4.8 ပသူရသုတ္တ
ဣဓေဝ သုဒ္ဓီ ဣတိ ဝါဒယန္တိ,_
နာညေသု ဓမ္မေသု ဝိသုဒ္ဓိမာဟု;
ယံ နိဿိတာ တတ္ထ သုဘံ ဝဒါနာ,
ပစ္စေကသစ္စေသု ပုထူ နိဝိဋ္ဌာ. (1)
တေ ဝါဒကာမာ ပရိသံ ဝိဂယှ,
ဗာလံ ဒဟန္တီ မိထု အညမညံ;
ဝဒန္တိ တေ အညသိတာ ကထောဇ္ဇံ,
ပသံသကာမာ ကုသလာ ဝဒါနာ. (2)
ယုတ္တော ကထာယံ ပရိသာယ မဇ္ဈေ,
ပသံသမိစ္ဆံ ဝိနိဃာတိ ဟောတိ;
အပါဟတသ္မိံ ပန မင်္ကု ဟောတိ,
နိန္ဒာယ သော ကုပ္ပတိ ရန္ဓမေသီ. (3)
ယမဿ ဝါဒံ ပရိဟီနမာဟု,
အပါဟတံ ပဉှဝိမံသကာသေ;
ပရိဒေဝတိ သောစတိ ဟီနဝါဒေါ,
ဥပစ္စဂါ မန္တိ အနုတ္ထုနာတိ. (4)_
ဧတေ ဝိဝါဒါ သမဏေသု ဇာတာ,
ဧတေသု ဥဂ္ဃါတိနိဃာတိ ဟောတိ;
ဧတမ္ပိ ဒိသွာ ဝိရမေ ကထောဇ္ဇံ,
န ဟညဒတ္ထတ္ထိ ပသံသလာဘာ. (5)
ပသံသိတော ဝါ ပန တတ္ထ ဟောတိ,
အက္ခာယ ဝါဒံ ပရိသာယ မဇ္ဈေ;
သော ဟဿတီ ဥန္နမတီ စ တေန,
ပပ္ပုယျ တမတ္ထံ ယထာ မနော အဟု. (6)
ယာ ဥန္နတီ သာဿ ဝိဃာတဘူမိ,
မာနာတိမာနံ ဝဒတေ ပနေသော;
ဧတမ္ပိ ဒိသွာ န ဝိဝါဒယေထ,
န ဟိ တေန သုဒ္ဓိံ ကုသလာ ဝဒန္တိ. (7)
သူရော ယထာ ရာဇခါဒါယ ပုဋ္ဌော,
အဘိဂဇ္ဇမေတိ ပဋိသူရမိစ္ဆံ;
ယေနေဝ သော တေန ပလေဟိ သူရ,
ပုဗ္ဗေဝ နတ္ထိ ယဒိဒံ ယုဓာယ. (8)
ယေ ဒိဋ္ဌိမုဂ္ဂယှ ဝိဝါဒယန္တိ,
ဣဒမေဝ သစ္စန္တိ စ ဝါဒယန္တိ;_
တေ တွံ ဝဒဿူ န ဟိ တေဓ အတ္ထိ,
ဝါဒမှိ ဇာတေ ပဋိသေနိကတ္တာ. (9)
ဝိသေနိကတွာ ပန ယေ စရန္တိ,
ဒိဋ္ဌီဟိ ဒိဋ္ဌိံ အဝိရုဇ္ဈမာနာ;
တေသု တွံ ကိံ လဘေထော ပသူရ,
ယေသီဓ နတ္ထီ ပရမုဂ္ဂဟီတံ. (10)
အထ တွံ ပဝိတက္ကမာဂမာ,
မနသာ ဒိဋ္ဌိဂတာနိ စိန္တယန္တော;
ဓောနေန ယုဂံ သမာဂမာ,
န ဟိ တွံ သက္ခသိ သမ္ပယာတဝေတိ. (11)
ပသူရသုတ္တံ အဋ္ဌမံ.