4.4 သုဒ္ဓဋ္ဌကသုတ္တ
ပဿာမိ သုဒ္ဓံ ပရမံ အရောဂံ,
ဒိဋ္ဌေန သံသုဒ္ဓိ နရဿ ဟောတိ;
ဧဝါဘိဇာနံ ပရမန္တိ ဉတွာ,
သုဒ္ဓါနုပဿီတိ ပစ္စေတိ ဉာဏံ. (1)
ဒိဋ္ဌေန စေ သုဒ္ဓိ နရဿ ဟောတိ,
ဉာဏေန ဝါ သော ပဇဟာတိ ဒုက္ခံ;
အညေန သော သုဇ္ဈတိ သောပဓီကော,
ဒိဋ္ဌီ ဟိ နံ ပါဝ တထာ ဝဒါနံ. (2)
န ဗြာဟ္မဏော အညတော သုဒ္ဓိမာဟ,
ဒိဋ္ဌေ သုတေ သီလဝတေ မုတေ ဝါ;
ပုညေ စ ပါပေ စ အနူပလိတ္တော,
အတ္တဉ္ဇဟော နယိဓ ပကုဗ္ဗမာနော. (3)
ပုရိမံ ပဟာယ အပရံ သိတာသေ,
ဧဇာနုဂါ တေ န တရန္တိ သင်္ဂံ;
တေ ဥဂ္ဂဟာယန္တိ နိရဿဇန္တိ,
ကပီဝ သာခံ ပမုဉ္စံ ဂဟာယံ. (4)
သယံ သမာဒါယ ဝတာနိ ဇန္တု,
ဥစ္စာဝစံ ဂစ္ဆတိ သညသတ္တော;_
ဝိဒွါ စ ဝေဒေဟိ သမေစ္စ ဓမ္မံ,
န ဥစ္စာဝစံ ဂစ္ဆတိ ဘူရိပညော. (5)
သ သဗ္ဗဓမ္မေသု ဝိသေနိဘူတော,
ယံ ကိဉ္စိ ဒိဋ္ဌံ ဝ သုတံ မုတံ ဝါ;
တမေဝ ဒဿိံ ဝိဝဋံ စရန္တံ,
ကေနီဓ လောကသ္မိ ဝိကပ္ပယေယျ. (6)
န ကပ္ပယန္တိ န ပုရေက္ခရောန္တိ,
အစ္စန္တသုဒ္ဓီတိ န တေ ဝဒန္တိ;
အာဒါနဂန္ထံ ဂထိတံ ဝိသဇ္ဇ,
အာသံ န ကုဗ္ဗန္တိ ကုဟိဉ္စိ လောကေ. (7)
သီမာတိဂေါ ဗြာဟ္မဏော တဿ နတ္ထိ,
ဉတွာ ဝ ဒိသွာ ဝ သမုဂ္ဂဟီတံ;
န ရာဂရာဂီ န ဝိရာဂရတ္တော,
တဿီဓ နတ္ထိ ပရမုဂ္ဂဟီတန္တိ. (8)
သုဒ္ဓဋ္ဌကသုတ္တံ စတုတ္ထံ.