5.1 အဇိတမာဏဝပုစ္ဆာ
“ကေနဿု နိဝုတော လောကော, (ဣစ္စာယသ္မာ အဇိတော)
ကေနဿု နပ္ပကာသတိ;
ကိဿာဘိလေပနံ ဗြူသိ,
ကိံသု တဿ မဟဗ္ဘယံ”. (1)
“အဝိဇ္ဇာယ နိဝုတော လောကော, (အဇိတာတိ ဘဂဝါ)
ဝေဝိစ္ဆာ ပမာဒါ နပ္ပကာသတိ;
ဇပ္ပါဘိလေပနံ ဗြူမိ,
ဒုက္ခမဿ မဟဗ္ဘယံ”. (2)
“သဝန္တိ သဗ္ဗဓိ သောတာ, (ဣစ္စာယသ္မာ အဇိတော)
သောတာနံ ကိံ နိဝါရဏံ;
သောတာနံ သံဝရံ ဗြူဟိ,
ကေန သောတာ ပိဓိယျရေ”. (3)
“ယာနိ သောတာနိ လောကသ္မိံ, (အဇိတာတိ ဘဂဝါ)
သတိ တေသံ နိဝါရဏံ;
သောတာနံ သံဝရံ ဗြူမိ,
ပညာယေတေ ပိဓိယျရေ”. (4)
“ပညာ စေဝ သတိ ယဉ္စ, (ဣစ္စာယသ္မာ အဇိတော)
နာမရူပဉ္စ မာရိသ;
ဧတံ မေ ပုဋ္ဌော ပဗြူဟိ,
ကတ္ထေတံ ဥပရုဇ္ဈတိ”. (5)
“ယမေတံ ပဉှံ အပုစ္ဆိ,
အဇိတ တံ ဝဒါမိ တေ;
ယတ္ထ နာမဉ္စ ရူပဉ္စ,
အသေသံ ဥပရုဇ္ဈတိ;
ဝိညာဏဿ နိရောဓေန,
ဧတ္ထေတံ ဥပရုဇ္ဈတိ”. (6)
“ယေ စ သင်္ခါတဓမ္မာသေ,
ယေ စ သေခါ ပုထူ ဣဓ;
တေသံ မေ နိပကော ဣရိယံ,
ပုဋ္ဌော ပဗြူဟိ မာရိသ”. (7)
“ကာမေသု နာဘိဂိဇ္ဈေယျ,
မနသာနာဝိလော သိယာ;
ကုသလော သဗ္ဗဓမ္မာနံ,
သတော ဘိက္ခု ပရိဗ္ဗဇေ”တိ. (8)
အဇိတမာဏဝပုစ္ဆာ ပဌမာ.