7.8 ကစ္စာနသုတ္တ
Review
68.
639
ဧဝံ မေ သုတံ— ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တေန ခေါ ပန သမယေန အာယသ္မာ မဟာကစ္စာနော ဘဂဝတော အဝိဒူရေ နိသိန္နော ဟောတိ ပလ္လင်္ကံ အာဘုဇိတွာ ဥဇုံ ကာယံ ပဏိဓာယ ကာယဂတာယ သတိယာ အဇ္ဈတ္တံ ပရိမုခံ သူပဋ္ဌိတာယ.
640
အဒ္ဒသာ ခေါ ဘဂဝါ အာယသ္မန္တံ မဟာကစ္စာနံ အဝိဒူရေ နိသိန္နံ ပလ္လင်္ကံ အာဘုဇိတွာ ဥဇုံ ကာယံ ပဏိဓာယ ကာယဂတာယ သတိယာ အဇ္ဈတ္တံ ပရိမုခံ သူပဋ္ဌိတာယ.
641
အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ—
642
“ယဿ သိယာ သဗ္ဗဒါ သတိ,
သတတံ ကာယဂတာ ဥပဋ္ဌိတာ;
နော စဿ နော စ မေ သိယာ,
န ဘဝိဿတိ န စ မေ ဘဝိဿတိ;
အနုပုဗ္ဗဝိဟာရိ တတ္ထ သော,
ကာလေနေဝ တရေ ဝိသတ္တိကန်”တိ. (81)
643
အဋ္ဌမံ.