5.13 ဥဒယမာဏဝပုစ္ဆာ
Review
1112.
1310
“ဈာယိံ ဝိရဇမာသီနံ, (ဣစ္စာယသ္မာ ဥဒယော)
ကတကိစ္စံ အနာသဝံ;
ပါရဂုံ သဗ္ဗဓမ္မာနံ,
အတ္ထိ ပဉှေန အာဂမံ;
အညာဝိမောက္ခံ ပဗြူဟိ,
အဝိဇ္ဇာယ ပဘေဒနံ”. (1)
1113.
1311
“ပဟာနံ ကာမစ္ဆန္ဒာနံ, (ဥဒယာတိ ဘဂဝါ)
ဒေါမနဿာန စူဘယံ;
ထိနဿ စ ပနူဒနံ,
ကုက္ကုစ္စာနံ နိဝါရဏံ. (2)
1114.
1312
ဥပေက္ခာသတိသံသုဒ္ဓံ,_
ဓမ္မတက္ကပုရေဇဝံ;
အညာဝိမောက္ခံ ပဗြူမိ,
အဝိဇ္ဇာယ ပဘေဒနံ”. (3)
1115.
1313
“ကိံသု သံယောဇနော လောကော,
ကိံသု တဿ ဝိစာရဏံ;
ကိဿဿ ဝိပ္ပဟာနေန,
နိဗ္ဗာနံ ဣတိ ဝုစ္စတိ”. (4)
1116.
1314
“နန္ဒိသံယောဇနော လောကော,
ဝိတက္ကဿ ဝိစာရဏံ;
တဏှာယ ဝိပ္ပဟာနေန,
နိဗ္ဗာနံ ဣတိ ဝုစ္စတိ”. (5)
1117.
1315
“ကထံ သတဿ စရတော,
ဝိညာဏံ ဥပရုဇ္ဈတိ;
ဘဂဝန္တံ ပုဋ္ဌုမာဂမ္မ,
တံ သုဏောမ ဝစော တဝ”. (6)
1118.
1316
“အဇ္ဈတ္တဉ္စ ဗဟိဒ္ဓါ စ,
ဝေဒနံ နာဘိနန္ဒတော;
ဧဝံ သတဿ စရတော,
ဝိညာဏံ ဥပရုဇ္ဈတီ”တိ. (7)
1317
ဥဒယမာဏဝပုစ္ဆာ တေရသမာ.