2.3.4 သုဝဏ္ဏဝိမာနဝတ္ထု
“သောဝဏ္ဏမယေ ပဗ္ဗတသ္မိံ,
ဝိမာနံ သဗ္ဗတောပဘံ;
ဟေမဇာလပဋိစ္ဆန္နံ,
ကိင်္ကိဏိဇာလကပ္ပိတံ.
အဋ္ဌံသာ သုကတာ ထမ္ဘာ,
သဗ္ဗေ ဝေဠုရိယာမယာ;
ဧကမေကာယ အံသိယာ,
ရတနာ သတ္တ နိမ္မိတာ.
ဝေဠုရိယသုဝဏ္ဏဿ,
ဖလိကာ ရူပိယဿ စ;
မသာရဂလ္လမုတ္တာဟိ,
လောဟိတင်္ဂမဏီဟိ စ.
စိတြာ မနောရမာ ဘူမိ,
န တတ္ထုဒ္ဓံသတီ ရဇော;
ဂေါပါနသီဂဏာ ပီတာ,
ကူဋံ ဓာရေန္တိ နိမ္မိတာ.
သောပါနာနိ စ စတ္တာရိ,
နိမ္မိတာ စတုရော ဒိသာ;
နာနာရတနဂဗ္ဘေဟိ,
အာဒိစ္စောဝ ဝိရောစတိ.
ဝေဒိယာ စတဿော တတ္ထ,
ဝိဘတ္တာ ဘာဂသော မိတာ;
ဒဒ္ဒလ္လမာနာ အာဘန္တိ,
သမန္တာ စတုရော ဒိသာ.
တသ္မိံ ဝိမာနေ ပဝရေ,
ဒေဝပုတ္တော မဟပ္ပဘော;
အတိရောစသိ ဝဏ္ဏေန,
ဥဒယန္တောဝ ဘာဏုမာ._
ဒါနဿ တေ ဣဒံ ဖလံ,
အထော သီလဿ ဝါ ပန;
အထော အဉ္ဇလိကမ္မဿ,
တံ မေ အက္ခာဟိ ပုစ္ဆိတော”.
သော ဒေဝပုတ္တော အတ္တမနော,
_ …ပေ… _
ယဿ ကမ္မဿိဒံ ဖလံ.
“အဟံ အန္ဓကဝိန္ဒသ္မိံ,
ဗုဒ္ဓဿာဒိစ္စဗန္ဓုနော;
ဝိဟာရံ သတ္ထု ကာရေသိံ,
ပသန္နော သေဟိ ပါဏိဘိ.
တတ္ထ ဂန္ဓဉ္စ မာလဉ္စ,
ပစ္စယဉ္စ ဝိလေပနံ;
ဝိဟာရံ သတ္ထု အဒါသိံ,
ဝိပ္ပသန္နေန စေတသာ;
တေန မယှံ ဣဒံ လဒ္ဓံ,
ဝသံ ဝတ္တေမိ နန္ဒနေ.
နန္ဒနေ စ ဝနေ ရမ္မေ,
နာနာဒိဇဂဏာယုတေ;
ရမာမိ နစ္စဂီတေဟိ,
အစ္ဆရာဟိ ပုရက္ခတော”တိ.
သုဝဏ္ဏဝိမာနံ စတုတ္ထံ.