1.9 ဇဋိလသုတ္တ
Review
9.
46
ဧဝံ မေ သုတံ— ဧကံ သမယံ ဘဂဝါ ဂယာယံ ဝိဟရတိ ဂယာသီသေ. တေန ခေါ ပန သမယေန သမ္ဗဟုလာ ဇဋိလာ သီတာသု ဟေမန္တိကာသု ရတ္တီသု အန္တရဋ္ဌကေ ဟိမပါတသမယေ ဂယာယံ ဥမ္မုဇ္ဇန္တိပိ နိမုဇ္ဇန္တိပိ, ဥမ္မုဇ္ဇနိမုဇ္ဇမ္ပိ ကရောန္တိ ဩသိဉ္စန္တိပိ, အဂ္ဂိမ္ပိ ဇုဟန္တိ— “ဣမိနာ သုဒ္ဓီ”တိ.
47
အဒ္ဒသာ ခေါ ဘဂဝါ တေ သမ္ဗဟုလေ ဇဋိလေ သီတာသု ဟေမန္တိကာသု ရတ္တီသု အန္တရဋ္ဌကေ ဟိမပါတသမယေ ဂယာယံ ဥမ္မုဇ္ဇန္တေပိ နိမုဇ္ဇန္တေပိ ဥမ္မုဇ္ဇနိမုဇ္ဇမ္ပိ ကရောန္တေ ဩသိဉ္စန္တေပိ အဂ္ဂိမ္ပိ ဇုဟန္တေ— “ဣမိနာ သုဒ္ဓီ”တိ.
48
အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ—
49
“န ဥဒကေန သုစီ ဟောတိ,
ဗဟွေတ္ထ နှာယတီ ဇနော;
ယမှိ သစ္စဉ္စ ဓမ္မော စ,
သော သုစီ သော စ ဗြာဟ္မဏော”တိ. (9)
50
နဝမံ.