3.10 လောကသုတ္တ
ဧဝံ မေ သုတံ— ဧကံ သမယံ ဘဂဝါ ဥရုဝေလာယံ ဝိဟရတိ နဇ္ဇာ နေရဉ္ဇရာယ တီရေ ဗောဓိရုက္ခမူလေ ပဌမာဘိသမ္ဗုဒ္ဓေါ. တေန ခေါ ပန သမယေန ဘဂဝါ သတ္တာဟံ ဧကပလ္လင်္ကေန နိသိန္နော ဟောတိ ဝိမုတ္တိသုခပဋိသံဝေဒီ.
အထ ခေါ ဘဂဝါ တဿ သတ္တာဟဿ အစ္စယေန တမှာ သမာဓိမှာ ဝုဋ္ဌဟိတွာ ဗုဒ္ဓစက္ခုနာ လောကံ ဝေါလောကေသိ. အဒ္ဒသာ ခေါ ဘဂဝါ ဗုဒ္ဓစက္ခုနာ ဝေါလောကေန္တော သတ္တေ အနေကေဟိ သန္တာပေဟိ သန္တပ္ပမာနေ, အနေကေဟိ စ ပရိဠာဟေဟိ ပရိဍယှမာနေ— ရာဂဇေဟိပိ, ဒေါသဇေဟိပိ, မောဟဇေဟိပိ.
အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ—
“အယံ လောကော သန္တာပဇာတော,
ဖဿပရေတော ရောဂံ ဝဒတိ အတ္တတော;
ယေန ယေန ဟိ မညတိ,
တတော တံ ဟောတိ အညထာ. (34)
အညထာဘာဝီ ဘဝသတ္တော လောကော,
ဘဝပရေတော ဘဝမေဝါဘိနန္ဒတိ;
ယဒဘိနန္ဒတိ တံ ဘယံ,
ယဿ ဘာယတိ တံ ဒုက္ခံ;
ဘဝဝိပ္ပဟာနာယ ခေါ,
ပနိဒံ ဗြဟ္မစရိယံ ဝုဿတိ. (35)
‘ယေ ဟိ ကေစိ သမဏာ ဝါ ဗြာဟ္မဏာ ဝါ ဘဝေန ဘဝဿ ဝိပ္ပမောက္ခမာဟံသု, သဗ္ဗေ တေ အဝိပ္ပမုတ္တာ ဘဝသ္မာ’တိ ဝဒါမိ. ‘ယေ ဝါ ပန ကေစိ သမဏာ ဝါ ဗြာဟ္မဏာ ဝါ ဝိဘဝေန ဘဝဿ နိဿရဏမာဟံသု, သဗ္ဗေ တေ အနိဿဋာ ဘဝသ္မာ’တိ ဝဒါမိ.
ဥပဓိဉှိ ပဋိစ္စ ဒုက္ခမိဒံ သမ္ဘောတိ, သဗ္ဗုပါဒါနက္ခယာ နတ္ထိ ဒုက္ခဿ သမ္ဘဝေါ. လောကမိမံ ပဿ; ပုထူ အဝိဇ္ဇာယ ပရေတာ ဘူတာ ဘူတရတာ အပရိမုတ္တာ; ယေ ဟိ ကေစိ ဘဝါ သဗ္ဗဓိ သဗ္ဗတ္ထတာယ သဗ္ဗေ တေ ဘဝါ အနိစ္စာ ဒုက္ခာ ဝိပရိဏာမဓမ္မာတိ.
ဧဝမေတံ ယထာဘူတံ,
သမ္မပ္ပညာယ ပဿတော;
ဘဝတဏှာ ပဟီယတိ,
ဝိဘဝံ နာဘိနန္ဒတိ;
သဗ္ဗသော တဏှာနံ ခယာ,
အသေသဝိရာဂနိရောဓော နိဗ္ဗာနံ. (36)
တဿ နိဗ္ဗုတဿ ဘိက္ခုနော,
အနုပါဒါ ပုနဗ္ဘဝေါ န ဟောတိ;
အဘိဘူတော မာရော ဝိဇိတသင်္ဂါမော,
ဥပစ္စဂါ သဗ္ဗဘဝါနိ တာဒီ”တိ. (37)_
ဒသမံ.
နန္ဒဝဂ္ဂေါ တတိယော.
တဿုဒ္ဒါနံ
ကမ္မံ နန္ဒော ယသောဇော စ,
သာရိပုတ္တော စ ကောလိတော;
ပိလိန္ဒော ကဿပေါ ပိဏ္ဍော,
သိပ္ပံ လောကေန တေ ဒသာတိ.