ပါရာယနာနုဂီတိဂါထာ
“ပါရာယနမနုဂါယိဿံ, (ဣစ္စာယသ္မာ ပိင်္ဂိယော)
ယထာဒ္ဒက္ခိ တထာက္ခာသိ;
ဝိမလော ဘူရိမေဓသော,
နိက္ကာမော နိဗ္ဗနော နာဂေါ;
ကိဿ ဟေတု မုသာ ဘဏေ. (1)
ပဟီနမလမောဟဿ,
မာနမက္ခပ္ပဟာယိနော;
ဟန္ဒာဟံ ကိတ္တယိဿာမိ,
ဂိရံ ဝဏ္ဏူပသဉှိတံ. (2)
တမောနုဒေါ ဗုဒ္ဓေါ သမန္တစက္ခု,
လောကန္တဂူ သဗ္ဗဘဝါတိဝတ္တော;
အနာသဝေါ သဗ္ဗဒုက္ခပ္ပဟီနော,
သစ္စဝှယော ဗြဟ္မေ ဥပါသိတော မေ. (3)
ဒိဇော ယထာ ကုဗ္ဗနကံ ပဟာယ,
ဗဟုပ္ဖလံ ကာနနမာဝသေယျ;
ဧဝမ္ပဟံ အပ္ပဒဿေ ပဟာယ,
မဟောဒဓိံ ဟံသောရိဝ အဇ္ဈပတ္တော. (4)
ယေ မေ ပုဗ္ဗေ ဝိယာကံသု,
ဟုရံ ဂေါတမသာသနာ;
ဣစ္စာသိ ဣတိ ဘဝိဿတိ,_
သဗ္ဗံ တံ ဣတိဟီတိဟံ;
သဗ္ဗံ တံ တက္ကဝဍ္ဎနံ. (5)
ဧကော တမနုဒါသိနော,
ဇုတိမာ သော ပဘင်္ကရော;
ဂေါတမော ဘူရိပညာဏော,
ဂေါတမော ဘူရိမေဓသော. (6)
ယော မေ ဓမ္မမဒေသေသိ,
သန္ဒိဋ္ဌိကမကာလိကံ;
တဏှက္ခယမနီတိကံ,
ယဿ နတ္ထိ ဥပမာ ကွစိ”. (7)
“ကိံ နု တမှာ ဝိပ္ပဝသသိ,
မုဟုတ္တမပိ ပိင်္ဂိယ;
ဂေါတမာ ဘူရိပညာဏာ,
ဂေါတမာ ဘူရိမေဓသာ. (8)
ယော တေ ဓမ္မမဒေသေသိ,
သန္ဒိဋ္ဌိကမကာလိကံ;
တဏှက္ခယမနီတိကံ,
ယဿ နတ္ထိ ဥပမာ ကွစိ”. (9)
“နာဟံ တမှာ ဝိပ္ပဝသာမိ,
မုဟုတ္တမပိ ဗြာဟ္မဏ;
ဂေါတမာ ဘူရိပညာဏာ,
ဂေါတမာ ဘူရိမေဓသာ. (10)
ယော မေ ဓမ္မမဒေသေသိ,
သန္ဒိဋ္ဌိကမကာလိကံ;
တဏှက္ခယမနီတိကံ,
ယဿ နတ္ထိ ဥပမာ ကွစိ. (11)
ပဿာမိ နံ မနသာ စက္ခုနာဝ,
ရတ္တိန္ဒိဝံ ဗြာဟ္မဏ အပ္ပမတ္တော;
နမဿမာနော ဝိဝသေမိ ရတ္တိံ,
တေနေဝ မညာမိ အဝိပ္ပဝါသံ. (12)
သဒ္ဓါ စ ပီတိ စ မနော သတိ စ,
နာပေန္တိမေ ဂေါတမသာသနမှာ;
ယံ ယံ ဒိသံ ဝဇတိ ဘူရိပညော,
သ တေန တေနေဝ နတောဟမသ္မိ. (13)
ဇိဏ္ဏဿ မေ ဒုဗ္ဗလထာမကဿ,
တေနေဝ ကာယော န ပလေတိ တတ္ထ;
သံကပ္ပယန္တာယ ဝဇာမိ နိစ္စံ,
မနော ဟိ မေ ဗြာဟ္မဏ တေန ယုတ္တော. (14)
ပင်္ကေ သယာနော ပရိဖန္ဒမာနော,
ဒီပါ ဒီပံ ဥပပ္လဝိံ;
အထဒ္ဒသာသိံ သမ္ဗုဒ္ဓံ,
ဩဃတိဏ္ဏမနာသဝံ”. (15)
“ယထာ အဟူ ဝက္ကလိ မုတ္တသဒ္ဓေါ,
ဘဒြာဝုဓော အာဠဝိဂေါတမော စ;
ဧဝမေဝံ တွမ္ပိ ပမုဉ္စဿု သဒ္ဓံ,
ဂမိဿသိ တွံ ပိင်္ဂိယ မစ္စုဓေယျဿ ပါရံ”. ((16))
“ဧသ ဘိယျော ပသီဒါမိ,
သုတွာန မုနိနော ဝစော;
ဝိဝဋ္ဋစ္ဆဒေါ သမ္ဗုဒ္ဓေါ,
အခိလော ပဋိဘာနဝါ. (17)
အဓိဒေဝေ အဘိညာယ,
သဗ္ဗံ ဝေဒိ ဝရောဝရံ;
ပဉှာနန္တကရော သတ္ထာ,
ကင်္ခီနံ ပဋိဇာနတံ. (18)
အသံဟီရံ အသံကုပ္ပံ,
ယဿ နတ္ထိ ဥပမာ ကွစိ;
အဒ္ဓါ ဂမိဿာမိ န မေတ္ထ ကင်္ခါ,
ဧဝံ မံ ဓာရေဟိ အဓိမုတ္တစိတ္တန်”တိ. (19)
ပါရာယနဝဂ္ဂေါ ပဉ္စမော.
သုတ္တုဒ္ဒါနံ
ဥရဂေါ ဓနိယောပိ စ,_
ခဂ္ဂဝိသာဏော ကသိ စ;
စုန္ဒော ဘဝေါ ပုနဒေဝ,
ဝသလော စ ကရဏီယဉ္စ;
ဟေမဝတော အထ ယက္ခော,
ဝိဇယသုတ္တံ မုနိသုတ္တဝရန္တိ.
ပဌမကဋ္ဌဝရော ဝရဝဂ္ဂေါ,
ဒွါဒသသုတ္တဓရော သုဝိဘတ္တော;
ဒေသိတော စက္ခုမတာ ဝိမလေန,
သုယျတိ ဝဂ္ဂဝရော ဥရဂေါတိ.
ရတနာမဂန္ဓော ဟိရိမင်္ဂလနာမော,
သုစိလောမကပိလော စ ဗြာဟ္မဏဓမ္မော;
နာဝါ ကိံသီလော်ဋ္ဌဟနော စ,
ရာဟုလော စ ပုနပိ ဝင်္ဂီသော.
သမ္မာပရိဗ္ဗာဇနီယောပိ စေတ္ထ,
ဓမ္မိကသုတ္တဝရော သုဝိဘတ္တော;
စုဒ္ဒသသုတ္တဓရော ဒုတိယမှိ,
စူဠကဝဂ္ဂဝရောတိ တမာဟု.
ပဗ္ဗဇ္ဇပဓာနသုဘာသိတနာမော,
ပူရဠာသော ပုနဒေဝ မာဃော စ;
သဘိယံ ကေဏိယမေဝ သလ္လနာမော,
ဝါသေဋ္ဌဝရော ကာလိကောပိ စ.
နာလကသုတ္တဝရော သုဝိဘတ္တော,
တံ အနုပဿီ တထာ ပုနဒေဝ;
ဒွါဒသသုတ္တဓရော တတိယမှိ,
သုယျတိ ဝဂ္ဂဝရော မဟာနာမော.
ကာမဂုဟဋ္ဌကဒုဋ္ဌကနာမာ,
သုဒ္ဓဝရော ပရမဋ္ဌကနာမော;
ဇရာ မေတ္တိယဝရော သုဝိဘတ္တော,
ပသူရမာဂဏ္ဍိယာ ပုရာဘေဒေါ.
ကလဟဝိဝါဒေါ ဥဘော ဝိယုဟာ စ,
တုဝဋကအတ္တဒဏ္ဍသာရိပုတ္တာ;
သောဠသသုတ္တဓရော စတုတ္ထမှိ,
အဋ္ဌကဝဂ္ဂဝရောတိ တမာဟု.
မဂဓေ ဇနပဒေ ရမဏီယေ,
ဒေသဝရေ ကတပုညနိဝေသေ;
ပါသာဏကစေတိယဝရေ သုဝိဘတ္တေ,
ဝသိ ဘဂဝါ ဂဏသေဋ္ဌော.
ဥဘယဝါသမာဂတိယမှိ,_
ဒွါဒသယောဇနိယာ ပရိသာယ;
သောဠသဗြာဟ္မဏာနံ ကိရ ပုဋ္ဌော,
ပုစ္ဆာယ သောဠသပဉှကမ္မိယာ;
နိပ္ပကာသယိ ဓမ္မမဒါသိ.
အတ္ထပကာသကဗျဉ္ဇနပုဏ္ဏံ,
ဓမ္မမဒေသေသိ ပရခေမဇနိယံ;
လောကဟိတာယ ဇိနော ဒွိပဒဂ္ဂေါ,
သုတ္တဝရံ ဗဟုဓမ္မဝိစိတြံ;
သဗ္ဗကိလေသပမောစနဟေတုံ,
ဒေသယိ သုတ္တဝရံ ဒွိပဒဂ္ဂေါ.
ဗျဉ္ဇနမတ္ထပဒံ သမယုတ္တံ,
အက္ခရသညိတဩပမဂါဠှံ;
လောကဝိစာရဏဉာဏပဘဂ္ဂံ,
ဒေသယိ သုတ္တဝရံ ဒွိပဒဂ္ဂေါ.
ရာဂမလေ အမလံ ဝိမလဂ္ဂံ,
ဒေါသမလေ အမလံ ဝိမလဂ္ဂံ;
မောဟမလေ အမလံ ဝိမလဂ္ဂံ,
လောကဝိစာရဏဉာဏပဘဂ္ဂံ;
ဒေသယိ သုတ္တဝရံ ဒွိပဒဂ္ဂေါ.
က္လေသမလေ အမလံ ဝိမလဂ္ဂံ,
ဒုစ္စရိတမလေ အမလံ ဝိမလဂ္ဂံ;
လောကဝိစာရဏဉာဏပဘဂ္ဂံ,
ဒေသယိ သုတ္တဝရံ ဒွိပဒဂ္ဂေါ.
အာသဝဗန္ဓနယောဂါကိလေသံ,
နီဝရဏာနိ စ တီဏိ မလာနိ;
တဿ ကိလေသပမောစနဟေတုံ,
ဒေသယိ သုတ္တဝရံ ဒွိပဒဂ္ဂေါ.
နိမ္မလသဗ္ဗကိလေသပနူဒံ,
ရာဂဝိရာဂမနေဇမသောကံ;
သန္တပဏီတသုဒုဒ္ဒသဓမ္မံ,
ဒေသယိ သုတ္တဝရံ ဒွိပဒဂ္ဂေါ.
ရာဂဉ္စ ဒေါသကမဘဉ္ဇိတသန္တံ,
ယောနိစတုဂ္ဂတိပဉ္စဝိညာဏံ;
တဏှာရတစ္ဆဒနတာဏလတာပမောက္ခံ,
ဒေသယိ သုတ္တဝရံ ဒွိပဒဂ္ဂေါ.
ဂမ္ဘီရဒုဒ္ဒသသဏှနိပုဏံ,
ပဏ္ဍိတဝေဒနိယံ နိပုဏတ္ထံ;
လောကဝိစာရဏဉာဏပဘဂ္ဂံ,
ဒေသယိ သုတ္တဝရံ ဒွိပဒဂ္ဂေါ.
နဝင်္ဂကုသုမမာလဂီဝေယျံ,
ဣန္ဒြိယဈာနဝိမောက္ခဝိဘတ္တံ;_
အဋ္ဌင်္ဂမဂ္ဂဓရံ ဝရယာနံ,
ဒေသယိ သုတ္တဝရံ ဒွိပဒဂ္ဂေါ.
သောမုပမံ ဝိမလံ ပရိသုဒ္ဓံ,
အဏ္ဏဝမူပမရတနသုစိတ္တံ;
ပုပ္ဖသမံ ရဝိမူပမတေဇံ,
ဒေသယိ သုတ္တဝရံ ဒွိပဒဂ္ဂေါ.
ခေမသိဝံ သုခသီတလသန္တံ,
မစ္စုတတာဏပရံ ပရမတ္ထံ;
တဿ သုနိဗ္ဗုတဒဿနဟေတုံ,
ဒေသယိ သုတ္တဝရံ ဒွိပဒဂ္ဂေါတိ.
သုတ္တနိပါတပါဠိ သမတ္တာ.