5.11 ဇတုကဏ္ဏိမာဏဝပုစ္ဆာ
Review
1103.
1299
“သုတွာနဟံ ဝီရမကာမကာမိံ, (ဣစ္စာယသ္မာ ဇတုကဏ္ဏိ)
ဩဃာတိဂံ ပုဋ္ဌုမကာမမာဂမံ;
သန္တိပဒံ ဗြူဟိ သဟဇနေတ္တ,
ယထာတစ္ဆံ ဘဂဝါ ဗြူဟိ မေတံ. (1)
1104.
1300
ဘဂဝါ ဟိ ကာမေ အဘိဘုယျ ဣရိယတိ,
အာဒိစ္စောဝ ပထဝိံ တေဇီ တေဇသာ;
ပရိတ္တပညဿ မေ ဘူရိပည,
အာစိက္ခ ဓမ္မံ ယမဟံ ဝိဇညံ;
ဇာတိဇရာယ ဣဓ ဝိပ္ပဟာနံ”. (2)
1105.
1301
“ကာမေသု ဝိနယ ဂေဓံ, (ဇတုကဏ္ဏီတိ ဘဂဝါ)
နေက္ခမ္မံ ဒဋ္ဌု ခေမတော;
ဥဂ္ဂဟီတံ နိရတ္တံ ဝါ,_
မာ တေ ဝိဇ္ဇိတ္ထ ကိဉ္စနံ. (3)
1106.
1302
ယံ ပုဗ္ဗေ တံ ဝိသောသေဟိ,
ပစ္ဆာ တေ မာဟု ကိဉ္စနံ;
မဇ္ဈေ စေ နော ဂဟေဿသိ,
ဥပသန္တော စရိဿသိ. (4)_
1107.
1303
သဗ္ဗသော နာမရူပသ္မိံ,
ဝီတဂေဓဿ ဗြာဟ္မဏ;
အာသဝါဿ န ဝိဇ္ဇန္တိ,
ယေဟိ မစ္စုဝသံ ဝဇေ”တိ. (5)
1304
ဇတုကဏ္ဏိမာဏဝပုစ္ဆာ ဧကာဒသမာ.