2.3.12 နိရောဓဓမ္မသုတ္တ
သာဝတ္ထိနိဒါနံ. အာယသ္မာ ရာဓော ဘဂဝန္တံ ဧတဒဝေါစ— “သာဓု မေ, ဘန္တေ, ဘဂဝါ သံခိတ္တေန ဓမ္မံ ဒေသေတု, ယမဟံ ဘဂဝတော ဓမ္မံ သုတွာ ဧကော ဝူပကဋ္ဌော အပ္ပမတ္တော အာတာပီ ပဟိတတ္တော ဝိဟရေယျန်”တိ.
“ယော ခေါ, ရာဓ, နိရောဓဓမ္မော; တတြ တေ ဆန္ဒော ပဟာတဗ္ဗော, ရာဂေါ ပဟာတဗ္ဗော, ဆန္ဒရာဂေါ ပဟာတဗ္ဗော. ကော စ, ရာဓ, နိရောဓဓမ္မော? ရူပံ ခေါ, ရာဓ, နိရောဓဓမ္မော; တတြ တေ ဆန္ဒော ပဟာတဗ္ဗော …ပေ… ဝေဒနာ နိရောဓဓမ္မော; တတြ တေ ဆန္ဒော ပဟာတဗ္ဗော …ပေ… သညာ နိရောဓဓမ္မော; တတြ တေ ဆန္ဒော ပဟာတဗ္ဗော …ပေ… သင်္ခါရာ နိရောဓဓမ္မော; တတြ တေ ဆန္ဒော ပဟာတဗ္ဗော …ပေ… ဝိညာဏံ နိရောဓဓမ္မော; တတြ တေ ဆန္ဒော ပဟာတဗ္ဗော …ပေ… ယော ခေါ, ရာဓ, နိရောဓဓမ္မော; တတြ တေ ဆန္ဒော ပဟာတဗ္ဗော, ရာဂေါ ပဟာတဗ္ဗော, ဆန္ဒရာဂေါ ပဟာတဗ္ဗော”တိ.
အာယာစနဝဂ္ဂေါ တတိယော.
တဿုဒ္ဒါနံ
မာရော စ မာရဓမ္မော စ,
အနိစ္စေန အပရေ ဒုဝေ;
ဒုက္ခေန စ ဒုဝေ ဝုတ္တာ,
အနတ္တေန တထေဝ စ;
ခယဝယသမုဒယံ,
နိရောဓဓမ္မေန ဒွါဒသာတိ.