4.2 ဂုဟဋ္ဌကသုတ္တ
သတ္တော ဂုဟာယံ ဗဟုနာဘိဆန္နော,
တိဋ္ဌံ နရော မောဟနသ္မိံ ပဂါဠှော;
ဒူရေ ဝိဝေကာ ဟိ တထာဝိဓော သော,
ကာမာ ဟိ လောကေ န ဟိ သုပ္ပဟာယာ. (1)
ဣစ္ဆာနိဒါနာ ဘဝသာတဗဒ္ဓါ,_
တေ ဒုပ္ပမုဉ္စာ န ဟိ အညမောက္ခာ;
ပစ္ဆာ ပုရေ ဝါပိ အပေက္ခမာနာ,
ဣမေ ဝ ကာမေ ပုရိမေ ဝ ဇပ္ပံ. (2)_
ကာမေသု ဂိဒ္ဓါ ပသုတာ ပမူဠှာ,
အဝဒါနိယာ တေ ဝိသမေ နိဝိဋ္ဌာ;
ဒုက္ခူပနီတာ ပရိဒေဝယန္တိ,
ကိံသူ ဘဝိဿာမ ဣတော စုတာသေ. (3)
တသ္မာ ဟိ သိက္ခေထ ဣဓေဝ ဇန္တု,
ယံ ကိဉ္စိ ဇညာ ဝိသမန္တိ လောကေ;
န တဿ ဟေတူ ဝိသမံ စရေယျ,
အပ္ပဉှိဒံ ဇီဝိတမာဟု ဓီရာ. (4)
ပဿာမိ လောကေ ပရိဖန္ဒမာနံ,
ပဇံ ဣမံ တဏှဂတံ ဘဝေသု;
ဟီနာ နရာ မစ္စုမုခေ လပန္တိ,
အဝီတတဏှာသေ ဘဝါဘဝေသု. (5)
မမာယိတေ ပဿထ ဖန္ဒမာနေ,
မစ္ဆေဝ အပ္ပေါဒကေ ခီဏသောတေ;
ဧတမ္ပိ ဒိသွာ အမမော စရေယျ,
ဘဝေသု အာသတ္တိမကုဗ္ဗမာနော. (6)
ဥဘောသု အန္တေသု ဝိနေယျ ဆန္ဒံ,_
ဖဿံ ပရိညာယ အနာနုဂိဒ္ဓေါ;
ယဒတ္တဂရဟီ တဒကုဗ္ဗမာနော,
န လိပ္ပတီ ဒိဋ္ဌသုတေသု ဓီရော. (7)
သညံ ပရိညာ ဝိတရေယျ ဩဃံ,
ပရိဂ္ဂဟေသု မုနိ နောပလိတ္တော;
အဗ္ဗူဠှသလ္လော စရမပ္ပမတ္တော,
နာသီသတီ လောကမိမံ ပရဉ္စာတိ. (8)
ဂုဟဋ္ဌကသုတ္တံ ဒုတိယံ.