1.7 အဇကလာပကသုတ္တ
Review
7.
33
ဧဝံ မေ သုတံ— ဧကံ သမယံ ဘဂဝါ ပါဝါယံ ဝိဟရတိ အဇကလာပကေ စေတိယေ, အဇကလာပကဿ ယက္ခဿ ဘဝနေ. တေန ခေါ ပန သမယေန ဘဂဝါ ရတ္တန္ဓကာရတိမိသာယံ အဗ္ဘောကာသေ နိသိန္နော ဟောတိ; ဒေဝေါ စ ဧကမေကံ ဖုသာယတိ. အထ ခေါ အဇကလာပကော ယက္ခော ဘဂဝတော ဘယံ ဆမ္ဘိတတ္တံ လောမဟံသံ ဥပ္ပါဒေတုကာမော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝတော အဝိဒူရေ တိက္ခတ္တုံ “အက္ကုလော ပက္ကုလော”တိ အက္ကုလပက္ကုလိကံ အကာသိ— “ဧသော တေ, သမဏ, ပိသာစော”တိ.
34
အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ—
35
“ယဒါ သကေသု ဓမ္မေသု,
ပါရဂူ ဟောတိ ဗြာဟ္မဏော;
အထ ဧတံ ပိသာစဉ္စ,
ပက္ကုလဉ္စာတိဝတ္တတီ”တိ. (7)
36
သတ္တမံ.