2.3.8 အနေကဝဏ္ဏဝိမာနဝတ္ထု
“အနေကဝဏ္ဏံ ဒရသောကနာသနံ,
ဝိမာနမာရုယှ အနေကစိတ္တံ;
ပရိဝါရိတော အစ္ဆရာသင်္ဂဏေန,
သုနိမ္မိတော ဘူတပတီဝ မောဒသိ.
သမဿမော နတ္ထိ ကုတော ပနုတ္တရော,
ယသေန ပုညေန စ ဣဒ္ဓိယာ စ;
သဗ္ဗေ စ ဒေဝါ တိဒသဂဏာ သမေစ္စ,
တံ တံ နမဿန္တိ သသိံဝ ဒေဝါ;
ဣမာ စ တေ အစ္ဆရာယော သမန္တတော,_
နစ္စန္တိ ဂါယန္တိ ပမောဒယန္တိ.
ဒေဝိဒ္ဓိပတ္တောသိ မဟာနုဘာဝေါ,
မနုဿဘူတော ကိမကာသိ ပုညံ;
ကေနာသိ ဧဝံ ဇလိတာနုဘာဝေါ,
ဝဏ္ဏော စ တေ သဗ္ဗဒိသာ ပဘာသတီ”တိ.
သော ဒေဝပုတ္တော အတ္တမနော,
_ …ပေ… _
ယဿ ကမ္မဿိဒံ ဖလံ.
“အဟံ ဘဒန္တေ အဟုဝါသိ ပုဗ္ဗေ,
သုမေဓနာမဿ ဇိနဿ သာဝကော;
ပုထုဇ္ဇနော အနနုဗောဓောဟမသ္မိ,
သော သတ္တ ဝဿာနိ ပရိဗ္ဗဇိဿဟံ.
သောဟံ သုမေဓဿ ဇိနဿ သတ္ထုနော,
ပရိနိဗ္ဗုတဿောဃတိဏ္ဏဿ တာဒိနော;
ရတနုစ္စယံ ဟေမဇာလေန ဆန္နံ,
ဝန္ဒိတွာ ထူပသ္မိံ မနံ ပသာဒယိံ.
န မာသိ ဒါနံ န စ မတ္ထိ ဒါတုံ,
ပရေ စ ခေါ တတ္ထ သမာဒပေသိံ;
ပူဇေထ နံ ပူဇနီယဿ ဓာတုံ,
ဧဝံ ကိရ သဂ္ဂမိတော ဂမိဿထ.
တဒေဝ ကမ္မံ ကုသလံ ကတံ မယာ,
သုခဉ္စ ဒိဗ္ဗံ အနုဘောမိ အတ္တနာ;
မောဒါမဟံ တိဒသဂဏဿ မဇ္ဈေ,
န တဿ ပုညဿ ခယမ္ပိ အဇ္ဈဂန်”တိ.
အနေကဝဏ္ဏဝိမာနံ အဋ္ဌမံ.