8.10 ဒုတိယဒဗ္ဗသုတ္တ
ဧဝံ မေ သုတံ— ဧကံ သမယံ ဘဂဝါ သာဝတ္ထိယံ ဝိဟရတိ ဇေတဝနေ အနာထပိဏ္ဍိကဿ အာရာမေ. တတြ ခေါ ဘဂဝါ ဘိက္ခူ အာမန္တေသိ— “ဘိက္ခဝေါ”တိ. “ဘဒန္တေ”တိ တေ ဘိက္ခူ ဘဂဝတော ပစ္စဿောသုံ. ဘဂဝါ ဧတဒဝေါစ—
“ဒဗ္ဗဿ, ဘိက္ခဝေ, မလ္လပုတ္တဿ ဝေဟာသံ အဗ္ဘုဂ္ဂန္တွာ အာကာသေ အန္တလိက္ခေ ပလ္လင်္ကေန နိသီဒိတွာ တေဇောဓာတုံ သမာပဇ္ဇိတွာ ဝုဋ္ဌဟိတွာ ပရိနိဗ္ဗုတဿ သရီရဿ ဈာယမာနဿ ဍယှမာနဿ နေဝ ဆာရိကာ ပညာယိတ္ထ န မသိ. သေယျထာပိ နာမ သပ္ပိဿ ဝါ တေလဿ ဝါ ဈာယမာနဿ ဍယှမာနဿ နေဝ ဆာရိကာ ပညာယတိ န မသိ; ဧဝမေဝံ ခေါ, ဘိက္ခဝေ, ဒဗ္ဗဿ မလ္လပုတ္တဿ ဝေဟာသံ အဗ္ဘုဂ္ဂန္တွာ အာကာသေ အန္တလိက္ခေ ပလ္လင်္ကေန နိသီဒိတွာ တေဇောဓာတုံ သမာပဇ္ဇိတွာ ဝုဋ္ဌဟိတွာ ပရိနိဗ္ဗုတဿ သရီရဿ ဈာယမာနဿ ဍယှမာနဿ နေဝ ဆာရိကာ ပညာယိတ္ထ န မသီ”တိ.
အထ ခေါ ဘဂဝါ ဧတမတ္ထံ ဝိဒိတွာ တာယံ ဝေလာယံ ဣမံ ဥဒါနံ ဥဒါနေသိ—
“အယောဃနဟတဿေဝ,
ဇလတော ဇာတဝေဒသော;
အနုပုဗ္ဗူပသန္တဿ,
ယထာ န ဉာယတေ ဂတိ. (94)
ဧဝံ သမ္မာဝိမုတ္တာနံ,
ကာမဗန္ဓောဃတာရိနံ;
ပညာပေတုံ ဂတိ နတ္ထိ,
ပတ္တာနံ အစလံ သုခန်”တိ. (95)
ဒသမံ.
ပါဋလိဂါမိယဝဂ္ဂေါ အဋ္ဌမော.
တဿုဒ္ဒါနံ
နိဗ္ဗာနာ စတုရော ဝုတ္တာ,
စုန္ဒော ပါဋလိဂါမိယာ;
ဒွိဓာပထော ဝိသာခါ စ,
ဒဗ္ဗေန သဟ တေ ဒသာတိ.
ဥဒါနေ ဝဂ္ဂါနမုဒ္ဒါနံ
ဝဂ္ဂမိဒံ ပဌမံ ဝရဗောဓိ,
ဝဂ္ဂမိဒံ ဒုတိယံ မုစလိန္ဒော;
နန္ဒကဝဂ္ဂဝရော တတိယော တု,
မေဃိယဝဂ္ဂဝရော စ စတုတ္ထော.
ပဉ္စမဝဂ္ဂဝရန္တိဓ သောဏော,
ဆဋ္ဌမဝဂ္ဂဝရန္တိ ဇစ္စန္ဓော;
သတ္တမဝဂ္ဂဝရန္တိ စ စူဠော,
ပါဋလိဂါမိယမဋ္ဌမဝဂ္ဂေါ.
အသီတိမနူနကသုတ္တဝရံ,
ဝဂ္ဂမိဒဋ္ဌကံ သုဝိဘတ္တံ;
ဒဿိတံ စက္ခုမတာ ဝိမလေန,
အဒ္ဓါ ဟိ တံ ဥဒါနမိတီဒမာဟု.
ဥဒါနပါဠိ နိဋ္ဌိတာ.