4.6 ဇရာသုတ္တ
အပ္ပံ ဝတ ဇီဝိတံ ဣဒံ,
ဩရံ ဝဿသတာပိ မိယျတိ;
ယော စေပိ အတိစ္စ ဇီဝတိ,
အထ ခေါ သော ဇရသာပိ မိယျတိ. (1)
သောစန္တိ ဇနာ မမာယိတေ,
န ဟိ သန္တိ နိစ္စာ ပရိဂ္ဂဟာ;
ဝိနာဘာဝသန္တမေဝိဒံ,
ဣတိ ဒိသွာ နာဂါရမာဝသေ. (2)_
မရဏေနပိ တံ ပဟီယတိ,
ယံ ပုရိသော မမိဒန္တိ မညတိ;
ဧတမ္ပိ ဝိဒိတွာ ပဏ္ဍိတော,
န မမတ္တာယ နမေထ မာမကော. (3)
သုပိနေန ယထာပိ သင်္ဂတံ,
ပဋိဗုဒ္ဓေါ ပုရိသော န ပဿတိ;
ဧဝမ္ပိ ပိယာယိတံ ဇနံ,
ပေတံ ကာလင်္ကတံ န ပဿတိ. (4)
ဒိဋ္ဌာပိ သုတာပိ တေ ဇနာ,
ယေသံ နာမမိဒံ ပဝုစ္စတိ;
နာမံယေဝါဝသိဿတိ,
အက္ခေယျံ ပေတဿ ဇန္တုနော. (5)
သောကပ္ပရိဒေဝမစ္ဆရံ,
န ဇဟန္တိ ဂိဒ္ဓါ မမာယိတေ;
တသ္မာ မုနယော ပရိဂ္ဂဟံ,
ဟိတွာ အစရိံသု ခေမဒဿိနော. (6)
ပတိလီနစရဿ ဘိက္ခုနော,
ဘဇမာနဿ ဝိဝိတ္တမာသနံ;
သာမဂ္ဂိယမာဟု တဿ တံ,
ယော အတ္တာနံ ဘဝနေ န ဒဿယေ. (7)
သဗ္ဗတ္ထ မုနီ အနိဿိတော,
န ပိယံ ကုဗ္ဗတိ နောပိ အပ္ပိယံ;
တသ္မိံ ပရိဒေဝမစ္ဆရံ,
ပဏ္ဏေ ဝါရိ ယထာ န လိမ္ပတိ. (8)
ဥဒဗိန္ဒု ယထာပိ ပေါက္ခရေ,_
ပဒုမေ ဝါရိ ယထာ န လိမ္ပတိ;
ဧဝံ မုနိ နောပလိမ္ပတိ,
ယဒိဒံ ဒိဋ္ဌသုတံ မုတေသု ဝါ. (9)
ဓောနော န ဟိ တေန မညတိ,
ယဒိဒံ ဒိဋ္ဌသုတံ မုတေသု ဝါ;
နာညေန ဝိသုဒ္ဓိမိစ္ဆတိ,
န ဟိ သော ရဇ္ဇတိ နော ဝိရဇ္ဇတီတိ. (10)
ဇရာသုတ္တံ ဆဋ္ဌံ.