10.1.11 မဟာကပ္ပိနသုတ္တ
သာဝတ္ထိယံ ဝိဟရတိ. အထ ခေါ အာယသ္မာ မဟာကပ္ပိနော ယေန ဘဂဝါ တေနုပသင်္ကမိ. အဒ္ဒသာ ခေါ ဘဂဝါ အာယသ္မန္တံ မဟာကပ္ပိနံ ဒူရတောဝ အာဂစ္ဆန္တံ. ဒိသွာန ဘိက္ခူ အာမန္တေသိ— “ပဿထ နော တုမှေ, ဘိက္ခဝေ, ဧတံ ဘိက္ခုံ အာဂစ္ဆန္တံ ဩဒါတကံ တနုကံ တုင်္ဂနာသိကန်”တိ? “ဧဝံ, ဘန္တေ”. “ဧသော ခေါ, ဘိက္ခဝေ, ဘိက္ခု မဟိဒ္ဓိကော မဟာနုဘာဝေါ. န စ သာ သမာပတ္တိ သုလဘရူပါ ယာ တေန ဘိက္ခုနာ အသမာပန္နပုဗ္ဗာ. ယဿ စတ္ထာယ ကုလပုတ္တာ သမ္မဒေဝ အဂါရသ္မာ အနဂါရိယံ ပဗ္ဗဇန္တိ တဒနုတ္တရံ ဗြဟ္မစရိယပရိယောသာနံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရတီ”တိ.
ဣဒမဝေါစ ဘဂဝါ. ဣဒံ ဝတွာန သုဂတော အထာပရံ ဧတဒဝေါစ သတ္ထာ—
“ခတ္တိယော သေဋ္ဌော ဇနေတသ္မိံ,
ယေ ဂေါတ္တပဋိသာရိနော;
ဝိဇ္ဇာစရဏသမ္ပန္နော,
သော သေဋ္ဌော ဒေဝမာနုသေ.
ဒိဝါ တပတိ အာဒိစ္စော,
ရတ္တိမာဘာတိ စန္ဒိမာ;
သန္နဒ္ဓေါ ခတ္တိယော တပတိ,
ဈာယီ တပတိ ဗြာဟ္မဏော;
အထ သဗ္ဗမဟောရတ္တိံ,
ဗုဒ္ဓေါ တပတိ တေဇသာ”တိ.
ဧကာဒသမံ.