4.3 ဒုဋ္ဌဋ္ဌကသုတ္တ
ဝဒန္တိ ဝေ ဒုဋ္ဌမနာပိ ဧကေ,
အထောပိ ဝေ သစ္စမနာ ဝဒန္တိ;
ဝါဒဉ္စ ဇာတံ မုနိ နော ဥပေတိ,
တသ္မာ မုနီ နတ္ထိ ခိလော ကုဟိဉ္စိ. (1)
သကဉှိ ဒိဋ္ဌိံ ကထမစ္စယေယျ,
ဆန္ဒာနုနီတော ရုစိယာ နိဝိဋ္ဌော;
သယံ သမတ္တာနိ ပကုဗ္ဗမာနော,
ယထာ ဟိ ဇာနေယျ တထာ ဝဒေယျ. (2)
ယော အတ္တနော သီလဝတာနိ ဇန္တု,
အနာနုပုဋ္ဌောဝ ပရေသ ပါဝ;
အနရိယဓမ္မံ ကုသလာ တမာဟု,
ယော အာတုမာနံ သယမေဝ ပါဝ. (3)
သန္တော စ ဘိက္ခု အဘိနိဗ္ဗုတတ္တော,
ဣတိဟန္တိ သီလေသု အကတ္ထမာနော;_
တမရိယဓမ္မံ ကုသလာ ဝဒန္တိ,
ယဿုဿဒါ နတ္ထိ ကုဟိဉ္စိ လောကေ. (4)
ပကပ္ပိတာ သင်္ခတာ ယဿ ဓမ္မာ,
ပုရက္ခတာ သန္တိ အဝီဝဒါတာ;
ယဒတ္တနိ ပဿတိ အာနိသံသံ,
တံ နိဿိတော ကုပ္ပပဋိစ္စသန္တိံ. (5)
ဒိဋ္ဌီနိဝေသာ န ဟိ သွာတိဝတ္တာ,
ဓမ္မေသု နိစ္ဆေယျ သမုဂ္ဂဟီတံ;
တသ္မာ နရော တေသု နိဝေသနေသု,
နိရဿတီ အာဒိယတီ စ ဓမ္မံ. (6)
ဓောနဿ ဟိ နတ္ထိ ကုဟိဉ္စိ လောကေ,
ပကပ္ပိတာ ဒိဋ္ဌိ ဘဝါဘဝေသု;
မာယဉ္စ မာနဉ္စ ပဟာယ ဓောနော,
သ ကေန ဂစ္ဆေယျ အနူပယော သော. (7)
ဥပယော ဟိ ဓမ္မေသု ဥပေတိ ဝါဒံ,_
အနူပယံ ကေန ကထံ ဝဒေယျ;
အတ္တာ နိရတ္တာ န ဟိ တဿ အတ္ထိ,
အဓောသိ သော ဒိဋ္ဌိမိဓေဝ သဗ္ဗန္တိ. (8)
ဒုဋ္ဌဋ္ဌကသုတ္တံ တတိယံ.