ဧကောဝ ရတိမဇ္ဈဂါ. (2)
တံ ဗုဒ္ဓံ အသိတံ တာဒိံ,
အကုဟံ ဂဏိမာဂတံ;
ဗဟူနမိဓ ဗဒ္ဓါနံ,
အတ္ထိ ပဉှေန အာဂမံ. (3)
ဘိက္ခုနော ဝိဇိဂုစ္ဆတော,
ဘဇတော ရိတ္တမာသနံ;
ရုက္ခမူလံ သုသာနံ ဝါ,
ပဗ္ဗတာနံ ဂုဟာသု ဝါ. (4)
ဥစ္စာဝစေသု သယနေသု,_
ကီဝန္တော တတ္ထ ဘေရဝါ;
ယေဟိ ဘိက္ခု န ဝေဓေယျ,
နိဂ္ဃေါသေ သယနာသနေ. (5)
ကတီ ပရိဿယာ လောကေ,
ဂစ္ဆတော အဂတံ ဒိသံ;
ယေ ဘိက္ခု အဘိသမ္ဘဝေ,
ပန္တမှိ သယနာသနေ. (6)
ကျာဿ ဗျပ္ပထယော အဿု,
ကျာဿဿု ဣဓ ဂေါစရာ;
ကာနိ သီလဗ္ဗတာနာဿု,
ပဟိတတ္တဿ ဘိက္ခုနော. (7)
ကံ သော သိက္ခံ သမာဒါယ,
ဧကောဒိ နိပကော သတော;
ကမ္မာရော ရဇတဿေဝ,
နိဒ္ဓမေ မလမတ္တနော”. (8)
“ဝိဇိဂုစ္ဆမာနဿ ယဒိဒံ ဖာသု, (သာရိပုတ္တာတိ ဘဂဝါ)
ရိတ္တာသနံ သယနံ သေဝတော စေ;
သမ္ဗောဓိကာမဿ ယထာနုဓမ္မံ,
တံ တေ ပဝက္ခာမိ ယထာ ပဇာနံ. (9)
ပဉ္စန္နံ ဓီရော ဘယာနံ န ဘာယေ,
ဘိက္ခု သတော သပရိယန္တစာရီ;
ဍံသာဓိပါတာနံ သရီသပါနံ,
မနုဿဖဿာနံ စတုပ္ပဒါနံ. (10)
ပရဓမ္မိကာနမ္ပိ န သန္တသေယျ,
ဒိသွာပိ တေသံ ဗဟုဘေရဝါနိ;
အထာပရာနိ အဘိသမ္ဘဝေယျ,
ပရိဿယာနိ ကုသလာနုဧသီ. (11)
အာတင်္ကဖဿေန ခုဒါယ ဖုဋ္ဌော,
သီတံ အထုဏှံ အဓိဝါသယေယျ;
သော တေဟိ ဖုဋ္ဌော ဗဟုဓာ အနောကော,
ဝိရိယံ ပရက္ကမ္မဒဠှံ ကရေယျ. (12)
ထေယျံ န ကာရေ န မုသာ ဘဏေယျ,
မေတ္တာယ ဖဿေ တသထာဝရာနိ;
ယဒါဝိလတ္တံ မနသော ဝိဇညာ,
ကဏှဿ ပက္ခောတိ ဝိနောဒယေယျ. (13)
ကောဓာတိမာနဿ ဝသံ န ဂစ္ဆေ,
မူလမ္ပိ တေသံ ပလိခည တိဋ္ဌေ;
အထပ္ပိယံ ဝါ ပန အပ္ပိယံ ဝါ,
အဒ္ဓါ ဘဝန္တော အဘိသမ္ဘဝေယျ. (14)
ပညံ ပုရက္ခတွာ ကလျာဏပီတိ,
ဝိက္ခမ္ဘယေ တာနိ ပရိဿယာနိ;
အရတိံ သဟေထ သယနမှိ ပန္တေ,
စတုရော သဟေထ ပရိဒေဝဓမ္မေ. (15)
ကိံသူ အသိဿာမိ ကုဝ ဝါ အသိဿံ,
ဒုက္ခံ ဝတ သေတ္ထ ကွဇ္ဇ သေဿံ;
ဧတေ ဝိတက္ကေ ပရိဒေဝနေယျေ,
ဝိနယေထ သေခေါ အနိကေတစာရီ. (16)
အန္နဉ္စ လဒ္ဓါ ဝသနဉ္စ ကာလေ,
မတ္တံ သော ဇညာ ဣဓ တောသနတ္ထံ;
သော တေသု ဂုတ္တော ယတစာရိ ဂါမေ,
ရုသိတောပိ ဝါစံ ဖရုသံ န ဝဇ္ဇာ. (17)
ဩက္ခိတ္တစက္ခု န စ ပါဒလောလော,
ဈာနာနုယုတ္တော ဗဟုဇာဂရဿ;
ဥပေက္ခမာရဗ္ဘ သမာဟိတတ္တော,_
တက္ကာသယံ ကုက္ကုစ္စိယူပဆိန္ဒေ. (18)
စုဒိတော ဝစီဘိ သတိမာဘိနန္ဒေ,
သဗြဟ္မစာရီသု ခိလံ ပဘိန္ဒေ;
ဝါစံ ပမုဉ္စေ ကုသလံ နာတိဝေလံ,
ဇနဝါဒဓမ္မာယ န စေတယေယျ. (19)
အထာပရံ ပဉ္စ ရဇာနိ လောကေ,
ယေသံ သတီမာ ဝိနယာယ သိက္ခေ;
ရူပေသု သဒ္ဒေသု အထော ရသေသု,
ဂန္ဓေသု ဖဿေသု သဟေထ ရာဂံ. (20)
ဧတေသု ဓမ္မေသု ဝိနေယျ ဆန္ဒံ,
ဘိက္ခု သတိမာ သုဝိမုတ္တစိတ္တော;
ကာလေန သော သမ္မာ ဓမ္မံ ပရိဝီမံသမာနော,
ဧကောဒိဘူတော ဝိဟနေ တမံ သော”တိ. (21)
သာရိပုတ္တသုတ္တံ သောဠသမံ.
အဋ္ဌကဝဂ္ဂေါ စတုတ္ထော.
တဿုဒ္ဒါနံ
ကာမံ ဂုဟဉ္စ ဒုဋ္ဌာ စ,
သုဒ္ဓဉ္စ ပရမာ ဇရာ;
မေတ္တေယျော စ ပသူရော စ,
မာဂဏ္ဍိ ပုရာဘေဒနံ.
ကလဟံ ဒွေ စ ဗျူဟာနိ,
ပုနဒေဝ တုဝဋ္ဋကံ;
အတ္တဒဏ္ဍဝရံ သုတ္တံ,
ထေရပုဋ္ဌေန သောဠသ;
ဣတိ ဧတာနိ သုတ္တာနိ,_
သဗ္ဗာနဋ္ဌကဝဂ္ဂိကာတိ.