ဝတ္ထုဂါထာ
ကောသလာနံ ပုရာ ရမ္မာ,
အဂမာ ဒက္ခိဏာပထံ;
အာကိဉ္စညံ ပတ္ထယာနော,
ဗြာဟ္မဏော မန္တပါရဂူ. (1)
သော အဿကဿ ဝိသယေ,
အဠကဿ သမာသနေ;
ဝသိ ဂေါဓာဝရီကူလေ,
ဥဉ္ဆေန စ ဖလေန စ. (2)_
တဿေဝ ဥပနိဿာယ,
ဂါမော စ ဝိပုလော အဟု;
တတော ဇာတေန အာယေန,
မဟာယညမကပ္ပယိ. (3)
မဟာယညံ ယဇိတွာန,
ပုန ပါဝိသိ အဿမံ;
တသ္မိံ ပဋိပဝိဋ္ဌမှိ,
အညော အာဂဉ္ဆိ ဗြာဟ္မဏော. (4)
ဥဂ္ဃဋ္ဋပါဒေါ တသိတော,_
ပင်္ကဒန္တော ရဇဿိရော;
သော စ နံ ဥပသင်္ကမ္မ,
သတာနိ ပဉ္စ ယာစတိ. (5)
တမေနံ ဗာဝရီ ဒိသွာ,
အာသနေန နိမန္တယိ;
သုခဉ္စ ကုသလံ ပုစ္ဆိ,
ဣဒံ ဝစနမဗြဝိ. (6)_
“ယံ ခေါ မမ ဒေယျဓမ္မံ,
သဗ္ဗံ ဝိသဇ္ဇိတံ မယာ;
အနုဇာနာဟိ မေ ဗြဟ္မေ,
နတ္ထိ ပဉ္စသတာနိ မေ”. (7)
“သစေ မေ ယာစမာနဿ,
ဘဝံ နာနုပဒဿတိ;
သတ္တမေ ဒိဝသေ တုယှံ,
မုဒ္ဓါ ဖလတု သတ္တဓာ”. (8)
အဘိသင်္ခရိတွာ ကုဟကော,
ဘေရဝံ သော အကိတ္တယိ;
တဿ တံ ဝစနံ သုတွာ,
ဗာဝရီ ဒုက္ခိတော အဟု. (9)
ဥဿုဿတိ အနာဟာရော,_
သောကသလ္လသမပ္ပိတော;
အထောပိ ဧဝံ စိတ္တဿ,
ဈာနေ န ရမတီ မနော. (10)
ဥတြသ္တံ ဒုက္ခိတံ ဒိသွာ,_
ဒေဝတာ အတ္ထကာမိနီ;
ဗာဝရိံ ဥပသင်္ကမ္မ,
ဣဒံ ဝစနမဗြဝိ. (11)_
“န သော မုဒ္ဓံ ပဇာနာတိ,
ကုဟကော သော ဓနတ္ထိကော;
မုဒ္ဓနိ မုဒ္ဓပါတေ ဝါ,
ဉာဏံ တဿ န ဝိဇ္ဇတိ”. (12)
“ဘောတီ စရဟိ ဇာနာသိ,
တံ မေ အက္ခာဟိ ပုစ္ဆိတာ;
မုဒ္ဓံ မုဒ္ဓါဓိပါတဉ္စ,
တံ သုဏောမ ဝစော တဝ”. (13)
“အဟမ္ပေတံ န ဇာနာမိ,
ဉာဏမေတ္ထ န ဝိဇ္ဇတိ;
မုဒ္ဓနိ မုဒ္ဓါဓိပါတေ စ,
ဇိနာနံ ဟေတ္ထ ဒဿနံ”. (14)
“အထ ကော စရဟိ ဇာနာတိ,
အသ္မိံ ပထဝိမဏ္ဍလေ;
မုဒ္ဓံ မုဒ္ဓါဓိပါတဉ္စ,
တံ မေ အက္ခာဟိ ဒေဝတေ”. (15)
“ပုရာ ကပိလဝတ္ထုမှာ,
နိက္ခန္တော လောကနာယကော;
အပစ္စော ဩက္ကာကရာဇဿ,
သကျပုတ္တော ပဘင်္ကရော. (16)
သော ဟိ ဗြာဟ္မဏ သမ္ဗုဒ္ဓေါ,
သဗ္ဗဓမ္မာန ပါရဂူ;
သဗ္ဗာဘိညာဗလပ္ပတ္တော,
သဗ္ဗဓမ္မေသု စက္ခုမာ;
သဗ္ဗကမ္မက္ခယံ ပတ္တော,
ဝိမုတ္တော ဥပဓိက္ခယေ. (17)
ဗုဒ္ဓေါ သော ဘဂဝါ လောကေ,
ဓမ္မံ ဒေသေတိ စက္ခုမာ;
တံ တွံ ဂန္တွာန ပုစ္ဆဿု,
သော တေ တံ ဗျာကရိဿတိ”. (18)
သမ္ဗုဒ္ဓေါတိ ဝစော သုတွာ,
ဥဒဂ္ဂေါ ဗာဝရီ အဟု;_
သောကဿ တနုကော အာသိ,
ပီတိဉ္စ ဝိပုလံ လဘိ. (19)
သော ဗာဝရီ အတ္တမနော ဥဒဂ္ဂေါ,
တံ ဒေဝတံ ပုစ္ဆတိ ဝေဒဇာတော;
“ကတမမှိ ဂါမေ နိဂမမှိ ဝါ ပန,
ကတမမှိ ဝါ ဇနပဒေ လောကနာထော;
ယတ္ထ ဂန္တွာန ပဿေမု,
သမ္ဗုဒ္ဓံ ဒွိပဒုတ္တမံ”. (20)
“သာဝတ္ထိယံ ကောသလမန္ဒိရေ ဇိနော,
ပဟူတပညော ဝရဘူရိမေဓသော;
သော သကျပုတ္တော ဝိဓုရော အနာသဝေါ,
မုဒ္ဓါဓိပါတဿ ဝိဒူ နရာသဘော”. (21)
တတော အာမန္တယီ သိဿေ,
ဗြာဟ္မဏေ မန္တပါရဂေ;
“ဧထ မာဏဝါ အက္ခိဿံ,
သုဏာထ ဝစနံ မမ. (22)
ယဿေသော ဒုလ္လဘော လောကေ,
ပါတုဘာဝေါ အဘိဏှသော;
သွာဇ္ဇ လောကမှိ ဥပ္ပန္နော,
သမ္ဗုဒ္ဓေါ ဣတိ ဝိဿုတော;
ခိပ္ပံ ဂန္တွာန သာဝတ္ထိံ,
ပဿဝှေါ ဒွိပဒုတ္တမံ”. (23)
“ကထံ စရဟိ ဇာနေမု,
ဒိသွာ ဗုဒ္ဓေါတိ ဗြာဟ္မဏ;
အဇာနတံ နော ပဗြူဟိ,
ယထာ ဇာနေမု တံ မယံ”. (24)
“အာဂတာနိ ဟိ မန္တေသု,
မဟာပုရိသလက္ခဏာ;
ဒွတ္တိံသာနိ စ ဗျာက္ခာတာ,
သမတ္တာ အနုပုဗ္ဗသော. (25)
ယဿေတေ ဟောန္တိ ဂတ္တေသု,
မဟာပုရိသလက္ခဏာ;
ဒွေယေဝ တဿ ဂတိယော,
တတိယာ ဟိ န ဝိဇ္ဇတိ. (26)
သစေ အဂါရံ အာဝသတိ,
ဝိဇေယျ ပထဝိံ ဣမံ;
အဒဏ္ဍေန အသတ္ထေန,
ဓမ္မေန မနုသာသတိ. (27)
သစေ စ သော ပဗ္ဗဇတိ,
အဂါရာ အနဂါရိယံ;
ဝိဝဋ္ဋစ္ဆဒေါ သမ္ဗုဒ္ဓေါ,
အရဟာ ဘဝတိ အနုတ္တရော. (28)
ဇာတိံ ဂေါတ္တဉ္စ လက္ခဏံ,
မန္တေ သိဿေ ပုနာပရေ;
မုဒ္ဓံ မုဒ္ဓါဓိပါတဉ္စ,
မနသာယေဝ ပုစ္ဆထ. (29)
အနာဝရဏဒဿာဝီ,
ယဒိ ဗုဒ္ဓေါ ဘဝိဿတိ;
မနသာ ပုစ္ဆိတေ ပဉှေ,
ဝါစာယ ဝိဿဇေဿတိ”. (30)
ဗာဝရိဿ ဝစော သုတွာ,
သိဿာ သောဠသ ဗြာဟ္မဏာ;
အဇိတော တိဿမေတ္တေယျော,
ပုဏ္ဏကော အထ မေတ္တဂူ. (31)
ဓောတကော ဥပသီဝေါ စ,
နန္ဒော စ အထ ဟေမကော;
တောဒေယျ-ကပ္ပါ ဒုဘယော,
ဇတုကဏ္ဏီ စ ပဏ္ဍိတော. (32)
ဘဒြာဝုဓော ဥဒယော စ,
ပေါသာလော စာပိ ဗြာဟ္မဏော;
မောဃရာဇာ စ မေဓာဝီ,
ပိင်္ဂိယော စ မဟာဣသိ. (33)
ပစ္စေကဂဏိနော သဗ္ဗေ,
သဗ္ဗလောကဿ ဝိဿုတာ;
ဈာယီ ဈာနရတာ ဓီရာ,
ပုဗ္ဗဝါသနဝါသိတာ. (34)
ဗာဝရိံ အဘိဝါဒေတွာ,
ကတွာ စ နံ ပဒက္ခိဏံ;
ဇဋာဇိနဓရာ သဗ္ဗေ,
ပက္ကာမုံ ဥတ္တရာမုခါ. (35)
အဠကဿ ပတိဋ္ဌာနံ,
ပုရိမာဟိဿတိံ တဒါ;
ဥဇ္ဇေနိဉ္စာပိ ဂေါနဒ္ဓံ,_
ဝေဒိသံ ဝနသဝှယံ. (36)
ကောသမ္ဗိဉ္စာပိ သာကေတံ,
သာဝတ္ထိဉ္စ ပုရုတ္တမံ;
သေတဗျံ ကပိလဝတ္ထုံ,
ကုသိနာရဉ္စ မန္ဒိရံ. (37)
ပါဝဉ္စ ဘောဂနဂရံ,
ဝေသာလိံ မာဂဓံ ပုရံ;
ပါသာဏကံ စေတိယဉ္စ,
ရမဏီယံ မနောရမံ. (38)
တသိတောဝုဒကံ သီတံ,
မဟာလာဘံဝ ဝါဏိဇော;
ဆာယံ ဃမ္မာဘိတတ္တောဝ,
တုရိတာ ပဗ္ဗတမာရုဟုံ. (39)
ဘဂဝါ တမှိ သမယေ,
ဘိက္ခုသံဃပုရက္ခတော;
ဘိက္ခူနံ ဓမ္မံ ဒေသေတိ,
သီဟောဝ နဒတီ ဝနေ. (40)
အဇိတော အဒ္ဒသ ဗုဒ္ဓံ,
သတရံသိံဝ ဘာဏုမံ;
စန္ဒံ ယထာ ပန္နရသေ,
ပါရိပူရိံ ဥပါဂတံ. (41)
အထဿ ဂတ္တေ ဒိသွာန,
ပရိပူရဉ္စ ဗျဉ္ဇနံ;
ဧကမန္တံ ဌိတော ဟဋ္ဌော,
မနောပဉှေ အပုစ္ဆထ. (42)
“အာဒိဿ ဇမ္မနံ ဗြူဟိ,
ဂေါတ္တံ ဗြူဟိ သလက္ခဏံ;
မန္တေသု ပါရမိံ ဗြူဟိ,
ကတိ ဝါစေတိ ဗြာဟ္မဏော”. (43)
“ဝီသံ ဝဿသတံ အာယု,
သော စ ဂေါတ္တေန ဗာဝရီ;
တီဏိဿ လက္ခဏာ ဂတ္တေ,
တိဏ္ဏံ ဝေဒါန ပါရဂူ. (44)
လက္ခဏေ ဣတိဟာသေ စ,
သနိဃဏ္ဍုသကေဋုဘေ;
ပဉ္စသတာနိ ဝါစေတိ,
သဓမ္မေ ပါရမိံ ဂတော”. (45)
“လက္ခဏာနံ ပဝိစယံ,
ဗာဝရိဿ နရုတ္တမ;
ကင်္ခစ္ဆိဒ ပကာသေဟိ,
မာ နော ကင်္ခါယိတံ အဟု”. (46)
“မုခံ ဇိဝှါယ ဆာဒေတိ,
ဥဏ္ဏဿ ဘမုကန္တရေ;_
ကောသောဟိတံ ဝတ္ထဂုယှံ,
ဧဝံ ဇာနာဟိ မာဏဝ”. (47)
ပုစ္ဆဉှိ ကိဉ္စိ အသုဏန္တော,
သုတွာ ပဉှေ ဝိယာကတေ;
ဝိစိန္တေတိ ဇနော သဗ္ဗော,
ဝေဒဇာတော ကတဉ္ဇလီ. (48)
“ကော နု ဒေဝေါ ဝါ ဗြဟ္မာ ဝါ,
ဣန္ဒော ဝါပိ သုဇမ္ပတိ;_
မနသာ ပုစ္ဆိတေ ပဉှေ,
ကမေတံ ပဋိဘာသတိ”. (49)
“မုဒ္ဓံ မုဒ္ဓါဓိပါတဉ္စ,
ဗာဝရီ ပရိပုစ္ဆတိ;
တံ ဗျာကရောဟိ ဘဂဝါ,
ကင်္ခံ ဝိနယ နော ဣသေ”. (50)
“အဝိဇ္ဇာ မုဒ္ဓါတိ ဇာနာဟိ,
ဝိဇ္ဇာ မုဒ္ဓါဓိပါတိနီ;
သဒ္ဓါသတိသမာဓီဟိ,
ဆန္ဒဝိရိယေန သံယုတာ”. (51)
တတော ဝေဒေန မဟတာ,
သန္ထမ္ဘိတွာန မာဏဝေါ;
ဧကံသံ အဇိနံ ကတွာ,
ပါဒေသု သိရသာ ပတိ. (52)
“ဗာဝရီ ဗြာဟ္မဏော ဘောတော,
သဟ သိဿေဟိ မာရိသ;
ဥဒဂ္ဂစိတ္တော သုမနော,_
ပါဒေ ဝန္ဒတိ စက္ခုမ”. (53)
“သုခိတော ဗာဝရီ ဟောတု,
သဟ သိဿေဟိ ဗြာဟ္မဏော;
တွဉ္စာပိ သုခိတော ဟောဟိ,
စိရံ ဇီဝါဟိ မာဏဝ. (54)
ဗာဝရိဿ စ တုယှံ ဝါ,
သဗ္ဗေသံ သဗ္ဗသံသယံ;
ကတာဝကာသာ ပုစ္ဆဝှေါ,
ယံ ကိဉ္စိ မနသိစ္ဆထ”. (55)
သမ္ဗုဒ္ဓေန ကတောကာသော,
နိသီဒိတွာန ပဉ္ဇလီ;
အဇိတော ပဌမံ ပဉှံ,
တတ္ထ ပုစ္ဆိ တထာဂတံ. (56)
ဝတ္ထုဂါထာ နိဋ္ဌိတာ.