2.3 ဒဏ္ဍသုတ္တ
Review
13.
85
ဧဝံ မေ သုတံ— ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန သမ္ဗဟုလာ ကုမာရကာ အန္တရာ စ သာဝတ္ထိံ အန္တရာ စ ဇေတဝနံ အဟိံ ဒဏ္ဍေန ဟနန္တိ. အထ ခေါ ဘဂဝါ ပုဗ္ဗဏှသမယံ နိဝါသေတွာ ပတ္တစီဝရမာဒါယ သာဝတ္ထိံ ပိဏ္ဍာယ ပါဝိသိ. အဒ္ဒသာ ခေါ ဘဂဝါ သမ္ဗဟုလေ ကုမာရကေ အန္တရာ စ သာဝတ္ထိံ အန္တရာ စ ဇေတဝနံ အဟိံ ဒဏ္ဍေန ဟနန္တေ.
86
အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ—
87
“သုခကာမာနိ ဘူတာနိ,
ယော ဒဏ္ဍေန ဝိဟိံသတိ;
အတ္တနော သုခမေသာနော,
ပေစ္စ သော န လဘတေ သုခံ. (15)
88
သုခကာမာနိ ဘူတာနိ,
ယော ဒဏ္ဍေန န ဟိံသတိ;
အတ္တနော သုခမေသာနော,
ပေစ္စ သော လဘတေ သုခန်”တိ. (16)
89
တတိယံ.