6.3 ပစ္စဝေက္ခဏသုတ္တ
Review
53.
486
ဧဝံ မေ သုတံ— ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန ဘဂဝါ အတ္တနော အနေကေ ပါပကေ အကုသလေ ဓမ္မေ ပဟီနေ ပစ္စဝေက္ခမာနော နိသိန္နော ဟောတိ, အနေကေ စ ကုသလေ ဓမ္မေ ဘာဝနာပါရိပူရိံ ဂတေ.
487
အထ ခေါ ဘဂဝါ အတ္တနော အနေကေ ပါပကေ အကုသလေ ဓမ္မေ ပဟီနေ ဝိဒိတွာ အနေကေ စ ကုသလေ ဓမ္မေ ဘာဝနာပါရိပူရိံ ဂတေ တာယံ ဝေလာယံ ဣမံ ဥဒါနံ ဥဒါနေသိ—
488
“အဟု ပုဗ္ဗေ တဒါ နာဟု,
နာဟု ပုဗ္ဗေ တဒါ အဟု;
န စာဟု န စ ဘဝိဿတိ,
န စေတရဟိ ဝိဇ္ဇတီ”တိ. (64)
489
တတိယံ.