5.2 အပ္ပါယုကသုတ္တ
Review
42.
358
ဧဝံ မေ သုတံ— ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. အထ ခေါ အာယသ္မာ အာနန္ဒော သာယနှသမယံ ပဋိသလ္လာနာ ဝုဋ္ဌိတော ယေန ဘဂဝါ တေနုပသင်္ကမိ; ဥပသင်္ကမိတွာ ဘဂဝန္တံ အဘိဝါဒေတွာ ဧကမန္တံ နိသီဒိ. ဧကမန္တံ နိသိန္နော ခေါ အာယသ္မာ အာနန္ဒော ဘဂဝန္တံ ဧတဒဝေါစ— “အစ္ဆရိယံ, ဘန္တေ, အဗ္ဘုတံ, ဘန္တေ. ယာဝ အပ္ပါယုကာ ဟိ, ဘန္တေ, ဘဂဝတော မာတာ အဟောသိ, သတ္တာဟဇာတေ ဘဂဝတိ ဘဂဝတော မာတာ ကာလမကာသိ, တုသိတံ ကာယံ ဥပပဇ္ဇီ”တိ.
359
“ဧဝမေတံ, အာနန္ဒ, အပ္ပါယုကာ ဟိ, အာနန္ဒ, ဗောဓိသတ္တမာတရော ဟောန္တိ. သတ္တာဟဇာတေသု ဗောဓိသတ္တေသု ဗောဓိသတ္တမာတရော ကာလံ ကရောန္တိ, တုသိတံ ကာယံ ဥပပဇ္ဇန္တီ”တိ.
360
အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ—
361
“ယေ ကေစိ ဘူတာ ဘဝိဿန္တိ ယေ ဝါပိ,
သဗ္ဗေ ဂမိဿန္တိ ပဟာယ ဒေဟံ;
တံ သဗ္ဗဇာနိံ ကုသလော ဝိဒိတွာ,
အာတာပိယော ဗြဟ္မစရိယံ စရေယျာ”တိ. (52)
362
ဒုတိယံ.